ಬೆಂಗಳೂರು: ‘ಮುಂಗಾರುಮಳೆ’ ಚಿತ್ರದ ಮೂಲಕ ಒಲವಿನ ಮಳೆ ತರಿಸಿದ್ದ ನಿರ್ದೇಶಕ ಯೋಗರಾಜ್ ಭಟ್ ಮತ್ತು ನಿರ್ಮಾಪಕ ಇ.ಕೃಷ್ಣಪ್ಪ ಇದೀಗ ‘ಮನದ ಕಡಲು’ ಮೂಲಕ ಹೊಸ ಲೋಕ ಸೃಷ್ಟಿಸಲು ಹೊರಟಿದ್ದಾರೆ. ಅಂದು ‘ಮುಂಗಾರು ಮಳೆ’, ಇಂದು ‘ಮನದ ಕಡಲು’ ಎಂಬ ಟ್ಯಾಗ್ಲೈನ್ ಇರುವ ಈ ಚಿತ್ರದಲ್ಲಿ ಸುಮುಖ, ಅಂಜಲಿ ಅನೀಶ್ ಹಾಗೂ ರಾಶಿಕಾ ಶೆಟ್ಟಿ ಮುಖ್ಯಭೂಮಿಕೆಯಲ್ಲಿದ್ದಾರೆ. ಈ ಪೈಕಿ ರಾಶಿಕಾ ಶೆಟ್ಟಿಗೆ ಇದು ಮೊದಲ ಪ್ರಯತ್ನ. ಇಂದು ಬಿಡುಗಡೆಯಾಗುತ್ತಿರುವ ಮೊದಲ ಚಿತ್ರದ ಮೇಲೆ ರಾಶಿ ನಿರೀಕ್ಷೆ ಇಟ್ಟಿರುವ ಅವರು ‘ವಿಜಯವಾಣಿ’ ಜತೆ ಪಾತ್ರ ಹಾಗೂ ಸಿನಿ ಜರ್ನಿ ಕುರಿತು ಮುಕ್ತವಾಗಿ ಮಾತನಾಡಿದರು. ‘ನಾನು ಮೂಲತಃ ಚಿಕ್ಕಮಗಳೂರಿನ ಹುಡುಗಿ. ಸದ್ಯ ತಂದೆ-ತಾಯಿ ಮೈಸೂರಿನಲ್ಲಿ ನೆಲೆಸಿದ್ದಾರೆ. ಸಿನಿಮಾ ರಂಗದೊಂದಿಗೆ ನಂಟು ಬೆಳೆಯುತ್ತದೆ ಎಂಬ ಕಾರಣಕ್ಕೆ ಪದವಿ ಮುಗಿದ ಬಳಿಕ ನಾನು ಫ್ಯಾಷನ್ ಡಿಸೈನ್ ಆರಂಭಿಸಿದೆ. ನಾನು ಚಿಕ್ಕವಳಿರುವಾಗ ‘ತನನಂ ತನನಂ’ ಚಿತ್ರದ ಹಾಡಿನಲ್ಲಿ ಡಾನ್ಸ್ ಮಾಡಿದ್ದೆ. ಆಗಿನಿಂದಲೂ ನಟಿಯಾಗಬೇಕು ಎಂಬ ಆಸೆ ಚಿಗುರಿತ್ತು. ಹೀಗೆ ನಾನು ಫ್ಯಾಷನ್ ಡಿಸೈನ್, ಆ್ಯಡ್ ಪ್ರಮೋಷನ್ ಮಾಡುತ್ತಿದ್ದೆ. ಆಗ ಛಾಯಾಗ್ರಾಹಕ ಸಂತೋಷ್ ರೈ ಪಾತಾಜೆ ನನ್ನ ಫೋಟೋಗಳನ್ನು ಯೋಗರಾಜ್ ಭಟ್ ಸರ್ಗೆ ತೋರಿಸಿದ್ದಾರೆ. ಅವರು ಆಡಿಷನ್ಗೆ ಕರೆದು, ಚರ್ಚಿಸಿ ನನ್ನನ್ನು ಫೈನಲ್ ಮಾಡಿದ್ದರು. ಇದೀಗ ‘ಮನದ ಕಡಲು’ ಮೂಲಕ ನಾನು ಚಿತ್ರರಂಗಕ್ಕೆ ಪದಾರ್ಪಣೆ ಮಾಡುತ್ತಿರುವ ಖುಷಿ’ ಎಂದು ಹೇಳಿಕೊಳ್ಳುತ್ತಾರೆ.
