ಮತ್ತೆ ಬಂದ್ರು ಹಂಬಲ್ ಪೊಲಿಟಿಷಿಯನ್

ಬೆಂಗಳೂರು: ‘ಹಂಬಲ್ ಪೊಲಿಟಿಷಿಯನ್ ನೊಗ್​ರಾಜ್’ ಚಿತ್ರದ ಮೂಲಕ ಹೊಟ್ಟೆ ಹುಣ್ಣಾಗುವಂತೆ ನಗಿಸಿದ್ದ ದಾನಿಶ್ ಸೇಠ್, ಸದ್ಯ ನೊಗ್​ರಾಜನ ಗುಂಗಲ್ಲೇ ಇದ್ದಾರೆ. ಅಂದರೆ, ಇತ್ತೀಚೆಗಷ್ಟೇ ‘ಹಂಬಲ್ ಪೊಲಿಟಿಷಿಯನ್ ನೊಗ್​ರಾಜ್’ ಸಿನಿಮಾದ ಮುಂದುವರಿದ ಭಾಗವೆಂಬಂತೆ ವೆಬ್ ಸೀರಿಸ್ ಮಾಡಿಕೊಳ್ಳುವುದಾಗಿ ತಂಡ ಹೇಳಿಕೊಂಡಿತ್ತು. ಅದರಂತೆ ಆ ಕಾರ್ಯಕ್ಕೆ ಚಾಲನೆ ಸಿಕ್ಕಿದೆ. ದೇವಸ್ಥಾನವೊಂದರಲ್ಲಿ ಸರಳವಾಗಿ ಮುಹೂರ್ತ ಮುಗಿಸಿಕೊಂಡು, ಶೂಟಿಂಗ್​ಗೂ ಚಾಲನೆ ನೀಡಿದ್ದಾರೆ ನಿರ್ದೇಶಕ ಸಾದ್ ಖಾನ್.

‘...ನೊಗ್​ರಾಜ್’ಗೆ ಆಕ್ಷನ್-ಕಟ್ ಹೇಳಿದ್ದ ಸಾದ್ ಅವರೇ ಈ ವೆಬ್ ಸೀರಿಸ್ ನಿರ್ದೇಶಕರು. 10 ಎಪಿಸೋಡ್​ನ ಈ ವೆಬ್ ಸೀರಿಸ್ 38 ದಿನಗಳಲ್ಲಿ ಚಿತ್ರೀಕರಿಸುವ ಯೋಜನೆ ಇದೆ. ಪ್ರತಿ ಎಪಿಸೋಡ್ ಕನಿಷ್ಠ 21 ನಿಮಿಷಗಳದ್ದಾಗಿರುತ್ತದೆ. ಮೈಸೂರಿನಲ್ಲಿ ಚಿತ್ರೀಕರಣ ಮಾಡಲಾಗುತ್ತಿದೆ’ ಎಂದು ಮಾಹಿತಿ ಹಂಚಿಕೊಂಡರು ನಟ ದಾನಿಶ್ ಸೇಠ್. ‘..ನೊಗ್​ರಾಜ್’ ಚಿತ್ರಕ್ಕೆ ನೆಟ್​ಫ್ಲಿಕ್ಸ್, ಅಮೆಜಾನ್ ಪ್ರೖೆಮ್ ಮೂಲಕ ಉತ್ತಮ ಪ್ರತಿಕ್ರಿಯೆ ಸಿಕ್ಕಿತ್ತು. ಇಂದಿನ ಯುವಪೀಳಿಗೆ ಚಿತ್ರಮಂದಿರಕ್ಕೆ ಬಂದು ಸಿನಿಮಾ ನೋಡುವುದು ಕಡಿಮೆ. ಆನ್​ಲೈನ್​ನಲ್ಲೇ ಹೆಚ್ಚು ಸಕ್ರಿಯರಾಗಿರುತ್ತಾರೆ. ಹೀಗಾಗಿ ಇವರನ್ನು ಗಮನದಲ್ಲಿಟ್ಟುಕೊಂಡು ವೆಬ್ ಸೀರಿಸ್ ಮಾಡುತ್ತಿದ್ದೇವೆ. ಅಲ್ಲದೆ, ಸಿನಿಮಾ ಅವಧಿ ಕಡಿಮೆ ಆಗಿದ್ದರಿಂದ ಪಾತ್ರವನ್ನು ಹೆಚ್ಚು ಪ್ರಯೋಗಕ್ಕೆ ಒಳಪಡಿಸುವ ಅವಕಾಶ ಇರುವುದಿಲ್ಲ. ಹೀಗಾಗಿ ವೆಬ್ ಸೀರಿಸ್​ಗೆ ಉತ್ಸುಕತೆ ತೋರಿದ್ದೇವೆ’ ಎಂಬುದು ದಾನಿಶ್ ಮಾತು. ಮುಂಬೈನ ಅಪ್ಲಾಜ್ ಎಂಟರ್​ಟೇನ್​ವೆುಂಟ್ ಕಂಪನಿಯು ಈ ವೆಬ್ ಸೀರಿಸ್ ನಿರ್ಮಾಣ ಮಾಡುತ್ತಿದ್ದು, ಈ ಹಿಂದೆ ‘ಮೈಂಡ್ ಮಲ್ಹೋತ್ರಾ’, ‘ದಿ ಆಫೀಸ್’ ವೆಬ್ ಸೀರಿಸ್​ಗಳಿಗೂ ಇದು ಬಂಡವಾಳ ಹೂಡಿತ್ತು.