'ಕಿಶೋರ್ ಜತೆ ಕೃಷಿ';‘5’ನಲ್ಲಿ ನಾಯಕಿ

ಬೆಂಗಳೂರು: ಕಳೆದ ಎರಡ್ಮೂರು ತಿಂಗಳಿಗೆ ಹೋಲಿಕೆ ಮಾಡಿದರೆ, ಇದೀಗ ಸಿನಿಮಾ ಕೆಲಸಗಳು ಚುರುಕು ಪಡೆದುಕೊಂಡಿವೆ. ಬಹುತೇಕ ಸಿನಿಮಾ ಕಲಾವಿದರೆಲ್ಲ ಚಿತ್ರೀಕರಣದಲ್ಲಿ ಪಾಲ್ಗೊಂಡಿದ್ದಾರೆ. ನಟಿ ಕೃಷಿ ತಾಪಂಡ ಸಹ ಮತ್ತೆ ಮುಖಕ್ಕೆ ಬಣ್ಣ ಹಚ್ಚಿಕೊಂಡು ಕ್ಯಾಮರಾ ಮುಂದೆ ಬಂದಿದ್ದಾರೆ. ಸದ್ದಿಲ್ಲದೆ ಹೊಸ ಸಿನಿಮಾ ಒಪ್ಪಿಕೊಂಡಿದ್ದಾರೆ. ಆ ಚಿತ್ರದ ಹೆಸರು ‘5’! ಪಂಚಭೂತಗಳಾದ ಗಾಳಿ, ನೀರು, ಬೆಂಕಿ, ಭೂಮಿ, ಆಕಾಶ ಇವೆಲ್ಲವನ್ನು ಆಧರಿಸಿ ಈಗಾಗಲೇ ಸ್ಯಾಂಡಲ್​ವುಡ್​ನಲ್ಲಿ ಹಲವು ಸಿನಿಮಾಗಳು ಮೂಡಿಬಂದಿವೆ.

ಇದೀಗ ಆ ಐದು ಅಂಶಗಳನ್ನಿಟ್ಟುಕೊಂಡೇ ಸಿನಿಮಾ ನಿರ್ದೇಶನ ಮಾಡುತ್ತಿದ್ದಾರೆ ವಿಕ್ರಂ ಮತ್ತು ಜಿಯಾ. ಲಾಕ್​ಡೌನ್ ಶುರುವಾಗುವುದಕ್ಕೂ ಮುನ್ನ ಶುರುವಾಗಿದ್ದ ಈ ಸಿನಿಮಾದ ಬಹುತೇಕ ಶೂಟಿಂಗ್ ಮುಗಿದಿತ್ತು. ಇದೀಗ ಒಂದಷ್ಟು ಬದಲಾವಣೆ ಮಾಡಿಕೊಂಡು ಮತ್ತೆ ಚಿತ್ರೀಕರಣ ಮಾಡಲಾಗುತ್ತಿದೆ. ಕ್ರೖೆಂ ಥ್ರಿಲ್ಲರ್ ಶೈಲಿಯಲ್ಲಿ ಸಿದ್ಧವಾಗುತ್ತಿರುವ ‘5’ ಸಿನಿಮಾದಲ್ಲಿ ಕಾಪ್ ಅವತಾರದಲ್ಲಿ ಕಿಶೋರ್ ನಟಿಸುತ್ತಿದ್ದು, ಅವರಿಗೆ ಕೃಷಿ ಜೋಡಿಯಾಗಿದ್ದಾರೆ. ‘ಲಾಕ್​ಡೌನ್​ಗೂ ಮುಂಚೆ ಶುರುವಾದ ಈ ಸಿನಿಮಾದಲ್ಲಿ ನಾಯಕಿ ಪಾತ್ರ ಇರಲಿಲ್ಲ. ನಿರ್ದೇಶಕರು ಇತ್ತೀಚೆಗೆ ಸ್ಕ್ರಿಪ್ಟ್ ನಲ್ಲಿ ಬದಲಾವಣೆ ಮಾಡಿಕೊಂಡು ನಾಯಕಿಯ ಪಾತ್ರ ಸೇರಿಸಿದ್ದರು. ಒಂದೇ ಮಾತಿಗೆ ಕಥೆ ಒಪ್ಪಿಗೆ ಆಯಿತು. ಪತ್ರಕರ್ತೆ ಮತ್ತು ರಾಜಕಾರಣಿ ಎರಡೂ ಶೇಡ್​ಗಳಿರುವ ಪಾತ್ರ ನನ್ನದಾಗಿದೆ. ಕಿಶೋರ್​ಗೆ ಪತ್ನಿಯಾಗಿ ಕಾಣಿಸಿಕೊಂಡಿದ್ದೇನೆ’ ಎಂಬುದು ಕೃಷಿ ಮಾತು. ಬೆಂಗಳೂರಿನಲ್ಲಿ 5 ದಿನದ ಶೂಟಿಂಗ್ ಮುಗಿಸಿರುವ ತಂಡ, ಸದ್ಯ ಮೈಸೂರಿನಲ್ಲಿ ಠಿಕಾಣಿ ಹೂಡಿದೆ. ಅದಾದ ಬಳಿಕ ಕೋಲಾರದಲ್ಲಿಯೂ ಕೆಲ ದಿನಗಳ ಚಿತ್ರೀಕರಣ ನಡೆಯಲಿದೆ. ಸೀಮಿತ ಕಲಾವಿದರನ್ನಷ್ಟೇ ಬಳಸಿಕೊಂಡು ಈ ಸಿನಿಮಾ ತಯಾರಾಗುತ್ತಿದ್ದು, ಒಂದೇ ಮನೆಯಲ್ಲಿಯೇ ಸಿನಿಮಾ ಸಾಗಲಿದೆಯಂತೆ. ಇನ್ನು ಕೃಷಿ ನಟನೆಯ ‘ಬ್ಲಾಂಕ್’, ‘ಲಂಕೆ’ ಮತ್ತು ‘ರೂಪಾಯಿ’ ಚಿತ್ರದ ಕೆಲಸಗಳು ಮುಕ್ತಾಯವಾಗಿದ್ದು, ಬಿಡುಗಡೆಗೆ ಸಜ್ಜಾಗುತ್ತಿವೆ.

https://www.vijayavani.net/clarification-about-sanjana-conversion/