ದೀಪಿಕಾ ಮೈಮಾಟಕ್ಕೆ ಕಂಗನಾ ‘ಕೆಂಗಣ್ಣು’: ಗೆಹ್ರಾಯಿಯಾಂ ಚಿತ್ರದ ಬಗ್ಗೆ ಟೀಕಾಸ್ತ್ರ

ಬಾಲಿವುಡ್​ನ ಬಹುತೇಕರನ್ನು ಕಂಗನಾ ರಣಾವತ್​ ಟೀಕಿಸಿದ್ದಾರೆ. ಅದರಲ್ಲೂ ದೀಪಿಕಾ ಪಡುಕೋಣೆ ಬಗ್ಗೆ ಅವರು ಆಗಾಗ ಕಿಡಿಕಾರುತ್ತಲೇ ಇರುತ್ತಾರೆ. ಈಗ ಅದು ಮತ್ತೊಮ್ಮೆ ಮುಂದುವರೆದಿದೆ. ಇತ್ತೀಚೆಗೆ ಅಮೆಜಾನ್​ ಪೆಂನಲ್ಲಿ ಬಿಡುಗಡೆಯಾಗಿರುವ "ಗೆಹ್ರಾಯಿಯಾಂ' ಚಿತ್ರದಲ್ಲಿ ದೀಪಿಕಾ ತೀರಾ ಬೋಲ್ಡ್​ ಆಗಿ ಕಾಣಿಸಿಕೊಂಡ ಹಿನ್ನೆಲೆಯಲ್ಲಿ ಕಂಗನಾ ಪರೋಕ್ಷ$ವಾಗಿ ಕುಟುಕಿದ್ದಾರೆ.

ಆಧುನಿಕತೆಯ ನಡುವೆ ಯುವ ಪೀಳಿಗೆಯ ಸಂಬಂಧಗಳ ವರ್ತನೆ ಹೇಗಿರುತ್ತದೆ ಎಂಬುದನ್ನು "ಗೆಹ್ರಾಯಿಯಾಂ' ಚಿತ್ರದಲ್ಲಿ ಹೇಳಲಾಗಿದೆಯಾದರೂ, ದೀಪಿಕಾ ಇದುವರೆಗೂ ಕಾಣಿಸದ ರೀತಿಯಲ್ಲಿ ಪ್ರತ್ಯಕ್ಷರಾಗಿ ಅಚ್ಚರಿ ಮೂಡಿಸಿದ್ದರು. ಟ್ರೇಲರ್​ ಹೊರಬಂದಾಗಲೇ ಮೈಮಾಟ ಪ್ರದರ್ಶನ, ಚುಂಬನ ದೃಶ್ಯಗಳಿಗೆ ಸಂಬಂಧಿಸಿದಂತೆ ಸಾಕಷ್ಟು ಸುದ್ದಿಯಾಗಿದ್ದರು. ಇದೀಗ ಇದೇ ವಿಚಾರಕ್ಕೆ ಕಂಗನಾ ಟೀಕಾಸ್ತ್ರ ಪ್ರಯೋಗಿಸಿದ್ದಾರೆ.

ಇನ್​ಸ್ಟಾಗ್ರಾಂ ಸ್ಟೋರಿಯಲ್ಲಿ ಈ ಬಗ್ಗೆ ಬರೆದುಕೊಂಡಿರುವ ಅವರು, "ನಾನೂ ಈ ಸಹಸ್ತ್ರಮಾನದವಳೇ. ಈ ತರಹದ ಪ್ರಣಯವನ್ನು ನಾನು ಅರ್ಥಮಾಡಿಕೊಳ್ಳಬಲ್ಲೆ. ಆದರೆ, ಪ್ರಣಯದ ಹೆಸರಿನಲ್ಲಿ ಚಿತ್ರಗಳಲ್ಲಿ ಕಸ ತುಂಬಿಸುವುದು ಸರಿಯಲ್ಲ. ಕೆಟ್ಟ ಸಿನಿಮಾಗಳು ಯಾವತ್ತಿದ್ದರೂ ಕೆಟ್ಟವೇ. ಮೈಮಾಟ ಪ್ರದರ್ಶನ, ಅಶ್ಲೀಲತೆ ಎಂದಿಗೂ ಅಂತಹ ಸಿನಿಮಾಗಳನ್ನು ಬದುಕಿಸಲಾರವು' ಎಂದು ಪರೋಕ್ಷ$$ವಾಗಿಯೇ ದೀಪಿಕಾಗೆ ಚಾಟಿ ಬೀಸಿದ್ದಾರೆ. &ಏಜೆನ್ಸೀಸ್​