ಆತನ ಹೆಸರು ಮಿಥುನ್. ಎಲ್ಲರೂ ಮಿಥ್ಯ ಎಂದು ಕರೆಯುತ್ತಾರೆ. ಮುಂಬೈನಲ್ಲಿ ಅಪ್ಪ, ಅಮ್ಮ ಮತ್ತು ತಂಗಿ ವಂದನಾ ಜತೆ ವಾಸ. ಆದರೆ, 11 ವರ್ಷದ ಹುಡುಗನ ಬಾಳಲ್ಲಿ ಬಿರುಗಾಳಿ ಎದ್ದು, ಅನಾಥನಾಗುತ್ತಾನೆ. ತಂಗಿ ಜತೆ ಮುಂಬೈ ತೊರೆದು ಉಡುಪಿಯ ಸಂಬಂಧಿಕರ ಮನೆಗೆ ಬರುತ್ತಾನೆ. ಮರಾಠಿ ಓದುತ್ತಿದ್ದವನು ಇಲ್ಲಿ ಕನ್ನಡ ಶಾಲೆ ಸೇರುತ್ತಾನೆ. ಹೊಸ ಜಾಗ, ಭಾಷೆ, ಜನ, ಸಂಬಂಧಗಳು, ಪರಿಸರಕ್ಕೆ ಹೊಂದಿಕೊಳ್ಳಲು, ತನ್ನವರು ಯಾರು? ಎಂಬುದನ್ನು ಅರಿಯಲು ಪರದಾಡುತ್ತಾನೆ. ಅದರ ನಡುವೆಯೇ ಆತನ ತಂದೆ ಮತ್ತು ತಾಯಿಯ ಮನೆಯವರು ಮಿಥ್ಯನ ಕಸ್ಟಡಿ ಪಡೆಯಲು ಕೋರ್ಟ್ ಮೆಟ್ಟಿಲೇರುತ್ತಾರೆ. ಹೀಗೆ ಡೋಲಾಯಮಾನ ಪರಿಸ್ಥಿತಿಗಳಿಗೆ ಸಿಲುಕುವ ಬದುಕಿನಲ್ಲಿ ಹೊಸ ಹೊಸ ತಿರುವುಗಳಿಗೆ ಹೊಂದಿಕೊಳ್ಳಲು ಹೆಣಗುವ ಮಿಥ್ಯನ ಮಾನಸಿಕ ಯಾತನೆಗಳ ಸುತ್ತ ಕಥೆ ಸಾಗುತ್ತದೆ.
