ಆ್ಯಕ್ಷನ್​ ಕ್ವೀನ್​ ಮಾಲಾಶ್ರೀ, ಬೆಂಕಿ ತನಿಷಾ ಕುಪ್ಪಂಡ ನಟನೆಯ ಪೆನ್​ಡ್ರೈವ್​ ಪ್ಯಾಕಪ್​!

ವಿಜಯವಾಣಿ ಸುದ್ದಿಜಾಲ ಬೆಂಗಳೂರು:

ಮೂರು ದಶಕಗಳ ಸಿನಿಮಾಜೀವನದಲ್ಲಿ "ಧ್ವನಿ', "ಕೋತಿರಾಜ್​' ಸೇರಿ 15ಕ್ಕೂ ಹೆಚ್ಚು ಸಿನಿಮಾಗಳನ್ನು ನಿರ್ದೇಶಿಸಿ, ನಿರ್ಮಿಸಿದ ಖ್ಯಾತಿ ಸೆಬಾಸ್ಟಿಯನ್​ ಡೇವಿಡ್​ಗೆ ಸಲ್ಲುತ್ತದೆ. ಇದೀಗ ಅವರು "ಪೆನ್​ಡ್ರೈವ್​​' ಕಥೆಯೊಂದಿಗೆ ವಾಪಸ್ಸಾಗಿದ್ದು, ಇತ್ತೀಚೆಗಷ್ಟೆ ಚಿತ್ರದ ಚಿತ್ರೀಕರಣ ಪೂರ್ಣಗೊಳಿಸಿ ಕುಂಬಳಕಾಯಿ ಒಡೆಯಲಾಗಿದೆ. ಜತೆಗೆ ಡಬ್ಬಿಂಗ್​ ಕೂಡ ಮುಕ್ತಾಯವಾಗಿದ್ದು, ಸದ್ಯ ಚಿತ್ರತಂಡ ರಿಲೀಸ್​ಗೆ ಸಿದ್ಧತೆ ನಡೆಸುತ್ತಿದೆ.

ಇದೊಂದು ವಿಭಿನ್ನ ಕಥಾಹಂದರದ ಚಿತ್ರವಾಗಿದ್ದು ಮಾಲಾಶ್ರೀ, ಬಿಗ್​ಬಾಸ್​ ಖ್ಯಾತಿಯ ತನಿಷಾ ಕುಪ್ಪಂಡ ಮತ್ತು ಕಿಶನ್​ ಮುಖ್ಯ ಭೂಮಿಕೆಯಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. "ಚಾಮುಂಡಿ', "ದುರ್ಗಿ', "ಮಾರಕಾಸ್ತ್ರ' ಸೇರಿ ಹಲವು ಆ್ಯಕ್ಷನ್​ ಪ್ರಧಾನ ಚಿತ್ರಗಳಲ್ಲಿ ಮಿಂಚಿರುವ ಮಾಲಾಶ್ರೀ, "ಪೆನ್​ಡ್ರೈವ್​​'ನಲ್ಲೂ ಅಂಥದ್ದೇ ರೀತಿಯ ರಫ್​ ಆ್ಯಂಡ್​ ಟಫ್​ ಪಾತ್ರದಲ್ಲಿ ನಟಿಸಲಿದ್ದಾರೆ. ಜತೆಗೆ ರಾಧಿಕಾ ರಾಮ್​, ಸಂಜನಾ ನಾಯ್ಡು, ಅರ್ಚನಾ, ರೇಣುಕಾ, ಗೀತಾ, ಭಾಗ್ಯ, ಗೀತಪ್ರಿಯ, ಕರಿಸುಬ್ಬು ಪ್ರಮುಖ ತಾರಾಗಣದಲ್ಲಿದ್ದಾರೆ.