ನನಿಗೇನಾದ್ರೂ ಆದರೆ ಅವರೇ ಕಾರಣ! ಬಿಕ್ಕಿ ಬಿಕ್ಕಿ ಕಣ್ಣೀರಿಟ್ಟ ನಟಿ ರೇಖಾ, ವಿಡಿಯೋ ಹರಿಬಿಟ್ಟು ಸಿಎಂಗೆ ಮನವಿ | Rekha Ratheesh

ಕೇರಳ: ಮುಖ್ಯಮಂತ್ರಿ ಪಿಣರಾಯಿ ವಿಜಯನ್ ಮತ್ತು ಅವರ ಸರ್ಕಾರಕ್ಕೆ ವಿಡಿಯೋ ಮೂಲಕ ತನ್ನ ಅಳಲು ತೋಡಿಕೊಂಡ ಕಿರುತೆರೆ ನಟಿ ರೇಖಾ ರತೀಶ್​, ನನಿಗೇನಾದರೂ ಹೆಚ್ಚುಕಮ್ಮಿ ಆದರೆ, ಅದಕ್ಕೆ ಆ ಯೂಟ್ಯೂಬರ್​ಗಳೇ ನೇರ ಹೊಣೆ ಎಂದು ಗಂಭೀರ ಆರೋಪ ಹೊರಿಸಿದ್ದಾರೆ.

'ಆರಾಮ್ಶ', 'ಸಸ್ನೇಹಂ', 'ಆಟೋಗ್ರಾಫ್', 'ಸ್ನೇಹಕೂಡು' ಸೇರಿದಂತೆ ವಿವಿಧ ಚಾನೆಲ್‌ಗಳಲ್ಲಿ ಹಲವಾರು ಧಾರವಾಹಿಗಳಿಂದ ವೀಕ್ಷಕರ ಮನೆ, ಮನ ತಲುಪಿರುವ ರೇಖಾ ರತೀಶ್, ಇನ್​ಸ್ಟಾಗ್ರಾಮ್​ ವಿಡಿಯೋ ಮೂಲಕ ತಮ್ಮ ಮುಕ್ತ ದೂರನ್ನು ಸಿಎಂ ಮುಂದಿಟ್ಟಿದ್ದಾರೆ. ಕಣ್ಣೀರಾಕುತ್ತಲೇ ಕಷ್ಟವನ್ನು ಹಂಚಿಕೊಂಡ ಸೀರಿಯಲ್​ ತಾರೆಗೆ ಕಮೆಂಟ್​ ಮೂಲಕ ನೆಟ್ಟಿಗರು ವ್ಯಾಪಕ ಬೆಂಬಲ ಸೂಚಿಸಿದ್ದಾರೆ.

ಕಳೆದ 8-9 ತಿಂಗಳಿನಿಂದ ತಾನು ಕೆಲಸವಿಲ್ಲದೆ ಫ್ಲಾಟ್‌ನಲ್ಲಿ ಬದುಕು ಸಾಗಿಸುತ್ತಿದ್ದೇನೆ. ಈ ಮಧ್ಯೆ, ಎರಡ್ಮೂರು ತಿಂಗಳಿನಿಂದ ಯೂಟ್ಯೂಬರ್‌ಗಳ ಗುಂಪೊಂದು ನನ್ನನ್ನು ನಿರಂತರವಾಗಿ ಫಾಲೋ ಮಾಡುತ್ತಿದೆ. ಅವರೆಲ್ಲ ನನ್ನ ವಿಡಿಯೋಗಳನ್ನು ಕೆಟ್ಟ, ಕೆಟ್ಟದಾಗಿ ಸಾಮಾಜಿಕ ಜಾಲತಾಣಗಳಲ್ಲಿ ಪೋಸ್ಟ್​ ಮಾಡುತ್ತಿದ್ದಾರೆ. ಅಶ್ಲೀಲ ಹಾಗೂ ಅಸಭ್ಯವಾಗಿ ಟೈಟಲ್​ ಕೊಟ್ಟು ಹರಿಬಿಡುತ್ತಿದ್ದಾರೆ. ನನ್ನನ್ನು ಬದುಕಲು ಬಿಡದಂತೆ ಚಿತ್ರಹಿಂಸೆ ನೀಡ್ತಿದ್ದಾರೆ. ಈ ಮಾನಸಿಕ ಒತ್ತಡವನ್ನು ನನ್ನಿಂದ ಸಹಿಸಲು ಸಾಧ್ಯವಾಗುತ್ತಿಲ್ಲ ಎಂದಿದ್ದಾರೆ.

"ನಾನು ನನ್ನ ಮಗನಿಗಾಗಿ ಬದುಕು ಮುಂದುವರಿಸಲು ಕಷ್ಟಪಡುತ್ತಿರುವ ಮಹಿಳೆ. ಆದರೆ, ಈ ಯೂಟ್ಯೂಬರ್‌ಗಳಿಂದಾಗಿ, ನಾನು ಬದುಕುವ ಶಕ್ತಿ, ಭರವಸೆಯನ್ನೇ ಕಳೆದುಕೊಳ್ಳುತ್ತಿದ್ದೇನೆ. ಇದೇ ಈ ವಿಡಿಯೋ ಮಾಡಲು ಕಾರಣ. ನನಗೆ ಏನಾದರೂ ಸಂಭವಿಸಿದರೆ, ಆ ಯೂಟ್ಯೂಬರ್‌ಗಳೇ ಕಾರಣ. ಇದೆಲ್ಲವೂ ಶೀಘ್ರವೇ ಕೊನೆಗೊಳ್ಳಬೇಕು. ಕೇವಲ ನನ್ನ ಮಾತ್ರವಲ್ಲದೆ, ಇನ್ನೂ ಹಲವಾರು ಕಲಾವಿದರನ್ನು ಇದೇ ರೀತಿಯಲ್ಲಿ ಶೋಷಿಸುವ ಯೂಟ್ಯೂಬರ್‌ಗಳ ಗುಂಪಿವೆ" ಎಂದು ರೇಖಾ ಆರೋಪಿಸಿದ್ದಾರೆ,(ಏಜೆನ್ಸೀಸ್).