ಬೆಂಗಳೂರು: ಕಳೆದ ಒಂದು ವರ್ಷದಲ್ಲಿ ‘ಗಂಧದ ಗುಡಿ’, ‘ಜಾಕಿ’, ‘ಕರಿಯ’, ‘ಬಹದ್ದೂರ್’ ಸೇರಿ ಹಲವು ಸಿನಿಮಾಗಳು ರಿ-ರಿಲೀಸ್ ಆಗಿವೆ. ಈ ಸಾಲಿಗೆ ಇದೀಗ ಮತ್ತೊಂದು ಸೇರ್ಪಡೆ ‘ಸೈನೈಡ್’. ಎಎಂಆರ್ ರಮೇಶ್ ನಿರ್ದೇಶನದ ಮಾಜಿ ಪ್ರಧಾನಿ ರಾಜೀವ್ ಗಾಂಧಿ ಹತ್ಯೆಯ ಬಳಿಕ ನಡೆದ ನೈಜ ಘಟನೆಗಳ ಆಧಾರಿತ ‘ಸೈನೈಡ್’ ಚಿತ್ರ ಇದೇ ಮೇ 23ರಂದು ರಿ-ರಿಲೀಸ್ ಆಗಲಿದೆ. 2006ರಲ್ಲಿ ತೆರೆಕಂಡಿದ್ದ ಈ ಚಿತ್ರದಲ್ಲಿ ತಾರಾ, ರವಿ ಕಾಳೆ, ರಂಗಾಯಣ ರಘು, ಮಾಳವಿಕಾ ಅವಿನಾಶ್, ಉಷಾ ಭಂಡಾರಿ ನಟಿಸಿದ್ದರು. ತಾರಾಗೆ ಅತ್ಯುತ್ತಮ ನಟಿ ಹಾಗೂ ತೃತೀಯ ಅತ್ಯುತ್ತಮ ಚಿತ್ರ ಎಂಬ ಎರಡು ರಾಜ್ಯ ಪ್ರಶಸ್ತಿಯನ್ನು ತನ್ನದಾಗಿಸಿಕೊಂಡಿತ್ತು. ಕೆಲ ಸಣ್ಣ ಬದಲಾವಣೆಯೊಂದಿಗೆ ಇದೀಗ ಮತ್ತೆ ರಿಲೀಸ್ ಆಗುತ್ತಿದೆ.
