ಬೆಂಗಳೂರು: ‘ಕೆಜಿಎಫ್‘ ಸರಣಿ, ‘ಕಾಂತಾರ’ ಹಾಗೂ ‘ಬಘೀರ’ ಸಿನಿಮಾಗಳನ್ನು ನಿರ್ಮಿಸಿರುವ ಹೊಂಬಾಳೆ ಫಿಲಂಸ್ ಸಂಸ್ಥೆಯು ಗಡಿ ದಾಟಿ, ಪರಭಾಷೆಯ ಚಿತ್ರಗಳಿಗೆ ಬಂಡವಾಳ ಹೂಡುತ್ತಿರುವ ವಿಚಾರ ಗೊತ್ತೇ ಇದೆ. ಈಗಾಗಲೇ ಮಲಯಾಳಂನ ‘ಧೂಮಂ’, ತೆಲುಗಿನ ‘ಸಲಾರ್: 1 ಸೀಸ್ಫೈರ್’, ತಮಿಳಿನ ‘ರಘು ತಾತ’ ಚಿತ್ರಗಳನ್ನು ನಿರ್ಮಿಸಿ ಸೈ ಎನಿಸಿಕೊಂಡಿದೆ. ಹಾಗೆಯೇ ಪ್ರಭಾಸ್ನ ಮುಂದಿನ ಮೂರು ಸಿನಿಮಾಗಳಿಗೆ ಈಗಾಗಲೇ ಅಡ್ವಾನ್ಸ್ ಬುಕ್ ಮಾಡಿಕೊಂಡಿದೆ. ಕನ್ನಡ, ತೆಲುಗು, ತಮಿಳು ಹಾಗೂ ಮಲಯಾಳಂನಲ್ಲಿ ಸದ್ದು ಮಾಡುತ್ತಿರುವ ಈ ಸಂಸ್ಥೆಯು ಇದೀಗ ಮತ್ತೊಂದು ಹೆಜ್ಜೆ ಮುಂದೆ ಇಟ್ಟಿದ್ದು, ಬಾಲಿವುಡ್ ಎಂಟ್ರಿ ಕೊಟ್ಟಿದೆ. ಹೌದು, ಹೊಂಬಾಳೆ ನಿರ್ಮಾಣ ಸಂಸ್ಥೆಯು ನಟ ಹೃತಿಕ್ ರೋಷನ್ ಜತೆ ಸಿನಿಮಾ ಘೋಷಿಸಿದೆ. ಇತ್ತೀಚೆಗೆಷ್ಟೆ ನಿರ್ಮಾಪಕ ವಿಜಯ್ ಕಿರಗಂದೂರು, ‘ಹೊಂಬಾಳೆ ಸಂಸ್ಥೆಯು ಸ್ಫೂರ್ತಿಯುತ ಹಾಗೂ ಗಡಿಗಳನ್ನು ಮೀರಿ ಕಥೆಗಳನ್ನು ಹೇಳಲು ಇಷ್ಟಪಡುತ್ತದೆ. ಅದರಲ್ಲಿ ಸಂಸ್ಥೆಯು ಹೃತಿಕ್ ರೋಷನ್ ಜತೆ ಮಾಡಿಕೊಂಡಿರುವ ಒಡಂಬಡಿಕೆಯು ಸಾಕಾರಗೊಳಿಸಲು ಒಂದು ಹೆಜ್ಜೆ ಮುಂದಿದೆ. ಒಂದು ಮೆಗಾ ಸಿನಿಮಾ ತೆರೆಗೆ ತರಲು ನಾವು ಮುಂದಾಗುತ್ತಿದ್ದೇವೆ. ಪ್ರೇಕ್ಷಕರಿಗೆ ಶಕ್ತಿಯುತ ಹಾಗೂ ಕಾಲಾತೀತ ಅನುಭವ ನೀಡಲು ಸಿದ್ಧರಾಗಿದ್ದೇವೆ’ ಎಂದು ಹೇಳಿಕೊಂಡಿದ್ದಾರೆ. ಈ ಹೊಸ ಚಿತ್ರದ ಟೈಟಲ್ ಹಾಗೂ ನಿರ್ದೇಶಕರು, ತಾಂತ್ರಿಕ ವರ್ಗ ಸೇರಿ ಹಲವು ವಿಚಾರಗಳು ಸದ್ಯದಲ್ಲೇ ಘೋಷಣೆಯಾಗಲಿವೆ.
