ಟಿಕೆಟ್​ ಬುಕ್ಕಿಂಗ್​ ವೇದಿಕೆಗಳಿಗೆ ಮೂಗುದಾರ; ರೆವಿನ್ಯೂ ಶೇರಿಂಗ್​, ಅನೈತಿಕ ರೇಟಿಂಗ್​ ವ್ಯವಸ್ಥೆ ಸರಿಪಡಿಸಲು ನಿರ್ಮಾಪಕರ ಪತ್ರ

ವಿಜಯವಾಣಿ ಸುದ್ದಿಜಾಲ ಬೆಂಗಳೂರು:

ಕೋಟ್ಯಂತರ ರೂಪಾಯಿ ಹಣ ಹಾಕಿ ಸಿನಿಮಾ ಮಾಡುವ ನಿರ್ಮಾಪಕರು, ಥಿಯೇಟರ್​ಗಳಲ್ಲಿ ರಿಲೀಸ್​ ಮಾಡಲೂ ಸಹ ವಾರದ ಬಾಡಿಗೆ ಕೊಡುತ್ತಾರೆ. ಅವರು ಹಾಕಿದ ಹಣ ವಾಪಸ್​ ಬರುತ್ತೋ? ಇಲ್ಲವೋ? ಗ್ಯಾರಂಟಿ ಇರುವುದಿಲ್ಲ. ಆದರೆ, ಪ್ರೇಕ್ಷಕರು ಮತ್ತು ಸಿನಿಮಾ ನಡುವಿನ ಮಧ್ಯವರ್ತಿಗಳಂತಿರುವ ಬುಕ್​ಮೈಶೋನಂತಹ ಟಿಕೆಟ್​ ಬುಕ್ಕಿಂಗ್​ ವೇದಿಕೆಗಳು ಮಾತ್ರ ಹಣ ಮಾಡುತ್ತಲೇ ಇವೆ ಎಂಬ ಮಾತು ಹಲವು ವರ್ಷಗಳಿಂದ ಕೇಳಿಬರುತ್ತಿವೆ. ಅದರ ಜತೆಗೆ ರೇಟಿಂಗ್​ ವ್ಯವಸ್ಥೆಯನ್ನು ಎಲ್ಲರ ಕೈಗೆಟುಕುವಂತೆ ಮಾಡಿ, ಪ್ಯಾನ್​ ವಾರ್​ಗಳಿಗೂ ಕಾರಣವಾಗಿವೆ ಎಂಬ ಆರೋಪಗಳಿವೆ. ಇದರ ನಡುವೆಯೇ ಆನ್​ಲೈನ್​ ಟಿಕೆಟ್​ ಬುಕ್ಕಿಂಗ್​ ವೇದಿಕೆಗಳಿಗೆ ಮೂಗುದಾರ ಹಾಕಲು ಕರ್ನಾಟಕ ಚಲನಚಿತ್ರ ವಾಣಿಜ್ಯ ಮಂಡಳಿ ಮುಂದಾಗಿದೆ.

ಇದೇ ಮಾರ್ಚ್​ 15ರಂದು ಟಿಕೆಟ್​ ಬುಕ್ಕಿಂಗ್​ ಆ್ಯಪ್​ಗಳಿಂದ ಕನ್ನಡ ಚಿತ್ರಗಳಿಗೆ ಆಗುತ್ತಿರುವ ಸಮಸ್ಯೆಗಳ ಬಗ್ಗೆ ವರದಿ ನೀಡಲು ನಿರ್ದೇಶಕ, ನಿರ್ಮಾಪಕ ದಯಾಳ್​ ಪದ್ಮನಾಭನ್​ ಅಧ್ಯಕ್ಷತೆಯಲ್ಲಿ ಉದಯ್​ ಮೆಹ್ತಾ, ಚಂದನ್​ ಸುರೇಶ್​, ಅವಿನಾಶ್​ ಶೆಟ್ಟಿ ಮತ್ತು ಜಗದೀಶ್​ ಒಳಗೊಂಡ ಸಮಿತಿ ರಚಿಸಲಾಗಿತ್ತು. "ಸಾಮಾನ್ಯವಾಗಿ ಸಿನಿಮಾ ಹಕ್ಕು ನಿರ್ಮಾಪಕರ ಬಳಿ ಇರುತ್ತದೆ. ಕೆಲವೊಮ್ಮೆ ವಿತರಕರು ಇಂತಿಷ್ಟು ಹಣ ಕೊಟ್ಟು ಸಿನಿಮಾ ಖರೀದಿ ಮಾಡುತ್ತಾರೆ. ಹಾಗೇ ಥಿಯೇಟರ್​ ಮಾಲೀಕರು ರೆವಿನ್ಯೂ ಶೇರಿಂಗ್​ನಲ್ಲಿ ಅಥವಾ ವಾರದ ಬಾಡಿಗೆಯಲ್ಲಿ ಸಿನಿಮಾ ಪ್ರದರ್ಶಿಸುತ್ತಿರುತ್ತಾರೆ. ಆಗ ಜನ ಖರೀದಿಸುವ ಟಿಕೆಟ್​ ದರದ ಇಂತಿಷ್ಟು ಹಣ ನಿರ್ಮಾಪಕರಿಗೆ ಅಥವಾ ವಿತರಕರಿಗೆ ಹೋಗಬೇಕು. ಆದರೆ, ಬುಕ್​ಮೈಶೋನಂತಹ ಆ್ಯಪ್​ಗಳು ಯಾರದೋ ಕಂಟೆಂಟ್​ನಿಂದ ತಾವು ಹಣ ಮಾಡಿಕೊಳ್ಳುತ್ತಿವೆ. ಇದರಿಂದ ನಿರ್ಮಾಪಕರಿಗೆ ನಷ್ಟವಾಗುತ್ತಿದೆ' ಎಂದು ಮಾಹಿತಿ ನೀಡುತ್ತಾರೆ ದಯಾಳ್​ ಪದ್ಮನಾಭನ್​.

ಫ್ಯಾನ್ಸ್​ವಾರ್​ಗೂ ವೇದಿಕೆಯಾಗಿವೆ...

ಬುಕ್​ಮೈಶೋನಲ್ಲಿ ಸಿನಿಮಾಗಳಿಗೆ ರೇಟಿಂಗ್​ ಕೊಡುವ ವ್ಯವಸ್ಥೆಯಿದೆ. "ಇದರಿಂದಲೂ ಸಮಸ್ಯೆಯಾಗುತ್ತಿದೆ' ಎನ್ನುವ ದಯಾಳ್​, "ಹಣ ಕೊಟ್ಟವರ ಸಿನಿಮಾಗಳ ರೇಟಿಂಗ್​ ಹೆಚ್ಚಿಸುವ ಏಜೆನ್ಸಿಗಳು ಹುಟ್ಟಿಕೊಂಡಿವೆ. ದರ್ಶನ್​ ಸಿನಿಮಾಗೆ ಸುದೀಪ್​ ಫ್ಯಾನ್ಸ್, ಸುದೀಪ್​ ಸಿನಿಮಾಗೆ ದರ್ಶನ್​ ಫ್ಯಾನ್ಸ್​ 10ಕ್ಕೆ 1 ರೇಟಿಂಗ್​ ಕೊಡುವ ಮೂಲಕ ಫ್ಯಾನ್ಸ್​ವಾರ್​ಗೂ ಕಾರಣವಾಗಿದೆ. ಹೀಗಾಗಿ ವಿಮರ್ಶಕರನ್ನು ಹೊರತುಪಡಿಸಿ ಬೇರೆಯವರು ರೇಟಿಂಗ್​ ನೀಡದಂತೆ ವ್ಯವಸ್ಥೆ ಮಾಡಬೇಕು ಎಂದೂ ಮನದಟ್ಟು ಮಾಡಲಿದ್ದೇವೆ' ಎಂದು ಪರಿಹಾರ ಸೂಚಿಸುತ್ತಾರೆ.

ಕಾನೂನು ಹೋರಾಟದ ಎಚ್ಚರಿಕೆ

ಮಂಗಳವಾರ ಬುಕ್​ಮೈಶೋ ಒಡೆತನ ಹೊಂದಿರುವ ಬಿಗ್​ಟ್ರೀ ಎಂಟರ್​ಟೇನ್ಮೆಂಟ್​ ಕಂಪನಿಗೆ ಸಮಿತಿಯು ಪತ್ರ ಬರೆದಿದೆ. "15 ದಿನಗಳ ಒಳಗೆ ಕಂಪನಿಯ ಪ್ರತಿನಿಧಿಗಳು ಸಮಿತಿಯ ಜತೆ ಸಭೆ ನಡೆಸಬೇಕು. ಇಲ್ಲದಿದ್ದರೆ ಯಾರದೋ ಕಂಟೆಂಟ್​ ಬಳಸಿ ಹಣ ಮಾಡುವ ಮೂಲಕ ಕಾಪಿರೈಟ್ಸ್​ ಕಾಯ್ದೆ ಉಲ್ಲಂಘನೆ ಮಾಡುತ್ತಿದ್ದಾರೆ ಎಂದು ಕಾನೂನು ಹೋರಾಟಕ್ಕೆ ಮುಂದಾಗಲಿದ್ದೇವೆ' ಎಂದು ಎಚ್ಚರಿಕೆ ನೀಡುತ್ತಾರೆ ದಯಾಳ್​ ಪದ್ಮನಾಭನ್​.