ಸಿನಿಮಾರಂಗದಲ್ಲಿ ಇಂದಿಗೂ ಸ್ತ್ರೀ ದ್ವೇಷ, ಲಿಂಗ ತಾರತಮ್ಯವಿದೆ, ನನಗೆ ಅನುಭವವಾಗಿದೆ: 'ಜಾನು', 'ಕರ್ಣನ್' ನಟಿ ಗೌರಿ ಕಿಶನ್ ಬೇಸರ

ಇದು ತಂತ್ರಜ್ಞಾನದ ಯುಗ ಈಗ ಎಲ್ಲವೂ ಬದಲಾಗಿದೆ. ಎಐ ಬಳಕೆ ಮಾಡಲಾಗುತ್ತಿದೆ. ಹಾಡಿಗೆ ಟ್ಯೂನ್​ ಹುಡುಕುವ ವಿಚಾರಕ್ಕಾಗಿ, ನಟರಿಗೆ ಸಿನಿಮಾ ಬಗ್ಗೆ ಕತೆ ಹೇಳುವುದಕ್ಕಾಗಿ ಎಐ ಬಳಕೆ ಮಾಡಲಾಗುತ್ತಿದೆ. ಎಲ್ಲರೂ ಸಮಾನರಂತೆ ಕೆಲಸ ಮಾಡುತ್ತಿರುವ ಈ ಹೊತ್ತಿನಲ್ಲಿ ಸಿನಿಮಾರಂಗದಲ್ಲಿ ಇಂದಿಗೂ ನಟನೆಗೆ ಅವಕಾಶ ಕೊಡುವ ಬಗ್ಗೆ ಹಾಗೂ ನಟಿಯರು ಅಭಿಪ್ರಾಯ ವ್ಯಕ್ತಪಡಿಸುವಾಗ ಅದನ್ನು ಪರಿಗಣನೆಗೆ ತೆಗೆದುಕೊಳ್ಳುವ ವಿಚಾರದಲ್ಲಿ ಇರುವ ತಾರತಮ್ಯದ ಬಗ್ಗೆ ನಟಿ ಗೌರಿ ಕಿಶನ್ ಮಾಹಿತಿ ಹಂಚಿಕೊಂಡಿದ್ದಾರೆ

ಖಾಸಗಿ ಮಾಧ್ಯಮವೊಂದರ ಸಂದರ್ಶನದಲ್ಲಿ ಭಾಗಿಯಾಗಿದ್ದ ನಟಿ ಗೌರಿ ಕಿಶನ್, ಸಿನಿಮಾ ರಂಗದಲ್ಲಿ ಮಹಿಳೆಯರು ಎದುರಿಸುತ್ತಿರುವ ಪಿತೃಪ್ರಧಾನ ವ್ಯವಸ್ಥೆ ಮನೋಭಾವ, ದುಷ್ಟತನ ಹಾಗೂ ಮಹಿಳೆಯರ ದ್ವನಿ ಹಾಗೂ ಸ್ವಾತಂತ್ರ್ಯದ ಕೊರತೆಯ ಬಗ್ಗೆ ಮಾತನಾಡಿದ್ದಾರೆ.

ಕೇರಳ ಒಂದು ಪ್ರಬುದ್ಧ ರಾಜ್ಯ. ಆದರೆ ಎಲ್ಲೆಲ್ಲಿಯೂ ಲಿಂಗ ತಾರತಮ್ಯ ಇದೆ. ರಾತ್ರೋರಾತ್ರಿ ಯಾವುದೇ ಬದಲಾವಣೆಗಳು ನಡೆಯೋದಿಲ್ಲ. ಪಿತೃಪ್ರಧಾನ ವ್ಯವಸ್ಥೆ ಮನೋಭಾವ, ಸ್ತ್ರೀ ದ್ವೇಷ ಮನೋಭಾವವು ನಡೆದುಕೊಂಡು ಬಂದ ಸಾಮಾಜಿಕ ಪಿಡುಗಾಗಿದೆ. ಅನೇಕರು ಪ್ರಗತಿಪರರು ಎಂದು ಭಾವಿಸುತ್ತೇವೆ. ಆದರೆ ಚಿತ್ರರಂಗದಲ್ಲಿ ಭೇಟಿಯಾಗುವ ಅನೇಕ ಪುರುಷರ ಯೋಚನೆಗಳು ಇಂದಿಗೂ ಪಿತೃಪ್ರಧಾನ ಕುಟುಂಬದ್ದಾಗಿದೆ ಎಂದು ಹೇಳಿದರು.

ಇನ್ನೂ ವೃತ್ತಿಪರ ಸ್ಥಳಗಳಲ್ಲಿ ನಿರ್ಲಕ್ಷ್ಯ ಮತ್ತು ತಾರತಮ್ಯದ ಬಗ್ಗೆ ಮಾತನಾಡಿದ ಅವರು, ಮಹಿಳೆಯರಿಗೆ ಅವಕಾಶ ನೀಡುವುದೇ ಅವರಿಗೆ ಮಾಡುತ್ತಿರುವ ದೊಡ್ಡ ಉಪಕಾರ ಎನ್ನುವ ಭಾವನೆ ಇದೆ. ಸಭೆಗಳಲ್ಲಿ ಮಹಿಳೆಯರ ಸಲಹೆಗೆ, ಅಭಿಪ್ರಾಯಕ್ಕೆ ಬೆಲೆ ಇಲ್ಲ. ಇದನ್ನು ನಾನು ಅನುಭವಿಸಿದ್ದೇನೆ ಎಂದು ವೈಯಕ್ತಿಕ ಅನುಭವವನ್ನು ಗೌರಿ ಕಿಶನ್ ಹಂಚಿಕೊಂಡಿದ್ದಾರೆ.

ಕ್ಯಾಮರಾ ಹಿಂದೆ ಮಹಿಳೆಯರ ಕೊರತೆ ಬಗ್ಗೆ ಮಾತನಾಡಿದ ಅವರು, ಸಿನಿಮಾಗಳಲ್ಲಿ ಮಹಿಳೆಯರು ವಿಭಿನ್ನ ಪಾತ್ರಗಳಲ್ಲಿ ಕಾಣಿಸಿಕೊಂಡು, ಅದ್ಭುತವಾಗಿ ನಟಿಸುತ್ತಿದ್ದಾರೆ. ಆದರೆ ತೆರೆಯ ಹಿಂದೆ ಮಹಿಳಾ ತಂತ್ರಜ್ಞರ ಕೊರತೆ ದೊಡ್ಡ ಪ್ರಮಾಣದಲ್ಲಿದೆ. ಸೆಟ್‌ಗಳಲ್ಲಿ ಪುರುಷರ ಅಧಿಪತ್ಯದ ಗ್ಲಾಸ್ ಮಹಿಳಾ ತಂತ್ರಜ್ಞರನ್ನು ಲೈಂಗಿಕವಾಗಿ ಬಿಂಬಿಸುವ ಅಥವಾ ಹೀಯಾಳಿಸುವ ಪ್ರವೃತ್ತಿ ಇನ್ನೂ ಇದೆ ಎಂದು ಬೇಸರ ವ್ಯಕ್ತಪಡಿಸಿದರು ಗೌರಿ ಕಿಶನ್, (ಏಜೆನ್ಸೀಸ್).