ಮಕ್ಕಳ ದಿನಾಚರಣೆ ಸ್ಪೆಷಲ್; ನೋಡಲೇಬೇಕಾದ ಮಕ್ಕಳ ಚಿತ್ರಗಳು...

ಬಹುಶಃ ಇಡೀ ಭಾರತೀಯ ಚಿತ್ರರಂಗದಲ್ಲಿ ಕನ್ನಡದಲ್ಲಿ ಬಂದಷ್ಟು ಮಕ್ಕಳ ಚಿತ್ರಗಳು, ಬೇರ್ಯಾವ ಚಿತ್ರರಂಗದಲ್ಲೂ ಬಂದಿರುವುದಕ್ಕೆ ಸಾಧ್ಯವೇ ಇಲ್ಲ. ಅದರಲ್ಲೂ ಕಳೆದೊಂದು ದಶಕದಲ್ಲಿ ಹಲವಾರು ಮಕ್ಕಳ ಚಿತ್ರಗಳು ದುವರೆಗೂ ಬಂದಿವೆ. ಯಾವಾಗ ಸರ್ಕಾರ 25 ಲಕ್ಷ ರೂ. ಸಬ್ಸಿಡಿ ಘೋಷಿಸಿತೋ, ಅಲ್ಲಿಂದ ಮಕ್ಕಳ ಚಿತ್ರಗಳ ಸಂಖ್ಯೆ ಹೆಚ್ಚಾಗಿರುವುದಷ್ಟೇ ಅಲ್ಲ, ಸ್ವರೂಪವೂ ಬದಲಾಗಿದೆ. ಕನ್ನಡದಲ್ಲಿ, ಮಕ್ಕಳ ಚಿತ್ರಗಳೆಂದರೆ ಮನರಂಜನೆಯ ಜತೆಗೆ ಮಕ್ಕಳಲ್ಲಿ ಸ್ಪೂರ್ತಿ ತುಂಬುವಂತಹ, ಸಾಹಸ ಪ್ರವೃತ್ತಿ ಬೆಳೆಸುವಂತಹ ಮಕ್ಕಳ ಹಲವು ಚಿತ್ರಗಳು ಬಿಡುಗಡೆಯಾಗಿವೆ. ಅಂತಹ ಚಿತ್ರಗಳಲ್ಲಿ ಅತ್ಯಂತ ಜನಪ್ರಿಯ ಹಾಗೂ ಮಕ್ಕಳ ದಿನಾಚರಣೆಯ ಸಂದರ್ಭದಲ್ಲಿ ನೀವು ನೋಡಲೇಬೇಕಾದ ಒಂದಿಷ್ಟು ಚಿತ್ರಗಳ ಪಟ್ಟಿ ಇಲ್ಲಿದೆ.

ಮಕ್ಕಳ ರಾಜ್ಯ: ಕನ್ನಡದಲ್ಲಿ ಬಿಡುಗಡೆಯಾದ ಮೊದಲ ಮಕ್ಕಳ ಚಿತ್ರ ಎಂಬ ಹೆಗ್ಗಳಿಕೆಗೆ ಪಾತ್ರವಾದ ಚಿತ್ರವೆಂದರೆ, ಅದು ಬಿ.ಆರ್. ಪಂತುಲು ನಿರ್ದೇಶನದ ‘ಮಕ್ಕಳ ರಾಜ್ಯ’. 1960ರಲ್ಲಿ ಬಿಡುಗಡೆಯಾದ ಈ ಚಿತ್ರದ ಮೂಲಕ ಹಿರಿಯ ನಟ ಉಮೇಶ್ ಬಾಲನಟರಾಗಿ ಕನ್ನಡ ಚಿತ್ರರಂಗಕ್ಕೆ ಎಂಟ್ರಿ ಕೊಟ್ಟರು. ಇದೊಂದು ಕಾಲ್ಪನಿಕ ಜಾನಪದ ಕಥೆಯಾಗಿದ್ದು, ಚಂದ್ರನ ಮೇಲೆ ಮನುಷ್ಯ ಕಾಲಿಡುವಂತಹ ದೃಶ್ಯಗಳನ್ನು ಈ ಚಿತ್ರದಲ್ಲಿ ಚಿತ್ರೀಕರಿಸಲಾಗಿತ್ತು.

ನಾಗರಹೊಳೆ: ಹಿರಿಯ ನಿರ್ದೇಶಕ ಎಸ್.ವಿ. ರಾಜೇಂದ್ರ ಸಿಂಗ್ ಬಾಬು ನಿರ್ದೇಶಿಸಿದ ಮೊದಲ ಮಕ್ಕಳ ಚಿತ್ರ ಇದು. ಶಾಲಾಮಕ್ಕಳು ನಾಗರಹೊಳೆ ಅಭಯಾರಣ್ಯಕ್ಕೆ ಹೋದ ಸಂದರ್ಭದಲ್ಲಿ ನಡೆಯುವ ರೋಚಕ ಘಟನೆಗಳನ್ನು ಈ ಚಿತ್ರದಲ್ಲಿ ಹಿಡಿದಿಡಲಾಗಿದೆ. ವಿಷ್ಣುವರ್ಧನ್ ಮತ್ತು ಅಂಬರೀಷ್ ಇಬ್ಬರೂ ಈ ಚಿತ್ರದಲ್ಲಿ ನಟಿಸಿದ್ದರು. ಇದಾಗಿ ಕೆಲವು ವರ್ಷಗಳ ಅಂತರದಲ್ಲಿ ‘ಸಿಂಹದ ಮರಿ ಸೈನ್ಯ’ ಎಂಬ ಇನ್ನೊಂದು ಮಕ್ಕಳ ಚಿತ್ರವನ್ನು ಬಾಬು ನಿರ್ದೇಶಿಸಿದ್ದಷ್ಟೇ ಅಲ್ಲ, ಈ ಚಿತ್ರದಲ್ಲಿ ಅರ್ಜುನ್ ಸರ್ಜಾ ಅವರನ್ನು ಕನ್ನಡ ಚಿತ್ರರಂಗಕ್ಕೆ ಪರಿಚಯಿಸಿದರು.

ಪುಟಾಣಿ ಏಜೆಂಟ್ 123: ಮಕ್ಕಳ ಮತ್ತೊಂದು ಸಾಹಸಮಯ ಕಥೆ ಇದ್ದ ಈ ಚಿತ್ರದಲ್ಲಿ ಮೂವರು ಮಕ್ಕಳು ದುಷ್ಟಶಕ್ತಿಗಳ ವಿರುದ್ಧ ಹೇಗೆ ಹೋರಾಡುತ್ತಾರೆ ಎಂದು ತೋರಿಸಲಾಗಿದೆ. ಕೋತಿಯೊಂದು ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದು, ಈ ಚಿತ್ರದ ವಿಶೇಷತೆ.

ಬೆಟ್ಟದ ಹೂವು: ಪುನೀತ್ ರಾಜಕುಮಾರ್ ಬಾಲನಟನಾಗಿ ಅಭಿನಯಿಸಿದ ಈ ಚಿತ್ರವು ರಾಮು ಎಂಬ ಬಾಲಕನೊಬ್ಬನ ಸುತ್ತ ಸುತ್ತುತ್ತದೆ. ಕುವೆಂಪು ಅವರ ‘ಶ್ರೀ ರಾಮಾಯಣ ದರ್ಶನಂ’ ಪುಸ್ತಕವನ್ನು ಖರೀದಿಸಿ ಓದಬೇಕೆನ್ನುವುದು ಅವನ ಆಸೆ. ಆ ಪುಸ್ತಕ ಖರೀದಿಸುವುದಕ್ಕೆ ಹಣ ಹೊಂದಿಸುವ ನಿಟ್ಟಿನಲ್ಲಿ ಆತ ಏನೆಲ್ಲಾ ಮಾಡುತ್ತಾನೆ ಎನ್ನುವುದು ಚಿತ್ರದ ಕಥೆ. ಈ ಚಿತ್ರದಲ್ಲಿನ ಅಭಿನಯಕ್ಕಾಗಿ ಪುನೀತ್​ಗೆ ರಾಷ್ಟ್ರ ಮಟ್ಟದಲ್ಲಿ ಅತ್ಯುತ್ತಮ ಬಾಲನಟ ಪ್ರಶಸ್ತಿ ಸಿಕ್ಕಿತ್ತು.

ಚಿನ್ನಾರಿ ಮುತ್ತ: ಹಳ್ಳಿಯೊಂದರ ಮುಗ್ಧ ಬಾಲಕ ದೊಡ್ಡ ಅಥ್ಲೀಟ್ ಆಗುವ ಕಥೆ ಇರುವ ಈ ಚಿತ್ರದ ಮೂಲಕ ವಿಜಯ್ ರಾಘವೇಂದ್ರ ಬಾಲನಟನಾಗಿ ಪರಿಚಿತರಾದರು. ಮಕ್ಕಳಲ್ಲಿ ಕ್ರೀಡೆಯ ಕುರಿತು ಉತ್ತೇಜನ ತುಂಬುವ ಚಿತ್ರ ಇದಾಗಿದ್ದು, ಸಿ. ಅಶ್ವತ್ಥ್ ಸಂಯೋಜಿಸಿರುವ ಹಾಡುಗಳು ಸಾಕಷ್ಟು ಜನಪ್ರಿಯವಾಗಿವೆ.

ಕೊಟ್ರೇಶಿ ಕನಸು: ಹೆಸರೇ ಹೇಳುವಂತೆ, ಇದು ಕೊಟ್ರೇಶಿ ಎಂಬ ಹುಡುಗನ ಕನಸಿನ ಕುರಿತಾದ ಚಿತ್ರ. ಕೆಳಸ್ಥರದ ಈ ಹುಡುಗ, ಚೆನ್ನಾಗಿ ಓದಬೇಕೆನ್ನುವ ತನ್ನ ಕನಸನ್ನು ಹೇಗೆ ನನಸಾಗಿಸಿಕೊಳ್ಳುತ್ತಾನೆ ಎಂಬ ಕಥೆ ಈ ಚಿತ್ರದ್ದಾಗಿದ್ದು, ಕುಂ.ವೀ. ಅವರ ‘ಕೊಟ್ರ ಹೈಸ್ಕೂಲಿಗೆ ಸೇರಿದ್ದು’ ಕಥೆಯನ್ನು ಆಧರಿಸಿದ್ದಾಗಿದೆ.

ಭೈರವಿ: ಬೇಬಿ ಶ್ಯಾಮಿಲಿ ಅಭಿನಯದ ಈ ಚಿತ್ರವು ಅದೆಷ್ಟು ಜನಪ್ರಿಯವಾಗಿತ್ತೆಂದರೆ, ನಂತರದ ದಿನಗಳಲ್ಲಿ ಶ್ಯಾಮಿಲಿ ಅಭಿನಯದಲ್ಲೇ ‘ಶಾಂಭವಿ’, ‘ದಾಕ್ಷಾಯಿಣಿ’, ‘ಭುವನೇಶ್ವರಿ’ ಮುಂತಾದ ಹಲವು ಚಿತ್ರಗಳು ಬಿಡುಗಡೆಯಾದವು. ಈ ಚಿತ್ರಗಳಲ್ಲಿ ನಾಯಿ, ಕೋತಿ, ಆನೆ ಸಹ ಪ್ರಮುಖ ಪಾತ್ರಗಳಲ್ಲಿ ಕಾಣಿಸಿಕೊಂಡಿದ್ದು ವಿಶೇಷ.

ಕೇರ್ ಆಫ್ ಫುಟ್​ಪಾತ್: ಒಬ್ಬ ಸ್ಲಂ ಹುಡುಗ ವಿದ್ಯಾಭ್ಯಾಸ ಪಡೆಯುವುದಕ್ಕೆ ಏನೆಲ್ಲಾ ಅಡೆತಡೆಗಳನ್ನು ಎದುರಿಸುತ್ತಾನೆ ಎಂಬ ಕಥೆ ಇರುವ ಈ ಚಿತ್ರದಲ್ಲಿ ಮಾಸ್ಟರ್ ಕಿಶನ್ ನಟಿಸಿದ್ದರು. ಅಷ್ಟೇ ಅಲ್ಲ, ಈ ಚಿತ್ರವನ್ನು ನಿರ್ದೇಶಿಸುವ ಮೂಲಕ ಜಗತ್ತಿನ ಕಿರಿಯ ನಿರ್ದೇಶಕ ಎಂಬ ಹೆಗ್ಗಳಿಕೆಗೂ ಅವರು ಪಾತ್ರರಾಗಿದ್ದಾರೆ.

ತುತ್ತೂರಿ: ಬೆಂಗಳೂರೆಂಬ ಕಾಂಕ್ರೀಟ್ ಕಾಡಿನಲ್ಲಿ ಮಕ್ಕಳಿಗೆ ಆಡುವುದಕ್ಕೆ ಸ್ಥಳವೇ ಇಲ್ಲ. ಒಂದಿಷ್ಟು ಮಕ್ಕಳು ಆಟದ ಮೈದಾನಕ್ಕಾಗಿ ಏನೆಲ್ಲ ಮಾಡುತ್ತಾರೆ ಎಂಬ ಈ ಚಿತ್ರವನ್ನು ಪಿ. ಶೇಷಾದ್ರಿ ನಿರ್ದೇಶಿಸಿದ್ದಾರೆ.

ಸರ್ಕಾರಿ ಹಿರಿಯ ಪ್ರಾರ್ಥಮಿಕ ಶಾಲೆ: ಕಾಸರಗೋಡಿನಲ್ಲಿರುವ ಕನ್ನಡ ಶಾಲೆಯನ್ನು ಮುಚ್ಚುವುದಕ್ಕೆ ಅಧಿಕಾರಿಗಳು ಮುಂದಾದಾಗ, ಅಲ್ಲಿ ಓದುವ ವಿದ್ಯಾರ್ಥಿಗಳೇ ಹೇಗೆ ತಮ್ಮ ಶಾಲೆಯನ್ನು ಉಳಿಸಿಕೊಳ್ಳುವ ಪ್ರಯತ್ನ ಮಾಡುತ್ತಾರೆ ಎಂದು ಮನರಂಜನಾತ್ಮಕವಾಗಿ ಹೇಳುವ ಈ ಚಿತ್ರದಲ್ಲಿ ಅನಂತ್ ನಾಗ್ ಪ್ರಮುಖ ಪಾತ್ರ ವಹಿಸಿದರೆ, ರಿಷಭ್ ಶೆಟ್ಟಿ ನಿರ್ದೇಶನ ಮಾಡಿದ್ದಾರೆ.

ಇಷ್ಟೇ ಅಲ್ಲ ... ಇದು ಉದಾಹರಣೆಗಳಷ್ಟೇ. ಕನ್ನಡದಲ್ಲಿ ‘ಕಳಸಾಪುರದ ಹುಡುಗರು’, ‘ಜಂಬೂ ಸವಾರಿ’, ‘ಮಕ್ಕಳ ಸಾಕ್ಷಿ’, ‘ಹೆಜ್ಜೆಗಳು’, ‘ದಂಗೆ ಎದ್ದ ಮಕ್ಕಳು;, ‘ಗುಬ್ಬಚ್ಚಿಗಳು’, ‘ಪುಟಾಣಿ ಪಾರ್ಟಿ’, ‘ಗಿರ್ವಿುಟ್’, ‘ಪ್ರಸಾದ್’ ಸೇರಿದಂತೆ ಮಕ್ಕಳಲ್ಲಿ ಸ್ಪೂರ್ತಿ ತುಂಬುವ ಹಲವು ಚಿತ್ರಗಳು ಇದುವರೆಗೂ ಬಿಡುಗಡೆಯಾಗಿವೆ.