ವಿಜಯಪುರ ಜಿಲ್ಲೆಯ ಒಂದು ಹಳ್ಳಿ ಕಲಾದಗಿ. ಆ ಊರಿನ ನಾಲ್ವರು ಬಾಲಕರು ಎರಡು ಕಿಮೀ ದೂರವಿರುವ ಇನ್ನೊಂದು ಊರಿನಲ್ಲಿ ನಡೆಯುವ ಬಸವಣ್ಣ ಜಾತ್ರೆಯನ್ನು ಕಣ್ತುಂಬಿಕೊಳ್ಳಬೇಕು ಎಂಬ ಮಹಾದಾಸೆ ಹೊಂದುತ್ತಾರೆ. ಆದರೆ, ಆ ಮಕ್ಕಳಿಗೆ ಹಣದ ಕೊರತೆ ಎದುರಾಗುತ್ತದೆ. ಮನೆಯಲ್ಲಿ ಕೇಳೋಣ ಎಂದರೆ, ತಂದೆ-ತಾಯಿಯರೇ ದಿನಗೂಲಿ, ಜೀತದಾಳಾಗಿ ದುಡಿಯುವವರು. ಅವರನ್ನು ಕೇಳುವುದು ಸರಿಯಲ್ಲ ಎಂದು, ತಾವೇ ದುಡಿಮೆಗೆ ಮುಂದಾಗುತ್ತಾರೆ. ಹಾಗಾದರೆ, ಹಣಕ್ಕಾಗಿ ಅವರು ಮಾಡುವ ಕೆಲಸವೇನು? ಅವರು ಅಂದುಕೊಂಡಷ್ಟು ಹಣ ಸಂಪಾದಿಸುತ್ತಾರಾ? ಜಾತ್ರೆಗೆ ಹೋಗುತ್ತಾರಾ? ತಿಳಿಯಲು ಸಿನಿಮಾ ನೋಡಬೇಕಷ್ಟೆ. ಅರ್ಜುನ್ ಪಿ. ಡೋಣೂರ ಜವಾರಿ ಶೈಲಿಯ ಸರಳ ಕಥೆ ಹೇಳಿದ್ದಾರೆ. ಅವರೇ ಈ ಹಿಂದೆ ಹೇಳಿಕೊಂಡಿರುವಂತೆ, ಇದು ಅವರ ಬದುಕಿನ ಅನುಭವಗಳಿಂದ ಮೂಡಿದ ಕಥೆ. ಮಕ್ಕಳಿಗೆ ಆಪ್ತವಾಗುವಂತೆ ಚಿತ್ರವನ್ನು ಕಟ್ಟಿಕೊಟ್ಟಿದ್ದಾರೆ. ಕೆಲವು ಕಡೆ ಇನ್ನು ಸ್ವಲ್ಪ ಕುತೂಹಲಕಾರಿಯಾಗಿ ಕಥೆ ಹೆಣೆದಿದ್ದರೆ, ಪ್ರೇಕ್ಷಕರಿಗೆ ಸಿನಿಮಾ ಇನ್ನಷ್ಟು ಆಪ್ತವಾಗುತ್ತಿತ್ತು ಎನಿಸುತ್ತದೆ. ವಾಡಿ ಮನೆ, ಬಾವಿ, ಊರ ಅಗಸಿ ಹಾಗೂ ಜಾತ್ರೆಯ ವಾತಾವರಣವನ್ನು ಈ ಕಥೆಯ ಮೂಲಕ ಕಣ್ತುಂಬಿಕೊಳ್ಳಬಹುದು. ಬಾಲ ಕಲಾವಿದರಾದ ತೇಜಸ್, ಸಂಕಲ್ಪ, ಸುಮಿತ್ ಇಡೀ ಕಥೆಯನ್ನು ಆವರಿಸಿದ್ದು, ಸಂಗಮೇಶ್ ಉಪಾಸೆ, ನಿಧಿ ಚಕ್ರವರ್ತಿ ಪಾತ್ರಗಳು ಗಮನಸೆಳೆಯುತ್ತವೆ. ಆರವ್ ರಿಷಿಕ್ ಸಂಗೀತ ಕಥೆಗೆ ಪೂರಕವಾಗಿದೆ.
