ಪ್ರೀತಿ ತಂದ ಅದೃಷ್ಟ: ಮಾಕ್ಟೇಲ್​ ಹುಡುಗಿಯ ಕಾಕ್ಟೇಲ್​ ಮಾತು

"ಲವ್​ ಮಾಕ್ಟೇಲ್​' ಸಿನಿಮಾ ಬಳಿಕ ಎಲ್ಲವೂ ಬದಲಾಯಿತು. ಅದರಲ್ಲೂ ಒಟಿಟಿಯಲ್ಲಿ ಸಿನಿಮಾ ಬಿಡುಗಡೆ ಆದಮೇಲಂತೂ, ಸಾವಿರ ಇದ್ದ ನನ್ನ ಇನ್​ಸ್ಟಾಗ್ರಾಂ ಫಾಲೋವರ್ಸ್​ ಸಂಖ್ಯೆ ಎರಡೇ ದಿನಕ್ಕೆ 50 ಸಾವಿರಕ್ಕೆ ಏರಿಕೆಯಾಯಿತು. ಇದೆಲ್ಲದಕ್ಕೂ ಕಾರಣ "ಲವ್​ ಮಾಕ್ಟೇಲ್​'- ಹೀಗೆ ಈವರೆಗೂ ಏನಾಗಿದೆಯೋ ಅದನ್ನು ಮನಸ್ಸಿಂದ ಹೇಳಿಕೊಳ್ಳುತ್ತಾರೆ ನಟಿ ರಚನಾ ಇಂದರ್​.

ರಚನಾಗೆ ಲಕ್​ ಅನ್ನೋದು "ಲವ್​' ಮೂಲಕ ಸಿಕ್ಕಿದೆ. ಹಾಗಾಗಿ, ಅವರ ಬತ್ತಳಿಕೆಯಲ್ಲಿನ ಬಹುತೇಕ ಚಿತ್ರಗಳು ಪ್ರೀತಿ ಪ್ರೇಮದ ಹಿನ್ನೆಲೆಯ ಸಿನಿಮಾಗಳೇ ಆಗಿವೆ. "ಲವ್​ 360', "ಲೆಟ್ಸ್​ ಬ್ರೇಕ್​ಅಪ್​', "ಲವ್​ ಮಾಕ್​ಟೇಲ್​ 2' ... ಹೀಗೆ ಪಟ್ಟಿ ಬೆಳೆಯುತ್ತ ಹೋಗುತ್ತದೆ. ಎರಡೇ ವರ್ಷದ ಅವಧಿಯಲ್ಲಿ ಕನ್ನಡದ ಜತೆಗೆ ತೆಲುಗಿನಲ್ಲಿಯೂ ಸಿನಿಮಾ ಮಾಡಿ ಬಂದಿದ್ದಾರೆ ರಚನಾ.

"ಚಿಕ್ಕಂದಿನಲ್ಲಿ ನಟಿಯಾಗಬೇಕು ಎಂಬ ಆಸೆ ಇದ್ದಿದ್ದಕ್ಕೆ ನಟನಾ ಶಾಲೆ ಸೇರಿದೆ. ಸೇರಿ ಒಂದೇ ವಾರಕ್ಕೆ "ಲವ್​ ಮಾಕ್ಟೇಲ್​' ಚಿತ್ರದ ಆಡಿಷನ್​ ಆಯ್ತು. ಅವಕಾಶವೂ ಸಿಕ್ಕಿತು. ಒಟಿಟಿಯಲ್ಲಿ ಸಿನಿಮಾ ಬಂದ ಮೇಲೆ ಈ ಮಟ್ಟದ ಫೇಮ್​ ಸಿಗುತ್ತೆ ಎಂದು ಕನಸಲ್ಲೂ ಅಂದುಕೊಂಡಿರಲಿಲ್ಲ. ಎಲ್ಲವೂ ಕನಸಂತಾಯ್ತು. ಅದಾದ ಮೇಲೆ ಗಣೇಶ್​ ಜತೆಗೆ "ತ್ರಿಬಲ್​ ರೈಡಿಂಗ್​', ಅದಾದ ಮೇಲೆ ರಿಷಬ್​ ಶೆಟ್ಟಿ ತಂಡದ ಜತೆಗೆ "ಹರಿಕಥೆ ಅಲ್ಲ ಗಿರಿಕಥೆ'ಯೂ ಮುಗೀತು. ತೆಲುಗಿನ "ಚಿತ್ತನ್​ ಮಹಾರಾಣಿ' ಸಹ ರೆಡಿಯಾಗಿದೆ' ಎನ್ನುವ ರಚನಾ, ಚಾಲೆಂಜಿಂಗ್​ ಪಾತ್ರದ ಬಗ್ಗೆಯೂ ಹೇಳುತ್ತಾರೆ.

"ಶಶಾಂಕ್​ ನಿರ್ದೇಶನದ "ಲವ್​ 360' ಚಿತ್ರದ ನನ್ನ ಪಾತ್ರ ಈವರೆಗೂ ಹೆಚ್ಚು ಕಾಡಿದ ಪಾತ್ರ. ನಟನೆಯಲ್ಲಿಯೂ ಆ ಪಾತ್ರ ಪೋಷಣೆ ಮಾಡಲು ಸಾಕಷ್ಟು ತರಬೇತಿ ಪಡೆದಿದ್ದೇನೆ. ಚಿತ್ರದಲ್ಲಿ ಸುಮ್ಮನೆ ಬಂದು ಹೋಗುವ ಬದಲು, ನೋಡುಗರ ಮನಸ್ಸಿಗೆ ನಾಟುತ್ತದೆ. ಆದರೆ, ಅದರ ಬಗ್ಗೆ ಹೆಚ್ಚು ಹೇಳುವುದಕ್ಕಿಂತ ತೆರೆಮೇಲೆ ನೋಡುವುದೇ ಚೆಂದ' ಎಂದು ಗೌಪ್ಯತೆ ಕಾಪಾಡಿಕೊಳ್ಳುತ್ತಾರವರು.

ಆ್ಯಕ್ಷನ್​ ಪಾತ್ರ ಮಾಡುವಾಸೆ

ಪ್ರತಿಯೊಬ್ಬ ನಟ-ನಟಿಗೂ ಒಂದೊಂದು ರೀತಿಯ ಪಾತ್ರಗಳನ್ನು ಮಾಡುವ ಆಸೆ, ಕನಸಿರುತ್ತದೆ. ಅದೇ ರೀತಿ ರಚನಾಗೂ ಅಂಥದೊಂದು ಆಸೆ ಚಿಕ್ಕಂದಿನಲ್ಲಿಯೇ ಮೊಳಕೆಯೊಡೆದಿತ್ತು. "ಶಾಲೆಗೆ ಹೋಗುವಾಗ ಟಿವಿಯಲ್ಲಿ ನಾಯಕಿಯರು ಫೈಟ್​ ಮಾಡುವ ದೃಶ್ಯಗಳನ್ನು ನೋಡುತ್ತಿದ್ದೆ. ನನಗೂ ಆಗಿನಿಂದಲೇ ಆ್ಯಕ್ಷನ್​ ಇಷ್ಟ. ಇದೀಗ ಅವಕಾಶ ಸಿಕ್ಕರೆ ಆ್ಯಕ್ಷನ್​ ಸಿನಿಮಾ ಮಾಡುಲು ರೆಡಿ. ನೆಗೆಟಿವ್​ ಶೇಡ್​ ಪಾತ್ರದಲ್ಲಿ ಕಾಣಿಸಿಕೊಳ್ಳುವುದೂ ನನಗಿಷ್ಟ' ಎನ್ನುತ್ತಾರೆ ರಚನಾ.

ಒಂದೇ ತರಹದ ಪಾತ್ರ ಬೇಡ

"ಲವ್​ ಮಾಕ್ಟೇಲ್​' ಸಿನಿಮಾ ಬಳಿಕ "ಹೆಂಗೆ ನಾವು' ಹುಡುಗಿಗೆ ಅದೇ ತತರಹದ ಸಾಕಷ್ಟು ಸಿನಿಮಾ ಅವಕಾಶಗಳು ಬಂದವಂತೆ. ಅವೆಲ್ಲವನ್ನೂ ಬಿಟ್ಟು ವಿಭಿನ್ನ ಕಥೆಗಳನ್ನೇ ರಚನಾ ಆಯ್ಕೆ ಮಾಡಿಕೊಂಡರು. "ಲಾಕ್​ಡೌನ್​ ಸಮಯದಲ್ಲಿ ಕನ್ನಡ ಮಾತ್ರವಲ್ಲದೆ, ತೆಲುಗಿನ ಸಿನಿಮಾ ಅವಕಾಶಗಳೂ ಬಂದವು. ಆದರೆ, ಎಲ್ಲವೂ ಒಂದೇ ತರಹದ ಪಾತ್ರಗಳು. ನನಗೆ ಬದಲಾವಣೆ ಬೇಕಿತ್ತು. ಆಗ "ತ್ರಿಬಲ್​ ರೈಡಿಂಗ್​' ಸಿಕ್ಕಿತು. "ಹರಿಕಥೆ ಅಲ್ಲ ಗಿರಿಕಥೆ' ಸಿನಿಮಾದಲ್ಲಿಯೂ ನಟಿಸಿದೆ. ಬಯಸಿದ್ದು ಸಿಗುತ್ತಾ ಹೋದವು. ಇದೀಗ ನನ್ನ ಐದು ಚಿತ್ರಗಳು ಬಿಡುಗಡೆಗೆ ರೆಡಿಯಾಗಿವೆ' ಎನ್ನುತ್ತಾರೆ.