ಪುನೀತ್ ಈ ವಿಷಯದಲ್ಲಿ ತಂದೆಗೆ ತಕ್ಕ ಮಗ. ಡಾ. ರಾಜಕುಮಾರ್ ಕೊನೆಯವರೆಗೂ ಹೇಗೆ ಕನ್ನಡವನ್ನೇ ಉಸಿರಾಡಿದರೋ, ಕನ್ನಡ ಚಿತ್ರಗಳಲ್ಲೇ ನಟಿಸಿದರೋ, ಅದೇ ದಾರಿಯಲ್ಲಿ ಪುನೀತ್ ಸಹ ಸಾಗಿದರು. ಪುನೀತ್ ಇದುವರೆಗೂ 30ಕ್ಕೂ ಹೆಚ್ಚು ಚಿತ್ರಗಳಲ್ಲಿ ನಟಿಸಿದ್ದಾರೆ. ಈ ಪೈಕಿ ಕೆಲವು ಚಿತ್ರಗಳು ಬೇರೆ ಭಾಷೆಗಳಿಗೆ ಡಬ್ ಆಗಿದ್ದು ಬಿಟ್ಟರೆ, ಅವರೆಂದೂ ಬೇರೆ ಭಾಷೆಗಳಿಗೆ ಹೋದವರಲ್ಲ. ಅವರಿಗೆ ಬೇರೆ ಚಿತ್ರರಂಗಗಳಲ್ಲಿ ಒಳ್ಳೆಯ ಪರಿಚಯವಿತ್ತು, ಅಲ್ಲಿನ ಸ್ಟಾರ್ ನಟರ ಒಡನಾಟವಿತ್ತು, ಅವರು ಒಪ್ಪಿದ್ದರೆ ಅವಕಾಶಗಳು ಸಿಗುತ್ತಿತ್ತು. ಆದರೆ, ಪುನೀತ್ ಮಾತ್ರ ಆ ಬಗ್ಗೆ ಎಂದೂ ಯೋಚಿಸಿದವರಲ್ಲ. ಇನ್ನು, ಕನ್ನಡದ ವಿಷಯವಾಗಿ ಪುನೀತ್ ಸುಮ್ಮನೆ ಪ್ರಚಾರ ತೆಗೆದುಕೊಂಡವರಲ್ಲ. ಸನ್ನಿವೇಶ ಸಂದರ್ಭಕ್ಕೆ ತಕ್ಕಂತೆ ಕನ್ನಡದ ಕುರಿತಾದ ನಾಡು&ನುಡಿಯ ಕುರಿತಾದ ಸಂಭಾಷಣೆಗಳನ್ನು ಕೆಲವು ಚಿತ್ರಗಳಲ್ಲಿ ಹೇಳಿದ್ದು ಬಿಟ್ಟರೆ, ಮಿಕ್ಕಂತೆ ಪ್ರಚಾರಕ್ಕೆಂದು ಎಂದೂ ಅವರು ಕನ್ನಡವನ್ನು ಬಳಸಿಕೊಳ್ಳಲಿಲ್ಲ. ಇನ್ನು ಹಾಡುಗಳಲ್ಲೂ ಅಷ್ಟೇ. ಅವರ ಚಿತ್ರಗಳಲ್ಲಿ ಕನ್ನಡದ ಕುರಿತಾದ ಹಾಡು ಎಂದು ಸಿಗುವುದು ಬಹಳ ಕಡಿಮೆ.
