ಮತ್ತೆ ಬರಲಿದೆ ಟಿಎನ್ ಸೀತಾರಾಮ ಅವರ ಮಾಯಾಮೃಗ... ವೆಬ್ ಸೀರಿಸ್

ಹಿರಿಯ ನಿರ್ದೇಶಕ ಟಿ.ಎನ್. ಸೀತಾರಾಂ ಅವರ ಜನಪ್ರಿಯ ಧಾರಾವಾಹಿಗಳಲ್ಲಿ ‘ಮಾಯಾಮೃಗ’ ಮೊದಲ ಸ್ಥಾನದಲ್ಲಿ ನಿಲ್ಲುತ್ತದೆ. 90ರ ದಶಕದಲ್ಲಿ ದೂರದರ್ಶನದಲ್ಲಿ ಪ್ರಸಾರವಾದ ಈ ಧಾರಾವಾಹಿ ಇಂದಿಗೂ ಮನೆಮಾತಾಗಿದೆ. ಈಗ ಈ ಧಾರಾವಾಹಿಯು ವೆಬ್​ಸೀರೀಸ್ ಆಗಿ ಪ್ರಸಾರವಾಗಲಿದೆ.

ಯೂಟ್ಯೂಬ್​ನ ಭೂಮಿಕಾ ಟಾಕೀಸ್ ಚಾನಲ್​ನಲ್ಲಿ ‘ಮಾಯಾಮೃಗ’ ಧಾರಾವಾಹಿಯು ಜೂನ್ 4ರಿಂದ ಸ್ಟ್ರೀಮ್ ಆಲಿದೆ. ಮೂಲ ಧಾರಾವಾಹಿಯು 430 ಎಪಿಸೋಡುಗಳಷ್ಟಿತ್ತು. ಆದರೆ, ಈಗಿನ ಪರಿಸ್ಥಿತಿ ಮತ್ತು ವೀಕ್ಷಕರ ಅಭಿರುಚಿಗೆ ತಕ್ಕಂತೆ ಒಂದಿಷ್ಟು ವಿಷಯಗಳನ್ನು ಟ್ರಿಮ್ ಮಾಡಲಾಗಿದ್ದು, ಒಟ್ಟು 360 ಕಂತುಗಳಲ್ಲಿ ಈ ವೆಬ್​ಸೀರೀಸ್ ಪ್ರಸಾರವಾಗಲಿದೆ. ವಾರಕ್ಕೆ ಐದರಿಂದ 10 ಎಪಿಸೋಡುಗಳನ್ನು ಅಪ್​ಲೋಡ್ ಮಾಡುವುದಾಗಿ ಟಿ.ಎನ್. ಸೀತಾರಾಂ ಹೇಳುತ್ತಾರೆ.

ಈ ಕುರಿತು ‘ವಿಜಯವಾಣಿ’ಯೊಂದಿಗೆ ಮಾತನಾಡಿದ ಸೀತಾರಾಂ, ‘ಒಟ್ಟು 360 ಎಪಿಸೋಡುಗಳ ವೆಬ್​ಸೀರೀಸ್ ಆಗಿ ‘ಮಾಯಾಮೃಗ’ ಮತ್ತೆ ಪ್ರೇಕ್ಷಕರ ಮುಂದೆ ಬರಲಿದೆ. ಪ್ರತಿಯೊಂದು ಕಂತು 22 ನಿಮಿಷಗಳ ಅವಧಿಯದ್ದಾಗಿರುತ್ತದೆ. ಇದಲ್ಲದೆ, ಆಫ್-ಸ್ಕ್ರೀನ್ ದೃಶ್ಯಗಳು ಸಹ ಇರುತ್ತವೆ’ ಎಂದು ಹೇಳುತ್ತಾರೆ. ಮಧ್ಯಮ ವರ್ಗದ ಕುಟುಂಬಗಳ ಸುತ್ತ ಸುತ್ತುವ ಈ ಧಾರಾವಾಹಿಯಲ್ಲಿ ದತ್ತಣ್ಣ, ಎಂ.ಡಿ. ಪಲ್ಲವಿ, ಲಕ್ಷ್ಮೀ ಚಂದ್ರಶೇಖರ್, ಸೇತೂರಾಂ, ಮಾಳವಿಕಾ, ಅವಿನಾಶ್, ಮುಖ್ಯಮಂತ್ರಿ ಚಂದ್ರು ಮುಂತಾದವರು ಅಭಿನಯಿಸಿದ್ದರು. ಈ ಧಾರಾವಾಹಿಯನ್ನು ಟಿ.ಎನ್. ಸೀತಾರಾ, ಪಿ. ಶೇಷಾದ್ರಿ ಮತ್ತು ನಾಗೇಂದ್ರ ಷಾ ಜತೆಯಾಗಿ ನಿರ್ದೇಶಿಸಿದ್ದರು.