ಪ್ರಜ್ವಲ್ ದೇವರಾಜ್ ದಿನಕ್ಕೆ 18 ಗಂಟೆ ನಿದ್ರಿಸುವ ಕುಂಭಕರ್ಣನಂಥ ಪಾತ್ರದಲ್ಲಿ ಅಭಿನಯಿಸಿರುವ ‘ಜಂಟಲ್ಮನ್’ ಸಿನಿಮಾದ ‘ಎದ್ದೇಳೋ ಭಾರತೀಯ..’ ಎಂಬ ಹಾಡನ್ನು ಯೋಗರಾಜ್ ಭಟ್ ಬರೆದಿದ್ದು, ಅದನ್ನು ಅಜನೀಶ್ ಲೋಕನಾಥ್ ಸಂಗೀತ ಸಂಯೋಜನೆಯಲ್ಲಿ ಅಂಥೋನಿ ದಾಸನ್ ಹಾಡಿದ್ದಾರೆ. ಈ ಲಿರಿಕಲ್ ಸಾಂಗ್ ಜ. 29ರಂದು ಬಿಡುಗಡೆ ಆಗಿದೆ. ಕೆ.ಪಿ. ಶ್ರೀಕಾಂತ್ ನಿರ್ಮಾಣ, ದುನಿಯಾ ಸೂರಿ ನಿರ್ದೇಶನ, ಶಿವರಾಜ್ ಕುಮಾರ್ ಅಭಿನಯದ ‘ಟಗರು’ ಚಿತ್ರದ ‘ಟಗರು ಬಂತು ಟಗರು’ ಗೀತೆ ಖ್ಯಾತಿಯ ಅಂಥೋನಿ, ಬಳಿಕ ದುನಿಯಾ ವಿಜಯ್ ನಿರ್ದೇಶನದ ‘ಸಲಗ’ ಚಿತ್ರದ ‘ಸೂರಿ ಅಣ್ಣ’ ಗೀತೆಯನ್ನು ಹಾಡಿದ್ದು, ಅದೂ ಭರ್ಜರಿ ಹಿಟ್ ಆಗಿದೆ. ಕೆಲವೇ ದಿನಗಳ ಹಿಂದೆ ಬಿಡುಗಡೆ ಆಗಿರುವ ಆ ಹಾಡು 10 ಲಕ್ಷಕ್ಕೂ ಅಧಿಕ ವೀಕ್ಷಣೆಯನ್ನು ಕಂಡಿದೆ. ಇದೀಗ ಅವರು ಹಾಡಿರುವ ಜಂಟಲ್ವುನ್ ಚಿತ್ರದ ಗೀತೆಗೂ ಒಳ್ಳೆಯ ಪ್ರತಿಕ್ರಿಯೆ ಸಿಗಲಾರಂಭಿಸಿದೆ.
