"ಟೆನಂಟ್' ಹೆಸರಿಗೆ ತಕ್ಕಂತೆ ಒಬ್ಬ ಬಾಡಿಗೆದಾರನ ಕುರಿತ ಕಥೆ. ಕಮಲೇಶ್ (ರಾಕೇಶ್ ಮಯ್ಯ) ಮತ್ತು ದಾಮಿನಿ (ಸೋನು ಗೌಡ) ದಂಪತಿ. ನಮ್ಮ ಸಂಸಾರ ಆನಂದ ಸಾಗರ ಎಂದು ಹಾಡಿ ಕುಣಿಯುವ ಹೊತ್ತಿಗೆ ಅವರ ಜೀವನಕ್ಕೆ ಅವರ ಮನೆಯ ಬಾಡಿಗೆದಾರ ಸುಂದರೇಶ್ (ಧರ್ಮ ಕೀರ್ತಿರಾಜ್) ಮುಳ್ಳಾಗುತ್ತಾನೆ. ಅದು ಹೇಗೆ? ಯಾಕೆ? ಎಂಬುದನ್ನು ಸಿನಿಮಾದಲ್ಲಿ ನೋಡಿದರೆ ಚಂದ. ಈ ಮೂವರ ನಡುವೆ ನಡೆಯುವ ಕ್ರೈಮ್ ಒಂದನ್ನು ಭೇದಿಸಲು ಬರುವ ಪೊಲೀಸ್ ಅಧಿಕಾರಿ ತಿಲಕ್, ನಿಜವಾದ ಅಪರಾಧಿಯನ್ನು ಕಂಡು ಹಿಡಿಯುತ್ತಾನಾ ಎಂಬುದರ ಸುತ್ತ "ಟೆನಂಟ್' ಕಥೆ ಸಾಗುತ್ತದೆ. ಕೆಲವೇ ಪಾತ್ರಗಳು, ಒಂದು ಮನೆಯಲ್ಲೇ ಬಹುತೇಕ ಶೂಟಿಂಗ್, ಎರಡು ಹಾಡುಗಳು, 99 ನಿಮಿಷಗಳ ಸಿನಿಮಾ... ಹೀಗೆ ನಿರ್ದೇಶಕ ಶ್ರೀಧರ್ ಶಾಸ್ತ್ರಿ ಎಲ್ಲೂ ಎಳೆದಾಡಲು ಹೋಗದೇ, ಸರಳವಾಗಿ ಕಥೆ ಪ್ರಾರಂಭಿಸಿ, ನಿಧಾನವಾಗಿ ಪ್ರೇಕ್ಷಕರನ್ನು ಆವರಿಸಿಕೊಳ್ಳುತ್ತಾರೆ. ಹಾಗೇ ನಟ ಧರ್ಮ ಕೀರ್ತಿರಾಜ್ ಬಿಗ್ಬಾಸ್ ಮನೆಯಲ್ಲಿದ್ದಾಗಲೇ ಸಿನಿಮಾ ಬಿಡುಗಡೆಯಾಗಿದ್ದು, ಅವರಿಗೆ ಈ ಚಿತ್ರ ಹೊಸ ಇಮೇಜ್ ನೀಡಿದರೂ ಆಶ್ಚರ್ಯವಿಲ್ಲ. ಇನ್ನು ನಟಿ ಸೋನು ಗೌಡ ಕೂಡ ವಿಭಿನ್ನ ಸವಾಲಿನ ಪಾತ್ರದಲ್ಲಿ ಮಿಂಚಿದ್ದಾರೆ. ಉತ್ತಮ ಥ್ರಿಲ್ಲಿಂಗ್ ಅನುಭವ ನೀಡುವ "ಟೆನಂಟ್' ಚಿತ್ರವನ್ನು ಒಮ್ಮೆ ನೋಡಲಡ್ಡಿಯಿಲ್ಲ.
