ಬೆಂಗಳೂರು: ಕರೊನಾ ಹಾವಳಿ ಇರಲಿಲ್ಲ ಎಂದಿದ್ದರೆ ಕಂಠೀರವ ಸ್ಟುಡಿಯೋದಲ್ಲಿನ ಡಾ. ರಾಜ್ ಸಮಾಧಿ ಬಳಿ ಸಾವಿರಾರು ಮಂದಿ ಆಗಮಿಸಿ ಅಣ್ಣಾವ್ರ ಸಮಾಧಿಗೆ ನಮಸ್ಕರಿಸಿ ತೆರಳಿರುತ್ತಿದ್ದರು. ಆದರೆ, ಇದೇ ಮೊದಲ ಬಾರಿ ಲಾಕ್ಡೌನ್ ಹಿನ್ನೆಲೆಯಲ್ಲಿ ಯಾರೂ ಇಲ್ಲದೆ ಸಮಾಧಿ ಭಣಗುಡುತ್ತಿತ್ತು. ಆದರೂ ಕೆಲವರು ಸರ್ಕಾರ ವಿಧಿಸಿರುವ ಕಟ್ಟುನಿಟ್ಟಿನ ನಿಯಮವನ್ನು ಬದಿಗೊತ್ತಿ ಅಣ್ಣಾವ್ರ ಸಮಾಧಿಗೆ ಪುಷ್ಪ ಅರ್ಪಿಸಿ ಕೆಲಹೊತ್ತು ವಿಶ್ರಮಿಸಿ ಮನೆಗೆ ಮರಳಿದರು. ಇನ್ನು ಡಾ. ರಾಜ್ ಹಿರಿಮಗ ಶಿವರಾಜ್ಕುಮಾರ್ ಬೆಳಗ್ಗೆ ಬೇಗನೆ ಬಂದು ತಂದೆಯವರ ಸಮಾಧಿಗೆ ಪೂಜೆ ಮಾಡಿ ಮರಳಿದರು.
ಇನ್ನು ಲಾಕ್ಡೌನ್ ಹಿನ್ನೆಲೆಯಲ್ಲಿ ಡಾ. ರಾಜ್ ಸಮಾಧಿ ಬಳಿ ಯಾರೂ ಹೋಗಬೇಡಿ. ಮನೆಯಲ್ಲಿದ್ದುಕೊಂಡೇ ನಮಸ್ಕರಿಸಿದರೆ ಸಾಕು ಅವರ ಆಶೀರ್ವಾದ ಸಿಕ್ಕಂತೆ ಎಂದು ಡಾ. ರಾಜ್ ಪುತ್ರ ರಾಘವೇಂದ್ರ ರಾಜ್ಕುಮಾರ್ ಅಭಿಮಾನಿಗಳಲ್ಲಿ ಮನವಿ ಮಾಡಿದ್ದರು. ಅದರಂತೆ, ಸಮಾಧಿ ಬಳಿ ಬೆರಳೆಣಿಕೆಯಷ್ಟು ಜನ ಮಾತ್ರ ಕಾಣಿಸಿಕೊಂಡು, ಸರ್ಕಾರದ ಕಟ್ಟುನಿಟ್ಟಿನ ನಿಯಮವನ್ನು ಪಾಲಿಸಿದ್ದಾರೆ. ಎಂದಿನಂತೆ ಅಪ್ಪಾಜಿ ಅವರ ಪುಣ್ಯ ಸ್ಮರಣೆಯನ್ನು ಮನೆಯಲ್ಲಿಯೇ ಸರಳವಾಗಿ ಅವರ ಫೋಟೋಕ್ಕೆ ಪೂಜೆ ಮಾಡುವ ಮೂಲಕ ಆಚರಿಸಿದ್ದಾರೆ ರಾಘವೇಂದ್ರ ರಾಜ್ಕುಮಾರ್.
