ಈಗ 6 ತಿಂಗಳು... ಚಿತ್ರೀಕರಣಕ್ಕೆ ಹೋದ ಮೊನಾಲಿಸಾ ಆಗಿದ್ದು ದಿಢೀರ್​ ಮದುವೆ! ಸ್ಫೋಟಕ ಸಂಗತಿಗಳು ಬೆಳಕಿಗೆ

Monalisa Marriage: ಕಳೆದ ವರ್ಷ, ಉತ್ತರ ಪ್ರದೇಶದ ಪ್ರಯಾಗರಾಜ್​ನಲ್ಲಿ ನಡೆದ ಮಹಾಕುಂಭಮೇಳದಲ್ಲಿ ಜನರ ಗಮನವನ್ನು ತನ್ನ ಬೆಕ್ಕಿನ ಕಂಗಳಿಂದಲೇ ಸೆಳೆದ ಹುಡುಗಿ ಈಗ ಮತ್ತೊಮ್ಮೆ ಮಾಧ್ಯಮ ಮತ್ತು ಸಾಮಾಜಿಕ ಜಾಲತಾಣಗಳಲ್ಲಿ ಸುದ್ದಿಯಲ್ಲಿದ್ದಾಳೆ. ಆದರೆ, ಈ ಬಾರಿ ಯಾವುದೋ ಫೋಟೋ, ವಿಡಿಯೀ ಅಥವಾ ಹೊಸ ಸಿನಿಮಾದ ವಿಷಯಕ್ಕಲ್ಲ. ಬದಲಿಗೆ ದಿಢೀರ್ ಮದುವೆ ವಿಚಾರಕ್ಕೆ ಎಂಬುದು ಇಲ್ಲಿ ಗಮನಾರ್ಹ.

ಮಹಾಕುಂಭಮೇಳದಲ್ಲಿ ಹಾರಗಳನ್ನು ಮಾರಾಟ ಮಾಡುತ್ತಿದ್ದ ಮೊನಾಲಿಸಾ ಭೋಸ್ಲೆ, ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿ ಭಾರೀ ಜನಪ್ರಿಯತೆ ಗಿಟ್ಟಿಸಿಕೊಂಡಿದ್ದಾಳೆ. ಈಕೆಯ ಬೆಕ್ಕಿನ ಕಣ್ಣುಗಳನ್ನು ನೋಡಿ ಫಿದಾ ಆದ ಬಾಲಿವುಡ್​ ನಿರ್ದೇಶಕರು, ಆಕೆಗೆ ಸಿನಿಮಾ ಆಫರ್​ ಕೊಡುವ ಮೂಲಕ ಮತ್ತೊಂದು ಹಂತದ ಜನಪ್ರಿಯತೆಯನ್ನು ತಂದುಕೊಟ್ಟರು. ಇಲ್ಲಿಂದ, ಆಕೆಯ ಜೀವನ ಸುಗುಮವಾಗಲು ಶುರುವಾಯಿತು. ಒಳ್ಳೆಯ ಆದಾಯವನ್ನು ನೋಡಿದ ಮೊನಾಲಿಸಾ, ಮಲಯಾಳಂ ಚಿತ್ರದ ಶೂಟಿಂಗ್​ಗೆ ಕೇರಳಕ್ಕೆ ತೆರಳಿದಾಗ ದಿಢೀರ್ ಮದುವೆ ಆಗಿದ್ದೇ ಈಗ ದೊಡ್ಡ ವಿವಾದಕ್ಕೆ ಕಾರಣವಾಗಿದೆ.

ಮಲಯಾಳಂ ಹೊಸ ಚಿತ್ರದ ಶೂಟಿಂಗ್​ಗಾಗಿ ತಿರುವನಂತಪುರಂಗೆ ಆಗಮಿಸಿದ್ದ ಮೊನಾಲಿಸಾ, ತನಗೆ ಬಲವಂತದ ಮದುವೆ ಮಾಡಿಸಲು ತಂದೆ ಮುಂದಾಗಿದ್ದಾರೆ ಎಂದು ಥಂಪನೂರು ಪೊಲೀಸ್ ಠಾಣೆಯಲ್ಲಿ ದೂರು ನೀಡಿದ್ದಳು. ತನ್ನ ಪ್ರಿಯಕರನ ಜೊತೆಗೆ ಠಾಣೆಗೆ ತೆರಳಿದ್ದ ಯುವತಿ, ನಾನು ಫರ್ಮಾನ್​ ಖಾನ್​​ನನ್ನು ಪ್ರೀತಿಸುತ್ತಿದ್ದೇನೆ. ಆದರೆ, ತಂದೆ ಇದಕ್ಕೆ ಒಪ್ಪುತ್ತಿಲ್ಲ. ನಮ್ಮಿಬ್ಬರಿಗೆ ಮದುವೆ ಮಾಡಿಸಿ ಎಂದು ಹೇಳಿದಳು. ಪೊಲೀಸರ ಸಮ್ಮುಖದಲ್ಲೇ, ಫರ್ಮಾನ್ ಖಾನ್​ ಮತ್ತು ಮೊನಾಲಿಸಾಗೆ ಶ್ರೀ ನಯ್​ನಾರ್​ ದೇವ ದೇಗುಲದಲ್ಲಿ ಸರಳವಾಗಿ ವಿವಾಹ ಮಾಡಿಸಲಾಯಿತು. ಇದಕ್ಕೆ ಕೇರಳದ ಸಿಪಿಎಂ ರಾಜ್ಯ ಕಾರ್ಯದರ್ಶಿ ಎಂ.ವಿ. ಗೋವಿಂದನ್, ಶಿಕ್ಷಣ ಸಚಿವ ವಿ. ಶಿವನ್‌ಕುಟ್ಟಿ ಮತ್ತು ರಾಜ್ಯಸಭಾ ಸಂಸದ ಎ.ಎ. ರಹೀಮ್ ಭಾಗವಹಿಸಿ, ನವಜೋಡಿಗೆ ಶುಭ ಹಾರೈಸಿದರು.

ಕಡೆಗೂ ತನ್ನ ತಂದೆಯ ಮಾತನ್ನು ಧಿಕ್ಕರಿಸಿ, ಪ್ರಿಯಕರ ಫರ್ಮಾನ್​ನನ್ನೇ ಮದುವೆಯಾದ ಮೊನಾಲಿಸಾ, ನಮ್ಮಿಬ್ಬರ ಪ್ರೀತಿಗೆ ಈಗ 6 ತಿಂಗಳು ಎಂದು ಹೇಳಿದ್ದಾಳೆ. ಇದರು ಹಲವರನ್ನು ಕೆರಳಿಸಿದೆ. ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಹುಡುಗಿ ವಿರುದ್ಧ ಕಿಡಿಕಾರಿರುವ ಅನೇಕರು, ಇದು ಅಸಲಿ ಕೇರಳ ಸ್ಟೋರಿ. ಇದೊಂದು ಲವ್​ ಜಿಹಾದ್​ ಎಂದರೆ. ಇವರಿಬ್ಬರದ್ದು ನಿಜವಾದ ಪ್ರೀತಿಯಲ್ಲ ಎಂದಿದ್ದಾರೆ. ಇನ್ನೂ ಕೆಲವರು ಆಕೆಗೆ ಕುಂಭಮೇಳದ ಸಮಯದಲ್ಲೇ 16 ವರ್ಷ ವಯಸ್ಸು. ಹಾಗಿದ್ದರೆ, ಈಗ 17 ಆಗಿರಬೇಕು. ಇದು ನಿಜವಾದಲ್ಲಿ, ಅವಳಿನ್ನು ಅಪ್ರಾಪ್ತೆ! ಎಂದು ಪ್ರಶ್ನೆಗಳನ್ನು ಚರ್ಚೆಗೆ ತಂದಿದ್ದಾರೆ.

16 ವರ್ಷ ನಿಖರವಾಗಿದ್ದರೆ, ಈ ವರ್ಷದ ಮಾರ್ಚ್ 2026ರ ಹೊತ್ತಿಗೆ ಆಕೆಗೆ 17 ವರ್ಷ ವಯಸ್ಸಾಗಿರುತ್ತದೆ. ಭಾರತೀಯ ಕಾನೂನಿನ ಪ್ರಕಾರ, 17 ವರ್ಷದ ಬಾಲಕಿಯನ್ನು ಇನ್ನೂ ಅಪ್ರಾಪ್ತ ವಯಸ್ಕ ಎಂದು ಪರಿಗಣಿಸಲಾಗುತ್ತದೆ ಮತ್ತು ಕಾನೂನುಬದ್ಧವಾಗಿ ಬಾಲ್ಯದ ವಯಸ್ಸು ಎಂದೇ ನಿರ್ಧರಿಸಲಾಗುತ್ತದೆ. ಇದರಿಂದಾಗಿ ಮದುವೆಗೆ ಅನುಮತಿ ಇಲ್ಲ. ಹಾಗಿದ್ದರೆ, ಈ ವಿವಾಹ ಹೇಗೆ ನಡೆಯಿತು? ಇದು ಬಾಲ್ಯ ವಿವಾಹಕ್ಕೆ ಸೇರುವುದಿಲ್ಲವೇ? ಎಂಬ ಪ್ರಶ್ನೆಗಳು ತೀವ್ರ ಚರ್ಚೆಗೆ ಗ್ರಾಸವಾಗಿದೆ.

ಇನ್ನು ಕೇರಳದ 'ಆನ್​ಮನೋರಾಮಾ' ವರದಿಯಲ್ಲಿ, ಕೇರಳದ ಸ್ಮಾರ್ಟ್-ಗವರ್ನೆನ್ಸ್ ಪ್ಲಾಟ್‌ಫಾರ್ಮ್‌ನಲ್ಲಿ ಸಲ್ಲಿಸಲಾದ ದಾಖಲೆಗಳನ್ನು ಪರಿಶೀಲಿಸಲಾಗಿದೆ. ಕೆ-ಸ್ಮಾರ್ಟ್ (ಕೇರಳ - ಆಡಳಿತಾತ್ಮಕ ಸುಧಾರಣೆ ಮತ್ತು ಪರಿವರ್ತನೆಯನ್ನು ನಿರ್ವಹಿಸುವ ಪರಿಹಾರ). ಮಧ್ಯಪ್ರದೇಶದ ನಗರ ಪಂಚಾಯತ್ ಮಹೇಶ್ವರ ನೀಡಿದ ಮೊನಾಲಿಸಾಳ ಜನನ ಪ್ರಮಾಣಪತ್ರದಲ್ಲಿ, ಆಕೆಯು ಜನವರಿ 1, 2008ರಂದು ಮಧ್ಯಪ್ರದೇಶದ ಪಶ್ಚಿಮ ನಿಮಾರ್‌ನ ಮಹೇಶ್ವರದಲ್ಲಿ ಜನಿಸಿದ್ದಾಳೆ ಎಂದು ತೋರಿಸಿದೆ. ಈ ದಾಖಲೆಗಳನ್ನು ಕೆ-ಸ್ಮಾರ್ಟ್ ಪೋರ್ಟಲ್‌ನಲ್ಲಿ ಕ್ರಾಸ್​-ವೆರಿಫಿಕೇಶನ್​ ಮತ್ತು ಪ್ರಕ್ರಿಯೆಯನ್ನು ಮೇಲ್ವಿಚಾರಣೆ ಮಾಡಿದ ಅಧಿಕಾರಿಗಳು, ಕೇವಲ ಅರ್ಧ ಗಂಟೆಯಲ್ಲಿ ವಿವಾಹ ಪ್ರಮಾಣಪತ್ರವನ್ನು ನೀಡಿರುವುದು ಗಮನಾರ್ಹ.

"ಸಾಮಾನ್ಯ ವಿವಾಹ ಕಾಯ್ದೆಯಡಿಯಲ್ಲಿ ವಿವಾಹವನ್ನು ನೋಂದಾಯಿಸಲಾಗಿದೆ. ವಯಸ್ಸು, ನಿವಾಸ, ಧರ್ಮಕ್ಕೆ ಸಂಬಂಧಿಸಿದ ಎಲ್ಲಾ ಪುರಾವೆಗಳನ್ನು ಪರಿಶೀಲಿಸಲಾಗಿದೆ ಮತ್ತು ಪ್ರಮಾಣಪತ್ರವನ್ನು ಕೂಡ ನೀಡಲಾಗಿದೆ. ಈ ವ್ಯವಸ್ಥೆಯಡಿಯಲ್ಲಿ, ಅಪ್ರಾಪ್ತ ವಯಸ್ಸಿನ ವಿವಾಹವನ್ನು ನೋಂದಾಯಿಸಲು ಇಲ್ಲಿ ಸಾಧ್ಯವಿಲ್ಲ. ಆಕೆಯ ವಯಸ್ಸಿನ ಬಗ್ಗೆ ಕೇಳಿಬಂದಿರುವ ಆರೋಪಗಳು ಆಧಾರರಹಿತ" ಎಂದು ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.

ಇನ್ನು ಕೇರಳದ ವಿಎಚ್‌ಪಿ ಪ್ರಧಾನ ಕಾರ್ಯದರ್ಶಿ ವಕೀಲ ಅನಿಲ್ ವಿಲಾಯಿಲ್ ಈ ಪ್ರಕರಣಕ್ಕೆ ಸಂಬಂಧಿಸಿದಂತೆ ದೂರು ಸಲ್ಲಿಸಿದ್ದು, ಮೊನಾಲಿಸಾ ಮದುವೆ ಪ್ರಕರಣವನ್ನು ಪೊಲೀಸರು ಸೂಕ್ತ ರೀತಿಯಲ್ಲಿ ತನಿಖೆ ನಡೆಸಬೇಕು. ಲಭ್ಯವಿರುವ ಪುರಾವೆಗಳ ಆಧಾರದ ಮೇಲೆ, ಮೊನಾಲಿಸಾ ಭೋಸ್ಲೆ, ಜನವರಿ 21, 2009ರಂದು ಜನಿಸಿದ್ದಾಳೆ ಎಂದು ತಿಳಿದುಬಂದಿದೆ. ಬಾಲ್ಯವಿವಾಹ ನಿಷೇಧ ಕಾಯ್ದೆ ಮತ್ತು ಪೋಕ್ಸೊ ಕಾಯ್ದೆಯ ಸಂಬಂಧಿತ ನಿಬಂಧನೆಗಳ ಅಡಿಯಲ್ಲಿ ಸರಿಯಾದ ತನಿಖೆ ನಡೆಸಿ ಎಫ್‌ಐಆರ್ ದಾಖಲಿಸುವಂತೆ ಅನಿಲ್​ ಪೊಲೀಸರಿಗೆ ತಿಳಿಸಿದ್ದಾರೆ,(ಏಜೆನ್ಸೀಸ್).