ಬೆಂಗಳೂರು: ‘ಕೃಷ್ಣಂ ಪ್ರಣಯ ಸಖಿ’ ಯಶಸ್ಸಿನ ಬಳಿಕ ನಟ ಗಣೇಶ್, ‘ಯುವರ್ಸ್ ಸಿನ್ಸಿಯರ್ಲಿ ರಾಮ್’ ಹಾಗೂ ‘ಪಿನಾಕ’ ಚಿತ್ರದಲ್ಲಿ ಬಿಜಿಯಾಗಿದ್ದಾರೆ. ಈ ಮಧ್ಯೆಯೇ ಅವರು ಅರಸು ಅಂತಾರೆ ನಿರ್ದೇಶನದ ಹೊಸ ಸಿನಿಮಾಕ್ಕೆ ಸಹಿ ಹಾಕಿದ್ದರು. ‘ಲವ್ ಇನ್ ಮಂಡ್ಯ’ ಚಿತ್ರ ತೆರೆಕಂಡು 11 ವರ್ಷಗಳ ಬಳಿಕ ಅರಸು ಅಂತಾರೆ ನಿರ್ದೇಶಿಸುತ್ತಿರುವ ಚಿತ್ರ ಇದಾಗಿದ್ದು, ಭಾನುವಾರ ರಾಮನವಮಿ ದಿನದಂದು ಚಿತ್ರಕ್ಕೆ ಮುಹೂರ್ತ ನೆರವೇರಿಸಲಾಯಿತು. ಈ ಸಿನಿಮಾದಲ್ಲಿ ನಟ ಗಣೇಶ್ಗೆ ‘ಹನುಮಾನ್’ ನಟಿ ಅಮೃತಾ ಅಯ್ಯರ್ ಜೋಡಿಯಾಗಿದ್ದಾರೆ. ರಂಗಾಯಣ ರಘು, ಕಾಕ್ರೋಚ್ ಸುಧಿ, ರಮೇಶ್ ಇಂದಿರ, ರವಿಶಂಕರ್ ಗೌಡ ಕಲಾಬಳಗದಲ್ಲಿದ್ದಾರೆ. ಚಿತ್ರಕ್ಕೆ ಮುಹೂರ್ತವಷ್ಟೇ ನೆರವೇರಿಸಲಾಗಿದ್ದು, ಮುಂದಿನ ದಿನಗಳಲ್ಲಿ ಟೈಟಲ್ ಅನೌನ್ಸ್ ಮಾಡಲಿದ್ದಾರಂತೆ. ನಿರ್ದೇಶಕ ಅರಸು ಅಂತಾರೆ, ‘ಹತ್ತು ವರ್ಷಗಳ ಬಳಿಕ ನಾನು ನಿರ್ದೇಶನಕ್ಕೆ ಮರಳುತ್ತಿದ್ದೇನೆ, ತುಂಬಾ ದಿನಗಳ ಕಾಲ ಸಮಯ ತೆಗೆದುಕೊಂಡೆ ಎಂದು ಅನಿಸಬಹುದು. ಆದರೆ, ನಾನು ಅಂದುಕೊಂಡಂತೆ ಕೆಲಸ ಮಾಡಬೇಕು ಎಂದುಕೊಂಡವನು ಹಾಗಾಗಿ ಸ್ವಲ್ಪ ತಡವಾಯಿತು. ಗಣೇಶ್ ಸರ್ಗಾಗಿಯೇ ಈ ಕಥೆ ಬರೆದಿದ್ದು, ಸದ್ಯದಲ್ಲಿಯೇ ಟೀಸರ್ ಮೂಲಕ ಟೈಟಲ್ ಘೋಷಣೆ ಮಾಡಲಿದ್ದೇವೆ’ ಎಂದು ಮಾಹಿತಿ ನೀಡಿದರು. ಚಿತ್ರಕ್ಕೆ ಸುಜ್ಞಾನ್ ಛಾಯಾಗ್ರಹಣ ಇರಲಿದೆ.
