ಕನ್ನಡದಲ್ಲಿ ರಚಿತಾ ರಾಮ್​ ಮಾಡಲಿರುವ ಪಾತ್ರ ಬಾಲಿವುಡ್​ನಲ್ಲಿ ಜಾನ್ವಿ ಕಪೂರ್​ಗೆ

ಮುಂಬೈ: ಬಾಲಿವುಡ್ ನಟಿ ಜಾನ್ವಿ ಕಪೂರ್​ ಪ್ರಯೋಗಾತ್ಮಕ ಸಿನಿಮಾಗಳತ್ತ ಒಲವು ಮೂಡಿಸಿಕೊಂಡಿದ್ದಾರೆ. ಅದೇ ರೀತಿಯ ಸಿನಿಮಾಗಳನ್ನು ಅವರು ಆಯ್ದುಕೊಳ್ಳುತ್ತಿದ್ದಾರೆ. ಹೀಗಿರುವಾಗಲೇ ಇದೀಗ ಮತ್ತೊಂದು ವಿಶೇಷ ಸಿನಿಮಾದ ಮೂಲಕ ಜಾನ್ವಿ ಆಗಮಿಸಲಿದ್ದಾರೆ. ತಮಿಳಿನಲ್ಲಿ ಈಗಾಗಲೇ ತೆರೆಕಂಡು ಸೂಪರ್ ಹಿಟ್ ಆಗಿರುವ ಕೊಲಮಾವು ಕೋಕಿಲ ಸಿನಿಮಾವನ್ನು ಹಿಂದಿಯಲ್ಲಿ ರಿಮೇಕ್​ ಮಾಡುವ ಕೆಲಸ ಪ್ರಗತಿಯಲ್ಲಿದೆ. ಮೂಲ ಸಿನಿಮಾದಲ್ಲಿ ನಯನತಾರಾ ನಾಯಕಿಯಾಗಿ ನಟಿಸಿದ್ದಾರೆ.

ಇದನ್ನೂ ಓದಿ: ಎಂ.ಜಿ.ಶ್ರೀನಿವಾಸ್-ರಂಜನಿ ರಾಘವನ್ ‘ವೆಟರನ್’

2021ರಿಂದ ಶುರುವಾಗಲಿರುವ ಈ ಚಿತ್ರದಲ್ಲಿ ನಯನತಾರಾ ಮಾಡಿದ ಪಾತ್ರವನ್ನು ಜಾನ್ವಿ ಕಪೂರ್​ ಮಾಡಲಿದ್ದಾರೆ. ಮತ್ತೊಂದು ವಿಶೇಷ ಏನೆಂದರೆ, ಕನ್ನಡದಲ್ಲಿಯೂ ಕೊಲಮಾವು ಕೋಕಿಲ ಸಿನಿಮಾ ರಿಮೇಕ್​ ಆಗುತ್ತಿದೆ. ಇಲ್ಲಿ ಡಿಂಪಲ್​ ಕ್ವೀನ್ ರಚಿತಾ ರಾಮ್​ ನಾಯಕಿಯಾಗಿ ನಟಿಸಲಿದ್ದಾರೆ. ಈಗಾಗಲೇ ಪಂಕಜ ಕಸ್ತೂರಿ ಚಿತ್ರದ ಪೋಸ್ಟರ್ ಸಹ ಬಿಡುಗಡೆ ಆಗಿದ್ದು, ಜನವರಿಯಿಂದ ಶೂಟಿಂಗ್​ ಸಹ ಶುರುವಾಗಲಿದೆ. ಕನ್ನಡ ರಿಮೇಕ್​ಗೆ ಮಯೂರ ರಾಘವೇಂದ್ರ ನಿರ್ದೇಶನ ಮಾಡಲಿದ್ದಾರೆ.

ಇದನ್ನೂ ಓದಿ: ಟಾಮ್ ಆ್ಯಂಡ್ ಜೆರ್ರಿಗೆ ಸಿದ್ ಕಂಠ; ಕನ್ನಡಕ್ಕೆ ಬಂದ ತೆಲುಗು ಗಾಯಕ

ಅಂದಹಾಗೆ, ಹಿಂದಿಯಲ್ಲಿ ಸಿದ್ಧವಾಗಲಿರುವ ಈ ಚಿತ್ರವನ್ನು ಆನಂದ್ ಎಲ್​.ರಾಯ್​ ನಿರ್ಮಾಣ ಮಾಡಲಿದ್ದು, ಅಗ್ನಿಪತ್ ಸೇರಿ ಹಲವು ಸಿನಿಮಾಗಳಿಗೆ ಸಹಾಯಕ ನಿರ್ದೇಶಕರಾಗಿ ಕೆಲಸ ಮಾಡಿದ್ದ ಸಿದ್ದಾರ್ಥ್​ ಸೇನ್​ಗುಪ್ತಾ ನಿರ್ದೇಶನ ಮಾಡಲಿದ್ದಾರೆ. ಜನವರಿ 7ರಿಂದ ಚಿತ್ರದ ಶೂಟಿಂಗ್​ ಶುರುವಾಗಲಿದ್ದು, ಒಟ್ಟು 45 ದಿನಗಳಲ್ಲಿ ಚಿತ್ರೀಕರಣ ಮುಗಿಸಿಕೊಳ್ಳಲಿದೆ ತಂಡ. (ಏಜೆನ್ಸೀಸ್​)

https://www.vijayavani.net/ravichandran-to-play-a-warrior-for-the-first-time-in-kannadiga-movie/