ಹಿಂದೊಮ್ಮೆ, ಸಂಗೀತಾ ಅವರನ್ನು ಜನ ‘ಹರಹರ ಮಹಾದೇವ್’ ಧಾರಾವಾಹಿಯ ಸತಿ, ಪಾರ್ವತಿಯಾಗಿ ಗುರುತಿಸುತ್ತಿದ್ದರಂತೆ. ಈಗ ‘777 ಚಾರ್ಲಿ’ ಬಳಿಕ ಎಲ್ಲರೂ ದೇವಿಕಾ ಎನ್ನುತ್ತಿದ್ದಾರೆ ಎಂದು ನಗುತ್ತಾರೆ ಸಂಗೀತಾ. ಇನ್ನು ಚಿತ್ರದ ಚಿತ್ರೀಕರಣದ ಸಮಯದಲ್ಲಿ ಚಾರ್ಲಿ ಜತೆ ನಟಿಸುವಾಗ ತಾವು ಎದುರಿಸಿದ ಸವಾಲುಗಳ ಕುರಿತು ಹೇಳಿಕೊಳ್ಳುವ ಸಂಗೀತಾ, ‘ಪ್ರಾಣಿಗಳ ಜತೆ ಚಿತ್ರೀಕರಣ ಮಾಡುವುದು ಈಜಿ ಅಲ್ಲ. ಚಾರ್ಲಿ ಜತೆ ನಟಿಸುವಾಗ ಪ್ರತಿ ಟೇಕ್ ಕೂಡ ಬಹಳ ಸವಾಲಾಗಿತ್ತು. ಪ್ರತಿ ಶಾಟ್ ಕೂಡ 20, 30 ಟೇಕ್ಸ್ ಆಗುತ್ತಿತ್ತು. ಏಕೆಂದರೆ, ಚಾರ್ಲಿಯನ್ನು ನಿಯಂತ್ರಿಸುವುದು ಅಷ್ಟು ಕಷ್ಟ ಇತ್ತು. ಅದರ ತರಬೇತುದಾರ ಕ್ಯಾಮರಾಗೆ ಕಾಣದಂತೆ ಅದರ ಹತ್ತಿರವಿದ್ದು, ಅದಕ್ಕೆ ಗೈಡ್ ಮಾಡುತ್ತಿದ್ದರು. ಹೀಗಾಗಿ ಒಮ್ಮೊಮ್ಮೆ ನಮಗೂ ಗೊಂದಲವಾಗುತ್ತಿತ್ತು’ ಎಂದು ಅನುಭವ ಹಂಚಿಕೊಳ್ಳುತ್ತಾರೆ.
