ಬೆಂಗಳೂರು: ತರುಣ್ ಸುಧೀರ್ ನಿರ್ದೇಶಿಸಿದ್ದ ‘ರಾಬರ್ಟ್’ ಹಾಗೂ ‘ಕಾಟೇರ’ದಲ್ಲಿ ಹೊಸ ನಾಯಕಿಯರನ್ನು ಸ್ಯಾಂಡಲ್ವುಡ್ಗೆ ಪರಿಚಯಿಸಿದ್ದರು. ರಾಬರ್ಟ್’ ಮೂಲಕ ಆಶಾ ಭಟ್, ‘ಕಾಟೇರ’ದಿಂದ ಅರಾಧನಾ ರಾಮ್ ಕನ್ನಡ ಚಿತ್ರರಂಗಕ್ಕೆ ಪದಾರ್ಪಣೆ ಮಾಡಿದ್ದರು. ಇದೀಗ ತರುಣ್ ನಿರ್ಮಿಸಿರುವ ‘ಏಳುಮಲೆ’ ಚಿತ್ರದಲ್ಲೂ ಇದೇ ನಿಯಮ ಮುಂದುವರಿಸಿದ್ದು, ‘ಮಹಾನಟಿ’ ವಿನ್ನರ್ ಪ್ರಿಯಾಂಕಾರನ್ನು ಚಂದನವನಕ್ಕೆ ಪರಿಚಯಿಸುತ್ತಿದ್ದಾರೆ. ಕರ್ನಾಟಕ- ತಮಿಳುನಾಡು ಗಡಿಭಾಗದ ಕಥೆಯಲ್ಲಿ ‘ಏಕ್ಲವ್ಯಾ’ ಖ್ಯಾತಿಯ ರಾಣಾ ನಾಯಕನಾಗಿದ್ದಾರೆ. ಅವರಿಗೆ ಪ್ರಿಯಾಂಕಾ ಆಚಾರ್ ಜೋಡಿಯಾಗಿದ್ದಾರೆ. ಇದೊಂದು ರೊಮ್ಯಾಂಟಿಕ್ ಆ್ಯಕ್ಷನ್ ಥ್ರಿಲ್ಲರ್ ಚಿತ್ರವಾಗಿದ್ದು ಶುಕ್ರವಾರ ರಿಲೀಸ್ ಆಗುತ್ತಿದೆ. ಮೊದಲ ಬಾರಿಗೆ ಬೆಳ್ಳಿತೆರೆಯಲ್ಲಿ ಕಾಣಿಸಿಕೊಳ್ಳುವ ಖುಷಿಯಲ್ಲಿರುವ ಪ್ರಿಯಾಂಕಾ, ‘‘ಏಳುಮಲೆ’ 2004ರಲ್ಲಿ ನಡೆದ ನೈಜ ಘಟನೆಯಾಧಾರಿತ ಸಿನಿಮಾ. ಆದರೆ, ನಾನು ಹುಟ್ಟಿದ್ದು 2006ರಲ್ಲಿ. 2004ರಲ್ಲಿ ನಡೆದ ಸಂಗತಿಗಳು ಹಾಗೂ ಸಾಮಾಜಿಕ ಪರಿಸ್ಥಿತಿಯ ಬಗ್ಗೆ ಪರಿಚಯವಿಲ್ಲ. ಆ ವಿಯಷವನ್ನು ಮೊದಲು ತಿಳಿಯಬೇಕಾಯಿತು. ಅಂದಿನ ಕಾಲಕ್ಕೆ ಹೇಗೆ ಇರಬೇಕು ಹಾಗೆಯೇ ಇರಲು ಮೊದಲು ತಯಾರಿ ನಡೆಸಿದೆ. ತುಂಬಾ ಸವಾಲಿನ ಪಾತ್ರ. ತಮಿಳು ಭಾಷೆ ಬೇರೆ ಕಲಿಯಬೇಕಿತ್ತು. ಅದಕ್ಕಾಗಿ ನಾವು 20 ದಿನಗಳ ಕಾಲ ವರ್ಕ್ಶಾಪ್ ಮಾಡಿದೆವು. ಇಲ್ಲಿ ಭಾಷೆ ಕಲಿಕೆ, ಅಭಿನಯ, ಎಮೋಷನ್ ಕ್ಯಾರಿ ಮಾಡುವುದು ಹೇಗೆ ಎಂಬ ಎಲ್ಲ ಅಂಶಗಳನ್ನು ಕಲಿತೆ. ಇನ್ನು ನಾಗಾಭರಣ ಸರ್, ತರುಣ್ ಸರ್ ಜತೆ ಕೆಲಸ ಮಾಡುತ್ತೇವೆ ಎಂದರೆ ನಮಗೆ ತುಂಬಾ ಕಲಿಯುವುದು ಇರುತ್ತದೆ. ಅಂತಹ ಕಲಿಕೆ ಇಡೀ ತಂಡದಿಂದ ದೊರೆತಿದೆ’ ಎನ್ನುತ್ತಾರೆ ಪ್ರಿಯಾಂಕಾ.
