ಫೇಸ್‌ಬುಕ್‌ನಲ್ಲಿ ತಮ್ಮ ಹೆಸರಿನಲ್ಲಿ ನಡೆಯುತ್ತಿರುವ ಸಬ್‌ಸ್ಕ್ರಿಪ್ಷನ್ ದಂಧೆಯ ಬಗ್ಗೆ ವಿವರಣೆ ನೀಡಿದ ನಟಿ, "ನನ್ನ ಹೆಸರಿನಲ್ಲೇ ಫೇಸ್‌ಬುಕ್‌ನಲ್ಲಿ ಪೇಜ್‌ವೊಂದನ್ನು ಆರಂಭಿಸಲಾಗಿದ್ದು, ಅಲ್ಲಿ ತಿಂಗಳಿಗೆ 400 ರೂಪಾಯಿಗಳ ಸಬ್‌ಸ್ಕ್ರಿಪ್ಷನ್ ಮಾಡೆಲ್ ನಡೆಸಲಾಗುತ್ತಿದೆ. ದುರಂತವೆಂದರೆ ಜನರು ಅದಕ್ಕಾಗಿ ಹಣ ನೀಡುತ್ತಿದ್ದಾರೆ! ಅದು ವೆರಿಫೈಡ್ ಪೇಜ್ ಕೂಡ ಅಲ್ಲ, ಬದಲಾಗಿ ನನ್ನ ಹೆಸರನ್ನೇ ತಪ್ಪಾಗಿ ಬರೆಯಲಾಗಿದೆ. ಇಂತಹ ನಕಲಿ ಖಾತೆಗಳಿಗೆ ಹಣ ಪಾವತಿಸುವವರು ದಯವಿಟ್ಟು ತಮ್ಮ ಹಣದ ಬಗ್ಗೆ ಸ್ವಲ್ಪ ಎಚ್ಚರಿಕೆಯಿಂದ ಇರಿ ಎಂದು ಅಭಿಮಾನಿಗಳಲ್ಲಿ ಮತ್ತು ಸಾರ್ವಜನಿಕರಲ್ಲಿ ಮನವಿ ಮಾಡಿದ್ದಾರೆ.
ಮೊದಲಿಗೆ ನಾನು ಇದನ್ನು ಗಂಭೀರವಾಗಿ ಪರಿಗಣಿಸಿರಲಿಲ್ಲ, ಸಮಯ ಹೋದಂತೆ ತಾನಾಗಿಯೇ ಬಂದ್ ಆಗಬಹುದು ಅಂದುಕೊಂಡಿದ್ದೆ. ಆದರೆ ದಿನಕಳೆದಂತೆ ಇದು ನನ್ನ ವ್ಯಕ್ತಿತ್ವಕ್ಕೆ ಧಕ್ಕೆ ತರುವ ಹಂತಕ್ಕೆ ತಲುಪಿದೆ. ಇಷ್ಟೇ ಅಲ್ಲದೆ, ಸಂಪೂರ್ಣವಾಗಿ ನಿಜವೆಂದೇ ಬಿಂಬಿಸುವಂತಹ ನಕಲಿ ಎಐ (AI) ವಿಡಿಯೋಗಳನ್ನು ಸೃಷ್ಟಿಸಿ ಹರಿಬಿಡಲಾಗುತ್ತಿದೆ. ನಾನು ಯಾವುದೇ ತಪ್ಪು ಮಾಡದಿದ್ದರೂ, ಈ ರೀತಿ ಸಾರ್ವಜನಿಕವಾಗಿ ಬಂದು ಸ್ಪಷ್ಟನೆ ನೀಡಬೇಕಾದ ಪರಿಸ್ಥಿತಿ ಬಂದಿರುವುದು ನನಗೆ ತೀವ್ರ ಬೇಸರ ತಂದಿದೆ," ಎಂದು ತಮ್ಮ ಅಳಲನ್ನು ತೋಡಿಕೊಂಡಿದ್ದಾರೆ.
ಯಾವುದೇ ಅಧಿಕೃತ ಗುರುತಿನ ಚೀಟಿ ಅಥವಾ ದಾಖಲೆಗಳನ್ನು ನೀಡದ ನಕಲಿ ಪೇಜ್‌ಗಳಿಗೆ ನಮ್ಮ ಹೆಸರಿನಲ್ಲಿ ಸಬ್‌ಸ್ಕ್ರಿಪ್ಷನ್ ಮಾಡೆಲ್ ಮೂಲಕ ಹಣ ಗಳಿಸಲು ಹೇಗೆ ಅವಕಾಶ ಸಿಗುತ್ತದೆ ಎಂಬುದೇ ಅರ್ಥವಾಗುತ್ತಿಲ್ಲ. ಎಐ ತಂತ್ರಜ್ಞಾನ ಎಷ್ಟು ಭಯಾನಕವಾಗಿದೆ ಎಂದರೆ ಅದನ್ನು ನಂಬುವುದೇ ಕಷ್ಟ. ಈಗ ಸೃಷ್ಟಿಯಾಗುತ್ತಿರುವ ವಿಡಿಯೋಗಳು ವೈಯಕ್ತಿಕ ಗೌರವ ಮತ್ತು ವರ್ಚಸ್ಸನ್ನು ನಾಶಪಡಿಸುತ್ತಿವೆ. ಇವುಗಳನ್ನು ನನ್ನ ಕುಟುಂಬದವರು ಅಥವಾ ಸ್ನೇಹಿತರು ನೋಡಿದರೆ, ಅದು ನಾನಲ್ಲ ಎಂಬುದನ್ನು ಗುರುತಿಸುವುದೂ ಸಹ ಕಷ್ಟವಾಗುತ್ತದೆ ಎಂದು ಕಳವಳ ವ್ಯಕ್ತಪಡಿಸಿದ್ದಾರೆ.
