‘777 ಚಾರ್ಲಿ’ ಚಿತ್ರತಂಡದವರು ಒಂದೊಳ್ಳೆಯ ಕೆಲಸ ಮಾಡಿದ್ದಾರೆ. ಚಿತ್ರದ ಮೂಲಕ ಬೀದಿ ನಾಯಿಗಳನ್ನು ದತ್ತುಪಡೆಯಿರಿ ಎಂಬ ಸಂದೇಶ ಸಾರಿದ ಚಿತ್ರತಂಡದವರು ಇದೀಗ ಐದು ದೇಸಿ ತಳಿ ನಾಯಿಗಳನ್ನು ದತ್ತು ಪಡೆದು ಸಾಕುತ್ತಿದ್ದಾರೆ. ಈ ಕುರಿತು ‘ವಿಜಯವಾಣಿ’ ಜತೆಗೆ ಮಾತನಾಡಿದ ನಿರ್ದೇಶಕ ಕಿರಣ್ ರಾಜ್, ‘ನಾನು, ರಕ್ಷಿತ್, ರಾಜ್ ಸೇರಿದಂತೆ ನಮ್ಮ ತಂಡದ ಐವರು, ಐದು ದೇಸಿ ತಳಿ ನಾಯಿಗಳನ್ನೇ ದತ್ತು ಪಡೆದು ಸಾಕುತ್ತಿದ್ದೇವೆ. ನಾನು ಹುಟ್ಟಿದಾಗಿನಿಂದ ಇಲ್ಲಿಯವರೆಗೂ ಸಾಕಿರುವುದು ದೇಸಿ ನಾಯಿಗಳನ್ನೇ. ಚಾರ್ಲಿ ಒಂದೇ ನನ್ನ ಬಳಿ ಇರುವ ಬೇರೆ ತಳಿಯ ನಾಯಿ. ಸಿನಿಮಾ ಮಾತ್ರವಲ್ಲ ನಮ್ಮ ನೈಜ ಜೀವನದಲ್ಲೂ ಈ ಸಂದೇಶವನ್ನು ಪಾಲಿಸುತ್ತಿದ್ದೇವೆ’ ಎನ್ನುತ್ತಾರೆ.
