ಈಗಾಗಲೇ ಅಮಿತಾಭ್ ಬಚ್ಚನ್ ಅಭಿನಯದ ಗುಲಾಬೋ ಸಿತಾಬೋ, ಜ್ಯೋತಿಕಾ ಅಭಿನಯದ ಪೊನ್ಮಗಳ್ ವಂದಾಳ್ ಮತ್ತು ಕೀರ್ತಿ ಸುರೇಶ್ ಅಭಿನಯದ ಪೆಂಗ್ವಿನ್ ಚಿತ್ರಗಳು ನೇರವಾಗಿ ಓಟಿಟಿಯಲ್ಲಿ ಬಿಡುಗಡೆಯಾಗಿವೆ. ಆದರೆ, ಈ ಮೂರೂ ಚಿತ್ರಗಳಿಗೆ ಸಿಕ್ಕ ಪ್ರತಿಕ್ರಿಯೆ ಅಷ್ಟೇನೂ ಸಕಾರಾತ್ಮಕವಾಗಿಲ್ಲ ಎಂದು ಹೇಳಲಾಗುತ್ತಿದೆ. ಬರೀ ಮೂರು ಚಿತ್ರಗಳಷ್ಟೇ ಅಲ್ಲ, ಬೇರೆ ಬೇರೆ ಓಟಿಟಿಗಳಲ್ಲಿ ಬಿಡುಗಡೆಯಾಗಿರುವ ಗೂಮ್ಕೇತು, ಚೋಕ್ಡ್, ಮಿಸಸ್ ಸೀರಿಯಲ್ ಕಿಲ್ಲರ್, ಅತೀತ್, ವಾಟ್ ಆರ್ ದಿ ಆಡ್ಸ್ ಮುಂತಾದ ಯಾವ ಚಿತ್ರಗಳಿಗೂ ಅದ್ಭುತವಾದ ಪ್ರತಿಕ್ರಿಯೆ ಸಿಕ್ಕಿಲ್ಲ. ಆವರೇಜ್ ಎಂಬರ್ಥದಲ್ಲೇ ವಿಮರ್ಶೆಗಳು ಬರುತ್ತಿವೆ. ಕೆಲವು ಜನಪ್ರಿಯ ಓಟಿಟಿಗಳಲ್ಲಿ ಬಿಡುಗಡೆಯಾದ ಚಿತ್ರಗಳ ಬಗ್ಗೆ ನಾಲ್ಕು ಜನರಿಗಾದರೂ ಗೊತ್ತಿದೆ. ಇನ್ನು ಕೆಲವು ಓಟಿಟಿಯಲ್ಲಿ ಯಾವ್ಯಾವ ಚಿತ್ರ ಬಿಡುಗಡೆಯಾಗಿದೆ ಎಂಬ ವಿಷಯವೇ ಎಷ್ಟೋ ಜನರಿಗೆ ಗೊತ್ತಿಲ್ಲ.
