ಬೆಂಗಳೂರು: ಭಾರತೀಯ ಚಿತ್ರರಂಗದಲ್ಲಿ ಸದ್ಯ ಪ್ಯಾನ್ ಇಂಡಿಯಾ ಪರಿಕಲ್ಪನೆ ಟ್ರೆಂಡಿಂಗ್ನಲ್ಲಿದೆ. ಸ್ಟಾರ್ ನಟ ಸಿನಿಮಾವಾಗಿರಲಿ ಅಥವಾ ಸಣ್ಣ ಬಜೆಟ್ ಚಿತ್ರವಾಗಿರಲಿ ಪ್ಯಾನ್ ಇಂಡಿಯಾ ತೆರೆ ಮೇಲೆ ತರಲು ಮುಂದಾಗುತ್ತಿದ್ದಾರೆ. ಐದಾರು ಭಾಷೆಗಳಲ್ಲಿ ಚಿತ್ರ ಬಿಡುಗಡೆ ಮಾಡಿದರೆ ಹೆಚ್ಚು ಪ್ರಸಿದ್ಧಿಯಾಗಿ, ಗಳಿಕೆ ಕೂಡ ಹೆಚ್ಚು ಮಾಡಬಹುದು ಎಂಬುದು ಅನಿಸಿಕೆ. ಅಷ್ಟಕ್ಕೂ, ಈ ಪ್ಯಾನ್ ಇಂಡಿಯಾ ಪರಿಕಲ್ಪನೆ ತೀರಾ ಇತ್ತೀಚಿನ ಟ್ರೆಂಡ್ ಎಂಬಂತೆ ಕೆಲವರು ನಂಬಿದ್ದಾರೆ. 2015ರಲ್ಲಿ ತೆರೆಕಂಡಿದ್ದ ಎಸ್.ಎಸ್.ರಾಜಮೌಳಿ ನಿರ್ದೇಶನದ ತೆಲುಗಿನ ‘ಬಾಹುಬಲಿ: ದ ಬಿಗಿನಿಂಗ್’ ಬಳಿಕ ಈ ಪ್ಯಾನ್ ಇಂಡಿಯಾ ಚಿತ್ರಗಳು ಹೆಚ್ಚಾಗಿದ್ದು ಎಂದು ಉತ್ತರ ಬರುವುದು ಸಹಜ. ಆದರೆ, ಇದು ತಪ್ಪು. ಯಾಕೆಂದರೆ, 66 ವರ್ಷಗಳ ಹಿಂದೆ ಅರ್ಥಾತ್ 1959ರಲ್ಲಿಯೇ ಕನ್ನಡದ ಚಿತ್ರವೊಂದು ಏಳು ಭಾಷೆಗಳಿಗೆ ಡಬ್ ಆಗಿ ಪ್ಯಾನ್ ಇಂಡಿಯಾ ತೆರೆಕಂಡಿತ್ತು. ಅಂದಹಾಗೆ, ಈ ಟ್ರೆಂಡ್ಗೆ ಓಂಕಾರ ಹಾಕಿದ್ದು ಕೂಡ ಅಣ್ಣಾವ್ರ ಚಿತ್ರ ಎನ್ನುವುದು ಗಮನಾರ್ಹ ಸಂಗತಿ. 1959ರಲ್ಲಿ ಬಿಡುಗಡೆಯಾಗಿದ್ದ ರಾಜಕುಮಾರ್ ನಟಿಸಿದ್ದ ಪೌರಾಣಿಕ ಸಿನಿಮಾ ‘ಮಹಿಷಾಸುರ ಮರ್ದಿನಿ’ ಚಿತ್ರವು ಏಳು ಭಾಷೆಗಳಲ್ಲಿ ಡಬ್ ಆಗಿತ್ತು. ಹೀಗಾಗಿ, ಮೊದಲ ಪ್ಯಾನ್ ಇಂಡಿಯಾ ಸಿನಿಮಾ ಎಂಬ ಹೆಗ್ಗಳಿಕೆ ಈ ಚಿತ್ರಕ್ಕೆ ಸಲ್ಲುತ್ತದೆ. ನಿರ್ದೇಶಕ ಬಿ.ಎಸ್.ರಂಗ ಆ್ಯಕ್ಷನ್-ಕಟ್ ಹೇಳಿದ್ದ ಈ ಪೌರಾಣಿಕ ಚಿತ್ರದಲ್ಲಿ ಡಾ. ರಾಜಕುಮಾರ್, ಮಹಿಷಾಸುರನ ಪಾತ್ರದಲ್ಲಿ ನಟಿಸಿದ್ದರು. ಸಾಹುಕಾರ್ ಜಾನಕಿ, ವಿ.ನಾಗಯ್ಯ, ಕೆ.ಎಸ್.ಅಶ್ವತ್ಥ, ಉದಯ ಕುಮಾರ್, ನರಸಿಂಹರಾಜು ಸೇರಿ ಘಟಾನುಘಟಿ ಕಲಾವಿದರ ದಂಡೇ ಈ ಚಿತ್ರದಲ್ಲಿತ್ತು.
