ನನ್ನ ಮತ್ತು ಕವಿತಾ ಸ್ನೇಹ 2012ರ "ಲಕ್ಷ್ಮಿ ಬಾರಮ್ಮ' ಧಾರಾವಾಹಿಯಿಂದ ಶುರುವಾಗಿತ್ತು. ಇದೀಗ ಅದು ದಶಕದ ಹೊಸ್ತಿಲಲ್ಲಿದೆ. ಧಾರಾವಾಹಿ ಶುರುವಾದಾಗ ನಮ್ಮ ನಡುವೆ ಸಹಜ ಸ್ನೇಹ ಇತ್ತೇ ವಿನಃ ಪ್ರೀತಿಯ ಸೆಳೆತ ಶುರುವಾಗಿರಲಿಲ್ಲ. ಕೆಲ ವರ್ಷಗಳ ಬಳಿಕ ಕಾರಣಾಂತರಗಳಿಂದ ನಾನು ಧಾರಾವಾಹಿಯಿಂದ ಹೊರಬಂದೆ. ಇಬ್ಬರೂ ನಮ್ಮ ನಮ್ಮ ಕೆಲಸಗಳಲ್ಲಿ ಬಿಜಿಯಾದೆವು. ಸಮಯ ಸಿಕ್ಕಾಗಲೆಲ್ಲ ಹೆಚ್ಚು ಹೊತ್ತು ಮಾತನಾಡುತ್ತಿದ್ದೆವು. ಹೀಗಿರುವಾಗ 2020ರಲ್ಲಿ ಲಾಕ್ಡೌನ್ ಸಹ ಘೋಷಣೆ ಆಯಿತು. ಸ್ನೇಹಿತರ ಜತೆ ಸೇರಿ ಆಗೊಮ್ಮೆ ಈಗೊಮ್ಮೆ ಸ್ಕಂದಗಿರಿ, ನಂದಿ ಬೆಟ್ಟ, ಸಾವನದುರ್ಗ, ಶಿವಗಂಗೆ ಬೆಟ್ಟಕ್ಕೆ ಟ್ರೆಕ್ಕಿಂಗ್ ಹೋಗಿದ್ದೆವು. ಆವತ್ತೊಂದಿನ ನಾನೇ ಮುಂದುವರಿದು, "ಪ್ರೀತಿಯಲ್ಲಿ ಬೀಳೋಣ್ವಾ ಅಥವಾ ಮದುವೆಯಲ್ಲಿ ಬೀಳೋಣ್ವಾ ...' ಎಂದು ಕವಿತಾಗೆ ಪ್ರಪೋಸ್ ಮಾಡಿದ್ದೆ. ಅಲ್ಲಿಂದ ನಮ್ಮ ಈ ಪ್ರೇಮಕಥೆ ಶುರುವಾಯ್ತು.
