‘ಮಿಸ್ ಶೆಟ್ಟಿ, ಮಿಸ್ಟರ್ ಪೊಲಿಶೆಟ್ಟಿ’ ಚಿತ್ರದ ಬಳಿಕ ಅನುಷ್ಕಾ ಶೆಟ್ಟಿ ಅಭಿನಯಿಸುತ್ತಿರುವ ಸಿನಿಮಾ ‘ಘಾಟಿ’. ಹೆಚ್ಚು ಮಾಸ್ ಅಂಶಗಳ ಜತೆಗೆ ವಿಭಿನ್ನ ಕಥಾ ಹಂದರ ಇರುವ ಕಾರಣ ಈ ಚಿತ್ರವು ಹೆಚ್ಚು ಕುತೂಹಲ ಮೂಡಿಸಿದೆ. ಹಾಗೆಯೇ, ಎರಡು ವರ್ಷಗಳ ಬಳಿಕ ನಟಿ ತೆರೆ ಮೇಲೆ ಕಾಣಿಸಿಕೊಳ್ಳುತ್ತಿರುವುದಿರಿಂದ ಈ ಸಿನಿಮಾ ಹೆಚ್ಚು ಭರವಸೆ ಮೂಡಿಸಿದೆ. ಈ ಮೊದಲು ಇದೇ ಜುಲೈ 11ಕ್ಕೆ ಸಿನಿಮಾ ರಿಲೀಸ್ ಮಾಡುವುದಾಗಿ ಚಿತ್ರತಂಡ ಘೋಷಿಸಿತ್ತು. ಅಂದುಕೊಂಡಂತಾದರೆ, ಇದೇ ವಾರ ಸಿನಿಮಾ ಬಿಡುಗಡೆಯಾಗುವುದಿತ್ತು. ಆದರೆ, ಅನಿವಾರ್ಯ ಕಾರಣಗಳಿಂದಾಗಿ ಈ ವಾರ ಸಿನಿಮಾ ಬರುತ್ತಿಲ್ಲವಂತೆ. ಚಿತ್ರದ ವಿಎಫ್ಎಕ್ಸ್ ಕಾರ್ಯಗಳು ಬಾಕಿ ಇರುವುದರಿಂದಾಗಿ ಈ ಮೊದಲು ನಿಗದಿಪಡಿಸಿದ ದಿನಾಂಕಕ್ಕೆ ಚಿತ್ರವನ್ನು ರಿಲೀಸ್ ಮಾಡಲು ಆಗುತ್ತಿಲ್ಲ ಎಂದು ತಂಡ ಹೇಳಿಕೊಂಡಿದೆ.
