‘ಪಲಾರ್’ ಖ್ಯಾತಿಯ ಉಮಾ ವೈ.ಜಿ. ಮೂಲತಃ ಕೋಲಾರದ ಬಂಗಾರಪೇಟೆಯವರು. ಸಿನಿಮಾದ ಜತೆ ಜತೆಗೆ ರಂಗಭೂಮಿಯಲ್ಲಿ ಹೆಜ್ಜೆ ಹಾಕುತ್ತಿರುವ ಅವರು, ‘ಹೆಬ್ಬುಲಿ ಕಟ್’ ಭಾಗವಾಗಿದ್ದಾರೆ. ‘‘ಬದುಕು ಕಮ್ಯುನಿಟಿ’ ವತಿಯಿಂದ ಆಯೋಜಿಸಿದ್ದ ಕಾರ್ಯಕ್ರಮದಲ್ಲಿ ನಾನು ಭಾಗವಹಿಸಿದ್ದೆ. ಆ ಕಾರ್ಯಕ್ರಮಕ್ಕೆ ಬಂದಿದ್ದ ಭೀಮರಾವ್, ನನ್ನ ಹಿಂದಿನ ಸಿನಿಮಾಗಳ ಬಗ್ಗೆ ಮೆಚ್ಚುಗೆ ವ್ಯಕ್ತಪಡಿಸಿದರು. ಹಾಗೆಯೇ, ಮುಂದುವರಿದು, ‘ಹೆಬ್ಬುಲಿ ಕಟ್’ ಬಗ್ಗೆ ಪ್ರಸ್ತಾಪಿಸಿ, ಈ ಕಥೆಯಲ್ಲಿ ಒಂದು ಪಾತ್ರ ಮಾಡಬೇಕು ಎಂದು ನೀಡಿದ ಆಹ್ವಾನಕ್ಕೆ ತಕ್ಷಣ ಒಪ್ಪಿಕೊಂಡೆ. ನಾನು ಈ ಚಿತ್ರದಲ್ಲಿ ಉತ್ತರ ಕರ್ನಾಟಕದ ತಾಯಂದಿರನ್ನು ಪ್ರತಿನಿಧಿಸುವ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದೇನೆ. ಮಗ ಯಾವತ್ತಿಗೂ ಅಚ್ಚುಕಟ್ಟಾಗಿ, ಶಿಸ್ತಿನಿಂದ ಇರಬೇಕು ಎಂದು ಬಯಸುವವಳು. ಟಿಪಿಕಲ್ ಜತೆಗೆ ಸ್ವಲ್ಪ ರೆಬೆಲಿಸ್ಟ್ ಎನ್ನಬಹುದು. ಪಾತ್ರದಲ್ಲಿ ಹೋರಾಟವು ಇದೆ. ಇನ್ನು ನಾನು ಕೋಲಾರದವಳು. ಈ ಕಥೆಯಲ್ಲಿ ಪಕ್ಕಾ ರಾಯಚೂರು ಭಾಷೆ. ನಾನು ರಂಗ ಸಂಚಾರ ಮಾಡಿರುವ ಕಾರಣ, ಎಲ್ಲ ರೀತಿಯ ಭಾಷೆಗಳನ್ನೂ ಕೇಳಿದ್ದೇನೆ. ಹಾಗಾಗಿ, ಆ ಭಾಗದ ಶೈಲಿಗೆ ಬೇಗ ಒಗ್ಗಿಕೊಂಡೆ. ಹೀಗಾಗಿ ನಾನೇ ಡಬ್ಬಿಂಗ್ ಮಾಡಿದ್ದೇನೆ. ನನಗೆ ಈ ಸಿನಿಮಾ ಮೂಲಕ ಉತ್ತರ ಕರ್ನಾಟಕದ ಜನರ ಜೀವನ ಹಾಗೂ ಸಹಬಾಳ್ವೆಯನ್ನು ನೋಡುವ ಅವಕಾಶ ದೊರೆಯಿತು. ಅಲ್ಲಿ ಹಸಿರು ಇಲ್ಲ ಅಷ್ಟೇ, ಆದರೆ, ಎಲ್ಲರ ಮನಸ್ಸಿನಲ್ಲಿ ಸಹಬಾಳ್ವೆ, ಸೌಹಾರ್ದತೆ ಹಸಿರಾಗಿದೆ. ನಾವು ಚಂದ್ರಬಂಡದಲ್ಲಿ ಸೆಟ್ ಹಾಕಿ ಚಿತ್ರೀಕರಣ ಮಾಡಿದೆವು. ಅಲ್ಲಿನ ಜನ ನಮ್ಮನ್ನು ಉಪಚರಿಸಿದ ರೀತಿಗೆ ಎಷ್ಟು ಧನ್ಯವಾದ ಹೇಳಿದರೂ ಸಾಲದು’ ಎಂದು ಅನುಭವಗಳನ್ನು ಹಂಚಿಕೊಂಡರು.
