ಚಿರಂಜೀವಿ ಸರ್ಜಾ ನಿಧನರಾದ ಮೇಲೆ ಎಲ್ಲೆಡೆ ಕೇಳಿ ಬಂದ ಅತೀ ಮುಖ್ಯವಾದ ಪ್ರಶ್ನೆಯೆಂದರೆ, ಅವರು ಒಪ್ಪಿಕೊಂಡಿದ್ದ ಚಿತ್ರಗಳ ಕಥೆಯೇನು ಎಂದು. ಈ ಪೈಕಿ ‘ಏಪ್ರಿಲ್’ ಚಿತ್ರದ ಮುಹೂರ್ತವಾಗಿದ್ದರೂ, ಚಿತ್ರೀಕರಣ ಶುರುವಾಗಿರಲಿಲ್ಲ. ಹಾಗಾಗಿ ಆ ಚಿತ್ರದ ಸಮಸ್ಯೆ ಇಲ್ಲ. ಇದಲ್ಲದೆ, ‘ರಾಜ ಮಾರ್ತಾಂಡ’ ಮತ್ತು ‘ಕ್ಷತ್ರಿಯ’ ಎಂಬ ಎರಡು ಚಿತ್ರಗಳಲ್ಲಿ ಚಿರು ಒಪ್ಪಿಕೊಂಡಿದ್ದರು. ‘ಕ್ಷತ್ರಿಯ’ ಚಿತ್ರದ ಶೇ 60 ಭಾಗದಷ್ಟು ಚಿತ್ರೀಕರಣ ಮುಗಿದಿದ್ದರೆ, ‘ರಾಜ ಮಾರ್ತಾಂಡ’ ಚಿತ್ರದ ಒಂದು ಹಾಡು ಮತ್ತು ಚಿರು ಭಾಗದ ಡಬ್ಬಿಂಗ್ ಮಾತ್ರ ಬಾಕಿ ಇತ್ತು. ಈಗ ಡಬ್ಬಿಂಗ್ ಕೆಲಸವನ್ನು ಧ್ರುವ ಮುಗಿಸಿಕೊಡುತ್ತಾರಂತೆ. ಈ ಹಿಂದೆ, ಶಂಕರ್ ನಾಗ್ ಅವರು ನಿಧನರಾದಾಗ, ‘ನಿಗೂಢ ರಹಸ್ಯ’ ಚಿತ್ರಕ್ಕೆ ಅನಂತ್ ನಾಗ್ ಡಬ್ಬಿಂಗ್ ಮಾಡಿಕೊಟ್ಟಿದ್ದರು.
