ಕರೊನಾ ಹಾವಳಿ ನಡುವೆ, ಇಂಥ ಗಡಿ ತಂಟೆ ತಕರಾರು ನಡೆಯುತ್ತದೆ ಎಂದು ಅಂದುಕೊಂಡಿರಲಿಲ್ಲ. ಆ ಗಡಿಯ ಬಗ್ಗೆ ತಿಳಿದುಕೊಳ್ಳುವ ಉದ್ದೇಶದಿಂದ ನಾನು ಡಾಕ್ಯುಮೆಂಟರಿಯೊಂದನ್ನು ನೋಡಿದೆ. ಗಾಲ್ವಾನ್ನಲ್ಲಿನ ವಾತಾವರಣ, ಕಡಿದಾದ ದಾರಿ, ಮೊನಚು ಕಲ್ಲುಗಳು ನಿಜಕ್ಕೂ ಭಯ ಹುಟ್ಟಿಸುತ್ತದೆ. ಅಂಥದರಲ್ಲಿ ಯಾವ ಕಾರಣಕ್ಕೆ ಈ ಸಂಘರ್ಷ ಎಂದೇ ಗೊತ್ತಾಗಲಿಲ್ಲ. ಜೀವ ನಮ್ಮವರದಾದರೇನು, ಚೀನಾದವರದಾದರೇನು. ಒಟ್ಟಿನಲ್ಲಿ ಎರಡೂ ಕಡೆಗಳಲ್ಲಿ ಸಾವು ನೋವಾಗಿದೆ. ಇದೆಲ್ಲವನ್ನು ಬದಿಗಿಟ್ಟರೆ, ನಮ್ಮ ಸೈನಿಕರೇ ನಮಗೆ ಮುಖ್ಯ. 20 ಜನ ಸಾವನ್ನಪ್ಪಿದ್ದಾರೆಂದರೆ ಅದು ಸಣ್ಣ ವಿಚಾರವೇ ಅಲ್ಲ. ಒಂದೊಂದು ಸಾವಿನ ಹಿಂದೆ ಅದೆಷ್ಟೂ ಕಥೆಗಳಿರುತ್ತವೆ, ಅದೆಷ್ಟು ಕಣ್ಣೀರಿರುತ್ತದೆ ಎಂಬುದನ್ನು ನಾವೆಲ್ಲ ನೋಡಿದ್ದೇವೆ. ಈ ಬಗ್ಗೆ ಕೇಂದ್ರ ಸರ್ಕಾರದ ನಿಲುವೇನು ಎಂಬುದನ್ನು ಹೇಳಬೇಕು. ಅತ್ಯುತ್ತಮ ನಾಯಕನನ್ನು ದೇಶ ಹೊಂದಿರುವುದರಿಂದ ಭಾರತ ಯಾವತ್ತೂ ಭರವಸೆ ಕಳೆದುಕೊಳ್ಳುವುದಿಲ್ಲ. ಇನ್ನು ಚೀನಾ ಉತ್ಪನ್ನಗಳ ಬಗ್ಗೆ ಹೇಳಬೇಕೆಂದರೆ, ನಾವೇ ನಮ್ಮವರಿಗಾಗಿ ವಸ್ತುಗಳನ್ನು ತಯಾರಿಸಬೇಕು. ಅದರಿಂದ ಸಣ್ಣಕೈಗಾರಿಕೆಗಳಿಗೆ ಅನುಕೂಲ ಆಗುತ್ತದೆ. ಉದ್ಯೋಗ ಸಿಗುತ್ತದೆ. ನಾನು ಏನೇ ಖರೀದಿ ಮಾಡಬೇಕೆಂದರೂ, ಎಲ್ಲಿ ಉತ್ಪಾದನೆಯಾಗಿದೆ ಎಂಬುದನ್ನು ನೋಡಿಯೇ ಖರೀದಿಸುತ್ತೇನೆ. ಗ್ರಾಮೀಣ ಪ್ರದೇಶದಲ್ಲಿ ಪೂರೈಕೆ ಕಡಿಮೆ ಇರುವುದರಿಂದ ಅನಿವಾರ್ಯವಾಗಿ ಖರೀದಿಸುತ್ತಾರೆ.
