ಹೌದು.. ಅದಕ್ಕೆ ಉದಾಹರಣೆಯಾಗಿ ಅವರ ಕೈಯಲ್ಲಿ ಐದು ಸಿನಿಮಾಗಳಿವೆ. ಆ ಪೈಕಿ ‘ಕಾಲಾಂತಕ’ ಎಂಬ ಸಿನಿಮಾ ಬಿಡುಗಡೆಗೆ ಸಿದ್ಧವಿದೆ. ಅದರ ನಂತರ ‘ನಕ್ಷೆ’, ‘ಮುಂದೊಂದು ದಿನ’, ‘ಕೆಜಿಎಫ್: ಚಾಪ್ಟರ್ 2’ ಅಲ್ಲದೆ, ಮರಾಠಿಯ ‘ರಾಜಕುಮಾರ್’ ಎಂಬ ಚಿತ್ರದಲ್ಲೂ ಅರ್ಚನಾ ಜೋಯಿಸ್ ನಟಿಸುತ್ತಿದ್ದಾರಂತೆ. ಇದಕ್ಕೆಲ್ಲ ಕಾರಣ ‘ಕೆಜಿಎಫ್’ ಎಂದರೆ ತಪ್ಪಿಲ್ಲ. ಆ ಚಿತ್ರದಲ್ಲಿ ಆಫರ್ ಬಂದಾಗ, ಯಶ್ ತಾಯಿಯ ಪಾತ್ರ ಎಂದು ಕೇಳಿ ಹಿಂದೇಟು ಹಾಕಿದ್ದರಂತೆ. ಕೊನೆಗೆ ಕಥೆ ಮತ್ತು ಪಾತ್ರ ಕೇಳಿ ಒಪ್ಪಿದ್ದಾರೆ. ಅಲ್ಲಿಯವರೆಗೂ, ಧಾರಾವಾಹಿಗಳಲ್ಲಿ ನಟಿಸಿದ್ದ ಅವರಿಗೆ ‘ಕೆಜಿಎಫ್’ಗಿಂಥ ಇನ್ನೊಂದು ದೊಡ್ಡ ಓಪನಿಂಗ್ ಸಿಗುವುದು ಸಾಧ್ಯ ಇರಲಿಲ್ಲವೇನೋ? ಇನ್ನು ‘ಕೆಜಿಎಫ್: ಚಾಪ್ಟರ್ 2’ನಲ್ಲೂ ಅರ್ಚನಾ ಅವರ ಪಾತ್ರ ಮುಂದುವರಿದಿದೆಯಂತೆ. ನಾಯಕನಿಗೆ ತಾಯಿಯೇ ಸ್ಪೂರ್ತಿಯಾದ್ದರಿಂದ, ಆ ಪಾತ್ರ ಅಲ್ಲಲ್ಲಿ ಮೂಡಿಬರಲಿದೆಯಂತೆ. ಇದೆಲ್ಲದರ ಮಧ್ಯೆ, ಅರ್ಚನಾ ಅವರು ‘ಕಾಲಾಂತಕ’ ಚಿತ್ರದ ಬಗ್ಗೆ ಸಾಕಷ್ಟು ನಿರೀಕ್ಷೆಗಳನ್ನು ಇಟ್ಟುಕೊಂಡಿದ್ದಾರೆ. ಅದಕ್ಕೆ ಕಾರಣ, ಈ ಚಿತ್ರದಲ್ಲಿ ಅರ್ಚನಾ ಲೇಖಕಿಯ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಅಬಚೂರು ಎಂಬ ಕಾಲ್ಪನಿಕ ಊರಿನಲ್ಲಿ ಒಂದಿಷ್ಟು ಘಟನೆಗಳು ನಡೆದು, ಆ ಘಟನೆಗಳನ್ನು ಆಧರಿಸಿ ಲೇಖಕಿಯೊಬ್ಬಳು ಕಾದಂಬರಿ ಬರೆಯಲು ಶುರು ಮಾಡುತ್ತಾಳೆ. ಆ ನಂತರ ಏನೆಲ್ಲ ಆಗುತ್ತದೆ ಎನ್ನುವುದು ಚಿತ್ರದ ಕಥೆಯಂತೆ. ‘ಚಿತ್ರದಲ್ಲಿ ನಾನು ಬರಹಗಾರ್ತಿಯಾಗಿ ಕಾಣಿಸಿಕೊಂಡಿದ್ದೇನೆ. ಈ ಸಿನಿಮಾದಲ್ಲಿ ಬರುವ ಪಾತ್ರಗಳೆಲ್ಲ ನನ್ನ ಪುಸ್ತಕದಲ್ಲಿ ನಾನು ಸೃಷ್ಟಿ ಮಾಡಿರುವ ಪಾತ್ರಗಳೇ. ವಿಭಿನ್ನ ಕಥೆ ಇರುವ ಚಿತ್ರ. ನನ್ನ ಪಾತ್ರ ಬಹಳ ಚಾಲೆಂಜಿಂಗ್ ಆಗಿತ್ತು’ ಎನ್ನುತ್ತಾರೆ ಅರ್ಚನಾ. ಅಂಬರೀಷ್ ಎನ್ನುವವರು ನಿರ್ದೇಶಿಸಿರುವ ಈ ಚಿತ್ರ ಈಗಾಗಲೇ ಬಿಡುಗಡೆಗೆ ಸಜ್ಜಾಗಿದ್ದು, ಈ ವರ್ಷದಲ್ಲಿ ಇದು ಅವರ ಮೊದಲ ಚಿತ್ರವಾಗುತ್ತದೆ.
