ತನ್ನದೇ ಕುಟುಂಬವನ್ನು ಸರ್ವನಾಶ ಮಾಡಿದ ಅಫಾನ್ ಕೇಸ್​ ಚಿತ್ರವಾಗಿ ತೆರೆಗೆ! ಹೈಕೋರ್ಟ್​ ಮೆಟ್ಟಿಲೇರಿದ ತಂದೆ | Venjaramoodu Case

ಕೋಝಿಕೋಡ್​: ಕಳೆದ ವರ್ಷ ಫೆ.24ರಂದು ತನ್ನದೇ ಕುಟುಂಬದ ನಾಲ್ವರು ಸದಸ್ಯರು ಮತ್ತು ಪ್ರೇಯಸಿ ಸೇರಿ ಒಟ್ಟು ಐವರನ್ನು ಹತ್ಯೆಗೈದ ಆರೋಪಿ ಅಫಾನ್ (Venjaramoodu Case)​ ಸದ್ಯ ಜೈಲಿನಲ್ಲಿ ಕಂಬಿ ಎಣಿಸುತ್ತಿದ್ದಾನೆ. ಅಜ್ಜಿ, ತಮ್ಮ, ತಂದೆಯ ಸಹೋದರ ಲತೀಫ್​ ಮತ್ತು ಅವರ ಪತ್ನಿ ಶಾಹಿದಾ ಮತ್ತು ಪ್ರೇಯಸಿ ಫರ್ಸಾಳಾನನ್ನು ಸುತ್ತಿಗೆಯಿಂದ ಭೀಕರವಾಗಿ ಕೊಲೆಗೈದ ಅಫಾನ್​ ಕೃತ್ಯ ಅಂದು ಇಡೀ ಕೇರಳವನ್ನೇ ಬೆಚ್ಚಿಬೀಳಿಸಿತು. ಈ ಹತ್ಯೆ ಕೇಸ್​ನಲ್ಲಿ ಸದ್ಯ ಜೈಲು ಶಿಕ್ಷೆ ಅನುಭವಿಸುತ್ತಿರುವ ಆರೋಪಿಯ ಕಥೆಯನ್ನೇ ಇದೀಗ ಚಿತ್ರವಾಗಿ ತರುತ್ತಿರುವುದು ಸದ್ಯ ಕುಟುಂಬಸ್ಥರಿಗೆ ದೊಡ್ಡ ತಲೆನೋವಾಗಿ ಕಾಡಲಾರಂಭಿಸಿದೆ.

ವೆಂಜರಮೂಡು ಕೊಲೆ ಕೇಸ್​ನ ಆರೋಪಿಯ ತಂದೆ ಅಬ್ದುಲ್ ರಹೀಮ್ ಚಿತ್ರತಂಡದ ವಿರುದ್ಧ ಗರಂ ಆಗಿದ್ದಾರೆ. 'ಕಾಲಂ ಪರಂಗ್ ಕಥಾ' ಚಿತ್ರದ ಬಿಡುಗಡೆಗೆ ತಡೆ ಕೋರಿ ಹೈಕೋರ್ಟ್ ಮೆಟ್ಟಿಲೇರಿದ್ದಾರೆ. ವರದಿಗಳ ಪ್ರಕಾರ, ಈ ಹತ್ಯಾಕಾಂಡವನ್ನೇ ಆಧರಿಸಿ ಚಿತ್ರ ರೂಪಿಸಲಾಗಿದೆ. ಹೀಗಾಗಿಯೇ, ಸಿನಿಮಾ ಬಿಡುಗಡೆಯಿಂದ ಪ್ರಕರಣದ ನ್ಯಾಯಯುತ ವಿಚಾರಣೆಯ ಮೇಲೆ ಪರಿಣಾಮ ಬೀರುತ್ತದೆ ಎಂದು ಅಫಾನ್ ತಂದೆ ಸಲ್ಲಿಸಿರುವ ಅರ್ಜಿಯಲ್ಲಿ ಉಲ್ಲೇಖಿಸಲಾಗಿದೆ.

ಪ್ರಸಾದ್ ನೂರನಾಡು ನಿರ್ದೇಶಿಸಿರುವ ಈ ಚಿತ್ರ ಇದೇ ಫೆಬ್ರವರಿ 6ರಂದು ತೆರೆ ಕಾಣಲು ಸಿದ್ಧವಾಗಿದೆ. ಪ್ರಕರಣದ ವಿಚಾರಣೆ ಇನ್ನೂ ಪ್ರಾರಂಭವಾಗಿಲ್ಲ. ಈ ಸಮಯದಲ್ಲಿ, ಚಿತ್ರದ ಪ್ರದರ್ಶನಕ್ಕೆ ಅವಕಾಶ ನೀಡುವುದರಿಂದ ಮಾಧ್ಯಮ ವಿಚಾರಣೆಗೆ ಕಾರಣವಾಗುತ್ತದೆ ಮತ್ತು ಅದು ವಿಚಾರಣೆಯ ಮೇಲೂ ದೊಡ್ಡ ಪರಿಣಾಮ ಬೀರುತ್ತದೆ ಎಂದು ಅರ್ಜಿಯಲ್ಲಿ ತಿಳಿಸಿದ್ದಾರೆ. ಈ ಬಗ್ಗೆ ಕೋರ್ಟ್​ ಏನು ಹೇಳಲಿದೆ? ಚಿತ್ರಕ್ಕೆ ತಡೆ ನೀಡಲಿದ್ಯಾ ಎಂಬುದನ್ನು ಮುಂದಿನ ದಿನಗಳಲ್ಲಿ ಕಾದು ನೋಡಬೇಕಿದೆ.

2025ರ ಫೆ.24ರಂದು ತನ್ನದೇ ಕುಟುಂಬದ ಸದಸ್ಯರನ್ನು ಅಮಾನುಷವಾಗಿ ಹಲ್ಲೆಗೈದಿದ್ದಲ್ಲದೇ, ಲತೀಫ್ ಮತ್ತು ಆತನ ಪತ್ನಿಗೆ 18ಕ್ಕೂ ಹೆಚ್ಚು ಬಾರಿ ಸುತ್ತಿಗೆ ಸೇರಿದಂತೆ ಇತರೆ ವಸ್ತುಗಳಿಂದ ಆಫಾನ್​ ಭೀಕರವಾಗಿ ಹತ್ಯೆಗೈದ ಘಟನೆ ಕೇರಳದ ತಿರುವನಂತಪುರಂನಲ್ಲಿ ವರದಿಯಾಯಿತು. ಪ್ರಸ್ತುತ, ಕೊಲೆ ಪ್ರಕರಣದ ತನಿಖೆಯನ್ನು ನಡೆಸುತ್ತಿರುವ ಪೊಲೀಸರು, ಆರೋಪಿಯನ್ನು ಕಸ್ಟಡಿಯಲ್ಲಿರಿಸಿದ್ದಾರೆ,(ಏಜೆನ್ಸೀಸ್).