ನಿರ್ದೇಶಕ ಶಶಾಂಕ್ ಯುವ ಜನರಿಗೆ ಹತ್ತಿರವಾಗುವ ಜತೆಗೆ ತಳುಕು-ಬಳುಕಿನ ಕಥೆ ಹೇಳುವುದರಲ್ಲಿ ನಿಸ್ಸೀಮರು. ಈ ಹಿಂದೆ ‘ಸಿಕ್ಸರ್’, ‘ಮೊಗ್ಗಿನ ಮನಸು’, ‘ಕೃಷ್ಣ-ಲೀಲಾ’, ‘ಲವ್ 360’ ಸಿನಿಮಾಗಳಲ್ಲಿ ಅದನ್ನು ಸಾಬೀತುಪಡಿಸಿದ್ದರು. ಅಂತೆಯೇ, ‘ಬ್ರ್ಯಾಟ್’ನಲ್ಲಿ ಕೂಡ ಕ್ರಿಕೆಟ್ ಬೆಟ್ಟಿಂಗ್ ಎಳೆಯನ್ನು ಇಟ್ಟುಕೊಂಡಿದ್ದಾರೆ. ಹಾಗಂತ, ಇದು ಬೆಟ್ಟಿಂಗ್ ವಿರುದ್ಧ ಸಾಮಾಜಿಕ ಜಾಗೃತಿ ಮೂಡಿಸುವ ಕಥೆ ಏನೆಲ್ಲ. ಬದಲಾಗಿ, ಜೂಜು-ಮೋಜಿನ ಸುತ್ತ ಸುತ್ತುವ ಮನರಂಜನಾತ್ಮಕ ಕಥೆ. ಮೊದಲರ್ಧ ಜೂಜಿನ ಬಗ್ಗೆ ಇದ್ದರೆ, ದ್ವಿತೀಯಾರ್ಧ ಮೋಜಿನ ಹಾಗೂ ನಾಯಕನ ಚಾಣಾಕ್ಷತನದ ಕಥೆಯಿದೆ. ಇಲ್ಲಿ ಪ್ರೇಕ್ಷಕರಿಗೆ ತಲೆಯಲ್ಲಿ ಹುಳು ಬಿಡುವುದಕ್ಕಿಂತ, ನಾಯಕ ಕೃಷ್ಣ ಅಲಿಯಾಸ್ ಕ್ರಿಸ್ಟಿ ತಲೆಯಲ್ಲಿ ಏನೆಲ್ಲ ಉಪಾಯಗಳಿವೆ ಎನ್ನುವುದೇ ಸಿನಿಮಾದಲ್ಲಿ ತೋರಿಸಲಾಗಿದೆ. ಕ್ಲೈಮ್ಯಾಕ್ಸ್ನಲ್ಲಿ ಆರ್ಸಿಬಿ ಮ್ಯಾಚ್ನಂತೆ ಸೀಟಂಚಲ್ಲಿ ಕೂರಿಸುವ ಥ್ರಿಲ್ಲಿಂಗ್ ಟಚ್ ನೀಡಲಾಗಿದೆ. ಹೀಗಾಗಿ, ಸಿನಿಮಾ ನೋಡಿಸಿಕೊಳ್ಳುತ್ತದೆ. ನಟ ‘ಡಾರ್ಲಿಂಗ್’ ಕೃಷ್ಣ ಜೂಜಿನ ಹುಡುಗನಾಗಿ, ಖತರ್ನಾಕ್ ಕಿಲಾಡಿಯಾಗಿ ಇಷ್ಟವಾಗುವಂತೆ ಅಭಿನಯಿಸಿದ್ದಾರೆ. ಮನಿಷಾ ಕಂದಕೂರ್ ನಟನೆಯಲ್ಲಿ ಕ್ಯೂಟ್ನೆಸ್ ಇದೆ. ಡ್ರಾೃಗನ್ ಮಂಜು ವಿಲನ್ ಆದರೂ, ಇಂಗ್ಲೀಷ್ ಮಾತನಾಡುತ್ತಲೇ ನಗಿಸುತ್ತಾರೆ. ಅಚ್ಯುತ್ ಕುಮಾರ್, ರಮೇಶ್ ಇಂದಿರಾ, ಮಾನಸಿ ಸುಧೀರ್ ಪಾತ್ರಗಳು ಅಚ್ಚುಕಟ್ಟಾಗಿ ಮೂಡಿಬಂದಿವೆ. ಅರ್ಜುನ್ ಜನ್ಯ ಸಂಗೀತದಲ್ಲಿ ಮೂಡಿಬಂದಿರುವ ‘ನಾನೆ ನೀನಂತೆ’ ಮತ್ತು ‘ಗಂಗಿ ಗಂಗಿ’ ಹಾಡುಗಳು ಕೇಳಲು, ನೋಡಲು ಅಂದವಾಗಿವೆ. ಹಿನ್ನೆಲೆ ಸಂಗೀತ ಕೂಡ ಭರ್ಜರಿಯಾಗಿ ಮೂಡಿಬಂದಿದೆ.
