ಚಿತ್ರರಂಗ ಎಂದರೆ ಅದರಲ್ಲಿ ಕಲಾವಿದರು ತೆರೆಯ ಮೇಲೆ, ತಂತ್ರಜ್ಞರು ತೆರೆಯ ಹಿಂದೆ ಕೆಲಸ ಮಾಡುತ್ತಾರೆ ಅಂತಷ್ಟೇ ಸಾಮಾನ್ಯ ಜನರಿಗೆ ಗೊತ್ತಿರುತ್ತದೆ. ಆದರೆ, ಅದರಾಚೆಗೂ ಹಲವು ಸವಾಲುಗಳಿವೆ. ಚಿತ್ರರಂಗದ ಪ್ರಾರಂಭ ಆದಾಗಿನಿಂದ ಎಲ್ಲ ಥಿಯೇಟರ್ಗಳಿಗೂ ರೀಲ್ಸ್ ಪೆಟ್ಟಿಗೆಗಳನ್ನು ಕಳುಹಿಸಲಾಗುತ್ತಿತ್ತು. ಆದರೆ, ಡಿಜಿಟಲೀಕರಣಗೊಂಡ ಬಳಿಕ ಕನ್ನಡ ಚಿತ್ರಗಳನ್ನು ಕರ್ನಾಟಕದ ಥಿಯೇಟರ್ಗಳಲ್ಲಿ ಪ್ರದರ್ಶಿಸಲು, ಪಕ್ಕದ ಚೆನ್ನೈಗೆ ಹೋಗಿ ಯುಎಫ್ಒ ಮತ್ತು ಕ್ಯೂಬ್ಗಳಲ್ಲಿ ಅಪ್ಲೋಡ್ ಮಾಡಬೇಕು. ಬಹುನಿರೀಕ್ಷಿತ "ಕ್ಯಾಪ್ಟನ್ ಕರ್ನಾಟಕ' ಚಿತ್ರ ರಿಲೀಸ್ಗೆ ಒಂದು ದಿನ ಮುನ್ನ ಸಹ-ನಿರ್ದೇಶಕರಾದ ಗಿರಿ (ಗಿರೀಶ್) ಮತ್ತು ಲೋಕಿ (ಅನಿರುದ್ಧ್) ಯುಎಫ್ಒ ಮತ್ತು ಕ್ಯೂಬ್ನಲ್ಲಿ ಸಿನಿಮಾ ಅಪ್ಲೋಡ್ ಮಾಡಿಸಲು ಬೆಂಗಳೂರಿನಿಂದ ಚೆನ್ನೈಗೆ ಹೊರಡುತ್ತಾರೆ. ನಿರ್ಮಾಪಕ ಕುಣಿಗಲ್ ಶ್ರೀನಿವಾಸ್ ಗೌಡ (ವೆಂಕಟೇಶ್) ವಿಮಾನದಲ್ಲಿ ತೆರಳಲು ಸೂಚಿಸಿದರೆ, ಪ್ರೊಡಕ್ಷನ್ ಮ್ಯಾನೇಜರ್ ಬಾಡಿಗೆ ಕಾರಿನಲ್ಲಿ ಹೋಗಿ ಅಂತ ಉಳಿದ ಹಣ ಜೇಬಿಗೆ ಹಾಕಿಕೊಳ್ಳುತ್ತಾನೆ. ಇನ್ನು ಕಿಲಾಡಿಗಳಾದ ಗಿರಿ ಮತ್ತು ಲೋಕಿ ತಾವೂ ದುಡ್ಡು ಉಳಿಸಿಕೊಳ್ಳೋಣ ಅಂತ ಬಸ್ ಹತ್ತುತ್ತಾರೆ. ಚೆನ್ನೈಗೆ ಹೋದ ಬಳಿಕ ಅಲ್ಲಿ ಅವರು ಸಿನಿಮಾದ ಹಾರ್ಡ್ ಡಿಸ್ಕ್ ಕಳೆದುಕೊಂಡುಬಿಡುತ್ತಾರೆ. ಇನ್ನು 12 ತಾಸಿನಲ್ಲಿ ಚಿತ್ರದ "ಫಸ್ಟ್ ಡೇ ಫಸ್ಟ್ ಶೋ'. ಆ ಹಾರ್ಡ್ ಡಿಸ್ಕ್ ಏನಾಗುತ್ತದೆ? ಹುಡುಗಾಟದ ಹುಡುಗರ ಹುಡುಕಾಟ ಹೇಗೆ ಸಾಗುತ್ತದೆ? ಅದೆಲ್ಲದರ ನಡುವೆ ಚಿತ್ರರಂಗದ ಕುರಿತ ಆಗು&ಹೋಗುಗಳು ಬಂದುಹೋಗುತ್ತವೆ.
