ನಟ ಕಮಲ್​ ಸೆಲ್ಫ್​ ಕ್ವಾರಂಟೈನ್​ನಲ್ಲಿದ್ದಾರಾ?- ಆಳ್ವಾರ್​ಪೇಟೆ ಕಚೇರಿ ಗೇಟಿಗೇಕೆ ಅಂಟಿತು ಕ್ವಾರಂಟೈನ್​ ನೋಟಿಸ್​!

ಚನ್ನೈ: ಮಕ್ಕಳ್ ನೀದಿ ಮೈಯಂ ಪಕ್ಷದ ಮುಖ್ಯಸ್ಥ ನಟ ಕಮಲ್ ಹಾಸನ್ ತಮ್ಮ ಮನೆಯನ್ನೇ ಕ್ವಾರಂಟೈನ್ ಚಿಕಿತ್ಸೆಗೆ ಒದಗಿಸಲು ಸಿದ್ಧರಾಗಿ ಸುದ್ದಿಯಾಗಿದ್ದರು. ಇದೀಗ ಸ್ವತಃ ಸೆಲ್ಫ್​ ಕ್ವಾರಂಟೈನ್​ನಲ್ಲಿದ್ದಾರೆ ಎಂಬ ಸುದ್ದಿ ಶನಿವಾರ ಬೆಳಗ್ಗೆಯಿಂದ ಹರಿದಾಡ್ತಾ ಇದೆ. ಅದಕ್ಕೆ ಕಾರಣವಾಗಿದ್ದು ಕಮಲ್ ಅವರ ಆಳ್ವಾರ್ ಪೇಟೆ ಕಚೇರಿಯ ಗೇಟಿನ ಮೇಲೆ ಅಂಟಿದ್ದ ನೋಟಿಸ್​!

ಗ್ರೇಟರ್​ ಚೆನ್ನೈ ಕಾರ್ಪೊರೇಷನ್​ ಸಿಬ್ಬಂದಿ ಈ ನೋಟಿಸ್ ಅಂಟಿಸಿದ್ದರು. ಇದರ ಪ್ರಕಾರ ಮಾರ್ಚ್ 10ರಿಂದ ಏಪ್ರಿಲ್ ನಾಲ್ಕರ ತನಕ ಕ್ವಾರಂಟೈನ್​ನಲ್ಲಿ ಇರುವುದಾಗಿ ಮಾಹಿತಿ ಲಭ್ಯವಾಗಿದೆ. ಈ ಸುದ್ದಿ ಕೆಲವೇ ನಿಮಿಷಗಳಲ್ಲಿ ಎಲ್ಲೆಡೆ ವೈರಲ್ ಆಗಿದೆ. ಅಲ್ಲದೆ, ಕಮಲ್ ಹಾಸನ್ ಅವರು ಸೆಲ್ಫ್​ ಕ್ವಾರಂಟೈನ್​ನಲ್ಲಿ ಇದ್ದಾರಾ ಅಥವಾ ಇಲ್ಲವೇ ಎಂಬ ಕುರಿತ ಚರ್ಚೆಗಳೂ ಆರಂಭವಾಗಿದೆ.

ಇಲೆಕ್ಟ್ರಾನಿಕ್ ಮಾಧ್ಯಮಗಳಲ್ಲಿ ಈ ವಿಷಯ ಸುದ್ದಿಯಾಗುತ್ತಿದ್ದಂತೆ ಎಚ್ಚೆತ್ತ ಕಾರ್ಪೊರೇಷನ್​, ಕೂಡಲೇ ಆ ನೋಟಿಸ್​ ತೆಗೆದು ಹಾಕುವಂತೆ ಸಿಬ್ಬಂದಿಗೆ ಸೂಚಿಸಿದೆ. ಆ ಕ್ಷಣವೇ ಸ್ಥಳಕ್ಕೆ ತಲುಪಿದ ಸಿಬ್ಬಂದಿ ಆ ನೋಟಿಸನ್ನು ತೆಗೆದು ಹಾಕಿದ್ದಾರೆ.

ಈ ವಿಚಾರವಾಗಿ ಪಕ್ಷದ ವಕ್ತಾರ ಮುರಳಿ ಅಬ್ಬಾಸ್ ಹೇಳಿಕೆ ನೀಡಿದ್ದು, ನಮಗೆ ಆ ಪೋಸ್ಟರ್ ನೋಡಿ ಶಾಕ್ ಆಗಿತ್ತು. ಕಮಲ್​ ಯಾವುದೇ ವಿದೇಶ ಸಂಚಾರ ಅಥವಾ ಟ್ರಾವೆಲ್​ ಹಿಸ್ಟರಿ ಹೊಂದಿಲ್ಲ. ಇಂಡಿಯನ್ 2 ಸಿನಿಮಾ ಸೆಟ್​ನಲ್ಲಾದ ಅವಘಡದ ಬಳಿಕ ಅಲ್ಲಿ ಗಾಯಗೊಂಡವರನ್ನು ಕಾಣಲು ಹೋಗಿದ್ದು, ಪೊಲೀಸ್ ವಿಚಾರಣೆಗೆ ಹಾಜರಾಗಿದ್ದು ಬಿಟ್ಟರೆ ಬೇರೆಲ್ಲೂ ಹೋಗಿಲ್ಲ ಎಂದು ವಿವರಿಸಿದ್ದಾರೆ.

ಎಲ್ಲದಕ್ಕೂ ಮಿಗಿಲಾಗಿ ಆಳ್ವಾರ್​ಪೇಟೆಯಲ್ಲಿರುವುದು ಕಮಲ್ ಅವರ ನಿವಾಸವಲ್ಲ, ಅದು ಪಕ್ಷದ ಕಚೇರಿ. ಕಾರ್ಪೊರೇಷನ್ ಕಚೇರಿಗೆ ತಪ್ಪು ಮಾಹಿತಿ ನೀಡಿದವರಾರರು ಎಂಬ ಸಂದೇಹ ಕಾಡುತ್ತಿದೆ. ಪರಿಶೀಲನೆ ನಡೆಸದೇ ಏಕಾಕಿಯಾಗಿ ಪೋಸ್ಟರ್ ಅಂಟಿಸಿದ ಕಾರ್ಪೊರೇಷನ್ ಕ್ರಮವೂ ಸರಿಯಲ್ಲ ಎಂದು ಅವರು ಹೇಳಿದರು.  (ಏಜೆನ್ಸೀಸ್)

https://www.vijayavani.net/kamal-haasan-offers-to-convert-his-residence-into-hospital-to-treat-coronavirus-patients/