‘ದಸ್ಕತ್’ ಎಂದರೆ ತುಳುವಿನಲ್ಲಿ ಸಹಿ ಎಂದರ್ಥ. ಅಷ್ಟಕ್ಕೂ ಇದು ಕೇವಲ ಸಹಿಯ ಕುರಿತ ಕಥೆಯಲ್ಲ. ಬದಲಾಗಿ, ಸಹಿ ಹಿಂದೆ ಎದುರಿಸುವ ಅವಮಾನದ ಕಥೆ. ಇಲ್ಲಿ ಅಸಹಾಯಕರ ಸಿಟ್ಟಿದೆ, ನೆತ್ತಿಗೇರುವ ಕೋಪವಿದೆ. ಘರ್ಷಣೆಯಿದೆ. ಇವೆಲ್ಲದರ ಜತೆಗೆ ಕರಾವಳಿಯ ಹಸಿರ ಸಿರಿ, ಗುಡಿಸಲು ಜೋಪಡಿ, ಕಲೆ, ಸಂಸ್ಕೃತಿ, ಜಾನಪದ ಹಾಗೂ ಚಲನಶೀಲ ಬದುಕಿದೆ. ಇವೆಲ್ಲವನ್ನೂ ಕಣ್ಣಿಗೆ ಕಟ್ಟುವಂತೆ ನಿರ್ದೇಶಕ ಅನೀಶ್ ಪೂಜಾರಿ ವೇಣೂರು ‘ದಸ್ಕತ್’ನಲ್ಲಿ ಚಿತ್ರಿಸಿದ್ದಾರೆ. ಈ ಹಿಂದೆ ‘ಕಾಮಿಡಿ ಕಿಲಾಡಿಗಳು’ ರಿಯಾಲಿಟಿ ಶೋ ಮೂಲಕ ರಂಜಿಸಿದ್ದ ಅನೀಶ್, ಗಂಭೀರ ಕಥೆ ಹೇಳುವ ತಮ್ಮ ಬಹುಮುಖ ಪ್ರತಿಭೆಯನ್ನು ಸಾಬೀತುಪಡಿಸಿದ್ದಾರೆ. ಕರಾವಳಿ ಭಾಗದ ತಳಸಮುದಾಯದ ಬಗ್ಗೆ ಹಲವಾರು ಕಥೆಗಳು ಬಂದಿವೆ. ಅದಕ್ಕೆ ಇದೊಂದು ಸೇರ್ಪಡೆಯಾದರೆ, ಇಲ್ಲಿ ಅವರು ಆಯ್ಕೆ ಮಾಡಿಕೊಂಡಿರುವ ವಿಷಯ ವಿಶೇಷ ಎನಿಸುತ್ತದೆ. ಕಥೆಗೆ ತಕ್ಕಂತೆ ಹೆಣೆದಿರುವ ಪಾತ್ರಗಳು ಗಮನಸೆಳೆಯುತ್ತವೆ. ಪ್ರತಿ ಪಾತ್ರವೂ ಕುತೂಹಲ ಮೂಡಿಸುತ್ತದೆ. ಸಂಭಾಷಣೆಯ ಬದಲು ಕೆಲ ವಿಷಯಗಳನ್ನು ದೃಶ್ಯಗಳಲ್ಲಿ ತೋರಿಸಿರುವುದು ಇಷ್ಟವಾಗುತ್ತದೆ. ಒಟ್ಟಿನಲ್ಲಿ ಜನಸಮುದಾಯದ ಕಥೆಯಲ್ಲಿ ಕುತೂಹಲ, ಮನರಂಜನೆ ಇದ್ದು, ಸಿನಿಮಾ ಬೋರ್ ಎನಿಸುವುದಿಲ್ಲ. ಚಿತ್ರದ ಪಾತ್ರಗಳು ಹಾಗೂ ಕರಾವಳಿ ಸೊಬಗನ್ನು ದೃಶ್ಯಕಾವ್ಯದಂತೆ ಸೃಷ್ಟಿಸಿರುವ ಸಂತೋಷ್ ಆಚಾರ್ಯ ಛಾಯಾಗ್ರಹಣ ಚಿತ್ರದ ಹೈಲೈಟ್. ಎಲ್ಲ ಪಾತ್ರಧಾರಿಗಳು ನ್ಯಾಯ ಒದಗಿಸಿದ್ದಾರೆ. ಹಾಗಾಗಿ, ಈ ಚಿತ್ರಕ್ಕೆ ಇವರೇ ನಾಯಕ ನಟ ಎಂದು ಹೇಳುವುದು ಸುಲಭವಲ್ಲ. ಕರಾವಳಿ ಸೊಗಡಿನ ಅನೀಶ್ ಸಂಭಾಷಣೆ ಇಷ್ಟವಾಗುತ್ತದೆ. ಈ ವರ್ಷದ ಸದಭಿರುಚಿ ಚಿತ್ರಗಳ ಸಾಲಿಗೆ ‘ದಸ್ಕತ್’ ಸೇರುತ್ತದೆ.
