ಬೆಂಗಳೂರು: ಕನ್ನಡದ ಕಲಾವಿದರು ಬೇರೆ ಭಾಷೆಗಳಲ್ಲಿ ನಟಿಸುವುದು, ಪರಭಾಷಾ ಕಲಾವಿದರು ಕನ್ನಡದಲ್ಲಿ ನಟಿಸುವುದು ಸಾಮಾನ್ಯ. ಆದರೆ, ಭಾಷೆಯೇ ಗೊತ್ತಿಲ್ಲದಿದ್ದರೂ, ಕನ್ನಡಿಗನೊಬ್ಬ ಪರಭಾಷಾ ಚಿತ್ರದ ಮೂಲಕ ಡೆಬ್ಯೂ ಮಾಡುವುದು ಕಷ್ಟಸಾಧ್ಯ. ಹಾಗೇ ಪರಭಾಷಾ ಕಲಾವಿದರೂ ಸಹ ಕನ್ನಡ ಚಿತ್ರರಂಗದ ಮೂಲಕ ಕರಿಯರ್ ಪ್ರಾರಂಭಿಸುವುದು ಕೂಡ. ಆದರೆ, ಕೇರಳ ಮೂಲದ ಕಲಾವಿದನೊಬ್ಬ ಕನ್ನಡದ ಮೂಲಕವೇ ಬಣ್ಣದ ಲೋಕಕ್ಕೆ ಡೆಬ್ಯೂ ಮಾಡಿ, ಮೊದಲ ಸಿನಿಮಾದಲ್ಲಿ ಭರವಸೆ ಮೂಡಿಸಿದ್ದಾರೆ. ಇದೀಗ, ಇಲ್ಲಿಯೇ ನೆಲೆಯೂರುವ ಅತ್ಮವಿಶ್ವಾಸದಲ್ಲಿದ್ದಾರೆ. ಹೆಸರು ಫವಾಜ್ ಅಶ್ರಫ್. ಕಳೆದ ಜ.31ರಂದು ಬಿಡುಗಡೆಯಾಗಿದ್ದ ಪಾರು ಪಾರ್ವತಿ’ ಚಿತ್ರದಲ್ಲಿ ಹಾಫ್ ಕನ್ನಡಿಗನಾಗಿ ಕಾಣಿಸಿಕೊಂಡಿದ್ದರು. ಅವರ ಮ್ಯಾನರಿಸಂ, ತೊದಲು ಕನ್ನಡ, ನಟನೆಗೆ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗಿತ್ತು. ಈ ಬಗ್ಗೆ ಅಶ್ರಫ್, ‘ಸೌದಿಯಿಂದ ಬಂದ ಬಳಿಕ ನಾನು ರೀಲ್ಸ್, ಟಿಕ್ಟಾಕ್ ಮಾಡತೊಡಗಿದೆ. ಅವುಗಳನ್ನು ನೋಡಿ ‘ಪಾರು ಪಾರ್ವತಿ’ ತಂಡ ಸಿನಿಮಾದಲ್ಲಿ ಅವಕಾಶ ನೀಡಿತು. ಮೊದಲು ನನಗೆ ಕನ್ನಡ ಬರುತ್ತಿರಲಿಲ್ಲ. ಇಡೀ ತಂಡ ಈಗ ನನಗೆ ಕನ್ನಡ ಕಲಿಸಿದೆ. ಚಿತ್ರದಲ್ಲಿ ನಾನು ಹ್ಾ ಕನ್ನಡಿಗ. ಈಗ ನಾನು ಪೂರ್ಣ ಕನ್ನಡಿಗನಾಗುತ್ತಿದ್ದೇನೆ. ‘ಪಾರು ಪಾರ್ವತಿ’ ಚಿತ್ರದ ನನ್ನ ಪಾತ್ರಕ್ಕೆ ಒಳ್ಳೆಯ ಪ್ರತಿಕ್ರಿಯೆ ಬಂದಿವೆ. ಹೀಗಾಗಿ ಕನ್ನಡ ಪ್ರೇಕ್ಷಕರಿಗೆ, ತಂಡಕ್ಕೆ ಅಭಾರಿ’ ಎಂದು ಮಾಹಿತಿ ನೀಡುತ್ತಾರೆ.
