ಈ ಚಿತ್ರದ ಕುರಿತು ‘ವಿಜಯವಾಣಿ’ ಜತೆಗೆ ಮಾತನಾಡುವ ನಾಗರಾಜ ಸೋಮಯಾಜಿ, ‘ಇದೊಂದು ತಾಯಿ ಸೆಂಟಿಮೆಂಟ್ ಕುರಿತಾದ ಚಿತ್ರ. ಅಮ್ಮನೇ ಎಲ್ಲದಕ್ಕೂ ಕಾರಣ ಮತ್ತು ಪರಿಹಾರ ಎಂದು ನಂಬಿರುವ ಮಗನ ಕಥೆ ಇದು. ಮಗನ ಪಾತ್ರದಲ್ಲಿ ನರ್ತನ್ ಇದ್ದಾರೆ. ಇನ್ನು, ತಾಯಿ ಪಾತ್ರಕ್ಕೆ ಹುಡುಕಾಟ ನಡೆದಿದೆ. ಸದ್ಯಕ್ಕೆ ನರ್ತನ್, ಚೈತ್ರಾ ಮತ್ತು ಸಂಪತ್ ಮೈತ್ರೇಯ ಆಯ್ಕೆಯಾಗಿದ್ದಾರೆ. ಮಿಕ್ಕ ಕಲಾವಿದರು ಇನ್ನಷ್ಟೇ ಫೈನಲ್ ಆಗಬೇಕು. ಜೂನ್ 15ರ ನಂತರ ಚಿತ್ರೀಕರಣ ನಡೆಯಲಿದೆ. ಬೆಂಗಳೂರು ಮತ್ತು ಹಳ್ಳಿಯೊಂದರಲ್ಲಿ 45 ದಿನಗಳ ಚಿತ್ರೀಕರಣ ಮಾಡುತ್ತೇವೆ’ ಎಂದು ಮಾಹಿತಿ ಕೊಡುತ್ತಾರೆ. ಈ ಕಥೆಯನ್ನು ಅವರು ಮೂರು ವರ್ಷಗಳ ಹಿಂದೆಯೇ ಮಾಡಿಟ್ಟುಕೊಂಡಿದ್ದರಂತೆ. ಈಗ ಸಂಧ್ಯಾರಾಣಿ ಅವರ ಜತೆಗೆ ಸೇರಿ ಚಿತ್ರಕತೆ ಮಾಡಿ, ಚಿತ್ರ ನಿರ್ದೇಶನಕ್ಕೆ ಅಣಿಯಾಗುತ್ತಿದ್ದಾರೆ.
