ಅಂದರೆ ಒಂದು ಹಾಸ್ಯಪ್ರಧಾನ ಚಿತ್ರದ ಮೂಲಕ ಅವರು ಹೀರೋ ಆಗಿ ಪರದೆ ಮೇಲೆ ಬರಲಿದ್ದಾರೆ. ಇದುವರೆಗೆ ಸಣ್ಣಪುಟ್ಟ ಪಾತ್ರಗಳಲ್ಲಿ ರಂಜಿಸುತ್ತಲೇ ಬಂದಿರುವ ಚಿಕ್ಕಣ್ಣ, ಕೆಲವೊಂದು ಹಾಸ್ಯಪ್ರಧಾನ ಚಿತ್ರಗಳಲ್ಲಿ ಮೂರ್ನಾಲ್ಕು ಕಥಾನಾಯಕರಲ್ಲಿ ಒಬ್ಬರಾಗಿ ಕಾಣಿಸಿಕೊಂಡಿದ್ದರೂ ಏಕೈಕ ಹೀರೋ ಆಗಿ ಯಾವ ಚಿತ್ರದಲ್ಲಿ ನಟಿಸಿರಲಿಲ್ಲ. ಆದರೆ ಇದೀಗ ಆ ಅವಕಾಶ ಅವರಿಗೆ ಒದಗಿಬಂದಿದ್ದು, ‘ಸೋಲೋ ಹೀರೋ’ ಆಗಿ ಅವರು ತೆರೆ ಮೇಲೆ ಮಿಂಚಲಿದ್ದಾರೆ. ಸದ್ಯದಲ್ಲೇ ತೆರೆ ಕಾಣಲಿರುವ ‘ಶ್ರೀ ಭರತ ಬಾಹುಬಲಿ’ ಸಿನಿಮಾದಲ್ಲಿ ಹೀರೋ ಸ್ನೇಹಿತನಾಗಿ, ಒಂದರ್ಥದಲ್ಲಿ ಸೆಕೆಂಡ್ ಹೀರೋ ಆಗಿ ಕಾಣಿಸಿಕೊಂಡಿರುವ ಚಿಕ್ಕಣ್ಣ, ಇನ್ನು ಕೆಲವು ದಿನಗಳಲ್ಲಿ ಹೀರೋ ಆಗಿಯೇ ಕಾಣಿಸಿಕೊಳ್ಳಲಿದ್ದಾರೆ. ‘ಶ್ರೀ ಭರತ ಬಾಹುಬಲಿ’ ಚಿತ್ರಕ್ಕೆ ನಿರ್ದೇಶನ ಮಾಡುವ ಜತೆಗೆ ನಾಯಕನಾಗಿಯೂ ಕಾಣಿಸಿಕೊಂಡಿರುವ ಮಂಜು ಮಾಂಡವ್ಯ ಅವರೇ ಚಿಕ್ಕಣ್ಣ ನಾಯಕನಾಗಲಿರುವ ಸಿನಿಮಾಗೆ ನಿರ್ದೇಶನ ಮಾಡಲಿರುವುದು ವಿಶೇಷ. ಅದರಲ್ಲೂ ಸದ್ಯ ದರ್ಶನ್ ಅಭಿನಯದ ಅದ್ದೂರಿ ಸಿನಿಮಾ ‘ರಾಬರ್ಟ್’ಗೆ ಬಂಡವಾಳ ಹೂಡಿರುವ ಉಮಾಪತಿ ಶ್ರೀನಿವಾಸ್ ಅವರೇ ಈ ಚಿತ್ರಕ್ಕೆ ನಿರ್ವಪಕರಾಗಿರುವುದು ಮತ್ತೊಂದು ವಿಶೇಷ. ಈ ಮೂಲಕ ಚಿಕ್ಕಣ್ಣ ನಾಯಕನಾಗಿ ಕಾಣಿಸಲಿರುವ ಸಿನಿಮಾ ದೊಡ್ಡ ಮಟ್ಟದಲ್ಲೇ ಮೂಡಿಬರುವ ಸಾಧ್ಯತೆ ಇದೆ. ಅಂದಹಾಗೆ ಈ ಚಿತ್ರದ ಶೀರ್ಷಿಕೆ ಇನ್ನಷ್ಟೇ ನಿಗದಿ ಆಗಬೇಕಿದ್ದು, ಉಳಿದ ಕಲಾವಿದರ ಆಯ್ಕೆ ಕೂಡ ಇನ್ನಷ್ಟೇ ಆಗಬೇಕಿದೆ.
