ಒಮ್ಮೆ ಪೆಟ್ರೋಲ್​ ಬಂಕ್​ನಲ್ಲಿ ಕೆಲಸ ಮಾಡ್ತಿದ್ದ ಸ್ಟಾರ್​ ನಟ ಅಬ್ಬಾಸ್​ ಇಂದು ವಿದೇಶದಲ್ಲಿ ಸರ್ಕಾರಿ ನೌಕರ! Actor Abbas

Actor Abbas : ತಮ್ಮ ನೀಲಿ ಕಣ್ಣುಗಳು ಮತ್ತು ವಿಶಿಷ್ಟ ಹೇರ್‌ಸ್ಟೈಲ್ ಮೂಲಕ ತೊಂಬತ್ತರ ದಶಕದಲ್ಲಿ ಮಿಂಚಿದ್ದ ಅಬ್ಬಾಸ್, ದಕ್ಷಿಣ ಭಾರತದ ಚಿತ್ರರಂಗದ ಚಾಕೊಲೇಟ್ ಬಾಯ್ ಎಂದು ಖ್ಯಾತಿಯಾಗಿದ್ದರು. ಕೇವಲ ನಟನೆಯಷ್ಟೇ ಅಲ್ಲದೆ ತಮ್ಮ ಸೌಮ್ಯ ಸ್ವಭಾವದಿಂದಲೂ ಲಕ್ಷಾಂತರ ಅಭಿಮಾನಿಗಳನ್ನು ಸಂಪಾದಿಸಿದವರು. ಅವಕಾಶಗಳು ಕಡಿಮೆಯಾಗುತ್ತಿದ್ದಂತೆ ಬಣ್ಣದ ಲೋಕದಿಂದ ದೂರ ಸರಿದು, ವಿದೇಶದಲ್ಲಿ ಹೊಸ ಜೀವನ ಆರಂಭಿಸಿದ ಇವರ ಧೈರ್ಯ ಮತ್ತು ಬದುಕಿನ ಏರಿಳಿತಗಳನ್ನು ಎದುರಿಸಿದ ರೀತಿ ನಿಜಕ್ಕೂ ಎಲ್ಲರಿಗೂ ಮಾದರಿ. ಇಂದಿಗೂ ಸದಾ ನಗುಮುಖದ, ಎವರ್‌ಗ್ರೀನ್ ಹ್ಯಾಂಡ್ಸಮ್ ನಟನಾಗಿ ಅಬ್ಬಾಸ್​ ಅವರು ಪ್ರೇಕ್ಷಕರ ನೆನಪಿನಲ್ಲಿ ಅಚ್ಚಳಿಯದ ಸ್ಥಾನ ಪಡೆದಿದ್ದಾರೆ.

ತಾಜಾ ಸಂಗತಿ ಏನೆಂದರೆ, ಕೆಲವು ವರ್ಷಗಳ ಹಿಂದೆ ಪೆಟ್ರೋಲ್ ಪಂಪ್‌ನಲ್ಲಿ ಕೆಲಸ ಮಾಡುತ್ತಿದ್ದ ಅಬ್ಬಾಸ್​, ಇದೀಗ ವಿದೇಶದಲ್ಲಿ ಬಹಳ ಉನ್ನತ ಸರ್ಕಾರಿ ಹುದ್ದೆಯಲ್ಲಿದ್ದಾರೆ.

90ರ ದಶಕದಲ್ಲಿ ತಮಿಳು ಚಿತ್ರರಂಗದಲ್ಲಿ ಅಗ್ರ ನಟರಲ್ಲಿ ಒಬ್ಬರಾಗಿದ್ದ ನಟ ಅಬ್ಬಾಸ್, 1996 ರಲ್ಲಿ ಕಾದಲ್ ದೇಶಂ ಚಿತ್ರದ ಮೂಲಕ ತಮಿಳು ಚಿತ್ರರಂಗಕ್ಕೆ ಪಾದಾರ್ಪಣೆ ಮಾಡಿದರು. ತಮಿಳು, ತೆಲುಗು, ಮಲಯಾಳಂ, ಕನ್ನಡ ಮತ್ತು ಹಿಂದಿ ಸಿನಿಮಾಗಳಲ್ಲಿ ನಟಿಸಿದ್ದಾರೆ. ಅಬ್ಬಾಸ್​ ಅವರು ಅನೇಕ ಹಿಟ್​ ಸಿನಿಮಾಗಳನ್ನು ಸಹ ನೀಡಿದ್ದಾರೆ.

ಚಾಕೊಲೇಟ್ ಬಾಯ್ ಆಗಿ ಅಭಿಮಾನಿಗಳ ಹೃದಯ ಗೆದ್ದ ಅಬ್ಬಾಸ್, ಕಾಲಕ್ರಮೇಣ ಸಿನಿಮಾಗಳಲ್ಲಿ ಅವಕಾಶಗಳು ಕಡಿಮೆಯಾದಾಗ ತೀವ್ರ ಆರ್ಥಿಕ ಸಂಕಷ್ಟವನ್ನು ಎದುರಿಸಬೇಕಾಯಿತು. ಒಂದು ಹಂತದಲ್ಲಿ ಜೀವನ ನಿರ್ವಹಣೆಗಾಗಿ ಅವರು ಸಿನಿಮಾ ರಂಗವನ್ನು ಬಿಟ್ಟು ವಿದೇಶಕ್ಕೆ ತೆರಳಿ ಪೆಟ್ರೋಲ್ ಬಂಕ್‌ಗಳಲ್ಲಿ ಕೆಲಸ ಮಾಡಿದರು. ಅಲ್ಲದೆ, ಮೆಕ್ಯಾನಿಕ್ ಆಗಿ ದುಡಿದರು ಮತ್ತು ಮನೆಮನೆಗೆ ತೆರಳಿ ಇನ್ಸುಲೇಷನ್ ಕೆಲಸಗಳನ್ನು ಸಹ ಮಾಡಿದರು. ಈ ಹಂತವು ಅವರ ಜೀವನದ ಅತ್ಯಂತ ಕಠಿಣ ಸಮಯವಾಗಿತ್ತು.

ಪೆಟ್ರೋಲ್ ಪಂಪ್‌ನಲ್ಲಿ ಕೇವಲ 10 ದಿನ ಕೆಲಸ ಮಾಡಿದ್ದಾಗಿ ಮತ್ತು ಆ ಕೆಲಸ ತನಗೆ ಸರಿಹೊಂದುವುದಿಲ್ಲ ಎಂದು ಆ ಕೆಲಸ ಬಿಟ್ಟಿದ್ದಾಗಿ ಸ್ವತಃ ಅಬ್ಬಾಸ್​ ಅವರೇ ಹೇಳಿದರು. ಇದಾದ ಬಳಿಕ ಅಬ್ಬಾಸ್​ ಅವರು ಕಾಲ್ ಸೆಂಟರ್‌ನಲ್ಲಿ ಕೆಲಸ ಮಾಡಿದರು. ಹೀಗೆ, ಅನೇಕ ಕೆಲಸಗಳನ್ನು ಮಾಡಿರುವ ಅಬ್ಬಾಸ್​, ಯಾವುದೇ ಕೆಲಸವಾಗಿದ್ದರೂ ತಾನು ಇಷ್ಟಪಡುವ ರೀತಿಯ ವ್ಯಕ್ತಿಯಾಗಲು ಬಯಸುತ್ತೇನೆ ಎಂದಿದ್ದಾರೆ.

ಅಂದಹಾಗೆ, ಅಬ್ಬಾಸ್​ ಅವರಿಗೆ ಸಿನಿಮಾ ಅವಕಾಶಗಳು ಕಡಿಮೆಯಾಗಲು ಮುಖ್ಯ ಕಾರಣವೆಂದರೆ, ಅವರು ನಾಯಕ ನಟನಾಗಿ ನಟಿಸಿದ ಕೆಲವು ಚಿತ್ರಗಳು ಸತತವಾಗಿ ಸೋಲನ್ನು ಅನುಭವಿಸಿದವು. ಇದರಿಂದಾಗಿ ದೊಡ್ಡ ಬ್ಯಾನರ್‌ನ ಸಿನಿಮಾಗಳು ಅವರನ್ನು ಕಡೆಗಣಿಸಲು ಶುರುಮಾಡಿದವು. ನಂತರ ಅವರು ಪೋಷಕ ಪಾತ್ರಗಳಲ್ಲಿ ಕಾಣಿಸಿಕೊಂಡರೂ, ಅಂದುಕೊಂಡ ಮಟ್ಟದ ಯಶಸ್ಸು ಸಿಗಲಿಲ್ಲ. ಸಿನಿಮಾ ರಂಗದಲ್ಲಿನ ಅನಿಶ್ಚಿತತೆ ಮತ್ತು ಆರ್ಥಿಕ ಭದ್ರತೆಯ ಕೊರತೆಯಿಂದಾಗಿ ಅವರು ಮಾನಸಿಕವಾಗಿ ಜಿಗುಪ್ಸೆ ಅನುಭವಿಸಿದ್ದರು. ಅಂತಿಮವಾಗಿ, ಕುಟುಂಬದ ಭವಿಷ್ಯಕ್ಕಾಗಿ ಚಿತ್ರರಂಗದಿಂದ ದೂರ ಸರಿದು ನ್ಯೂಜಿಲೆಂಡ್‌ನಲ್ಲಿ ನೆಲೆಸಿದರು.

ಅಬ್ಬಾಸ್ ಅವರು ಇತ್ತೀಚೆಗೆ ಯೂಟ್ಯೂಬ್ ಚಾನೆಲ್‌ ಒಂದಕ್ಕೆ ಸಂದರ್ಶನ ನೀಡಿದರು. ಅದರಲ್ಲಿ ಮಾತನಾಡಿದ ಅಬ್ಬಾಸ್​, ತಾವು ಪ್ರಸ್ತುತ ನ್ಯೂಜಿಲೆಂಡ್‌ನಲ್ಲಿ ಸರ್ಕಾರಕ್ಕಾಗಿ ಕೆಲಸ ಮಾಡುತ್ತಿದ್ದೇನೆ ಎಂದರು. ನಾನು ಸರ್ಕಾರಿ ಕೆಲಸದಲ್ಲಿರುವ ವಿಚಾರ ಅನೇಕರಿಗ ತಿಳಿದಿಲ್ಲ ಅಂತಾನೂ ಹೇಳಿದರು. ತಮ್ಮ ಪ್ರಸ್ತುತ ಕೆಲಸದ ನಡುವೆ ಸಮಯ ಸಿಕ್ಕಾಗ ಚಲನಚಿತ್ರಗಳಲ್ಲಿ ನಟಿಸುವ ಅವಕಾಶ ಸಿಗುತ್ತದೆ ಅಂತಾನೂ ತಿಳಿಸಿದರು.

ಇದೇ ಸಂದರ್ಶನದಲ್ಲಿ ತಮ್ಮ ಸಹ ನಟಿ ರಂಭಾ ಬಗ್ಗೆ ಮಾತನಾಡಿದ ಅಬ್ಬಾಸ್​, ರಂಭಾ ಅವರು ಯಾವಾಗಲೂ ಡಯಟ್‌ನಲ್ಲಿ ಇರುತ್ತಿದ್ದರು ಎಂದರು. ಅವರ ಮುಂದೆಯೇ ಐಸ್ ಕ್ರೀಮ್ ಖರೀದಿಸುವ ಮೂಲಕ ತೊಂದರೆ ಕೊಡುತ್ತಿದ್ದೆ ಎಂದರು. ಇದೇ ವೇಳೆ ಸಿಮ್ರನ್ ಬಗ್ಗೆ ಮಾತನಾಡುತ್ತಾ, ಕಡಲ್ ಕಡಲ್ ಕಡಲ್ ಎನ್ ಕಣ್ಣಿಲ್ ಕೊಚ್ಚರ್ ಹಾಡಿಗೆ ನೃತ್ಯ ಮಾಡುವುದನ್ನು ನೋಡಿದಾಗಲೆಲ್ಲ ನಾನು ಇಷ್ಟೊಂದು ಎನರ್ಜಿಯಿಂದ ನೃತ್ಯ ಮಾಡಿದ್ದೇನೆಯೇ? ಎಂಬ ಪ್ರಶ್ನೆ ಉದ್ಭವಿಸುತ್ತದೆ ಎಂದರು.

ಜೀವನದಲ್ಲಿ ಸಾಕಷ್ಟು ಏರಿಳಿತಗಳ ಬಳಿಕ ಅಬ್ಬಾಸ್​ ಅವರು ಇದೀಗ ನ್ಯೂಜಿಲೆಂಡ್​ನಲ್ಲಿ ತಮ್ಮ ಕುಟುಂಬದೊಂದಿಗೆ ವಾಸವಿದ್ದಾರೆ. ಸಮಯ ಸಿಕ್ಕಾಗಲೆಲ್ಲ ತಮ್ಮ ಮೂಲ ವೃತ್ತಿ ನಟನೆಯನ್ನು ಸಹ ಅನುಸರಿಸುತ್ತಿದ್ದಾರೆ, (ಏಜೆನ್ಸೀಸ್​).