Sholay 50 ವರ್ಷಗಳ ಬಳಿಕ ರಿ-ರಿಲೀಸ್​ ಆಗಲಿದೆ ಶೋಲೆ

Sholay - ಭಾರತೀಯ ಚಿತ್ರರಂಗದಲ್ಲೇ ಅತಿ ದೊಡ್ಡ ಯಶಸ್ಸು ಗಳಿಸಿದ ಸಿನಿಮಾಗಳ ಪೈಕಿ ಅಮಿತಾಭ್​ ಬಚ್ಚನ್​, ಧಮೇರ್ಂದ್ರ, ಹೇಮಾ ಮಾಲಿನಿ, ಜಯಾ ಬಚ್ಚನ್​ ಅಭಿನಯದ ರಮೇಶ್​ ಸಿಪ್ಪಿ ನಿರ್ದೇಶನದ "ಶೋಲೆ' ಮೊದಲ ಸಾಲಿನಲ್ಲಿ ನಿಲ್ಲುತ್ತದೆ. 1975ರ ಆ. 15ರಂದು ರಿಲೀಸ್​ ಆಗಿದ್ದ ಈ ಚಿತ್ರ ಅಂದು 10 ಪಟ್ಟು ಲಾಭ ಗಳಿಸಿತ್ತು. ಮೂರು ಕೋಟಿ ರೂ. ಬಜೆಟ್​ನಲ್ಲಿ ನಿರ್ಮಾಣವಾಗಿದ್ದ "ಶೋಲೆ'ಯನ್ನು ಆಗ ಬರೋಬ್ಬರಿ 25 ಕೋಟಿ ಜನ ವೀಸಿದ್ದರು.

ಈಗ್ಗೆ 50 ವರ್ಷಗಳ ಹಿಂದೆಯೇ ₹35 ಕೋಟಿಗೂ ಹೆಚ್ಚು ಕಲೆಕ್ಷನ್​ ಮಾಡಿಕೊಂಡಿದ್ದ ಚಿತ್ರವಿದು. ಇವತ್ತಿನ ಮಾರ್ಕೆಟ್​ಗೆ ಅದು ₹3,200 ಕೋಟಿ ಎಂದು ಅಂದಾಜಿಸಲಾಗಿದೆ. ಇಂತಹ ಇಂಡಸ್ಟ್ರಿ ಹಿಟ್​ "ಶೋಲೆ' ಇದೀಗ ಐದು ದಶಕಗಳ ಬಳಿಕ ಮತ್ತೆ ತೆರೆಗೆ ಬರಲು ರೆಡಿಯಾಗಿದೆ. ಹೌದು, ಚಿತ್ರವನ್ನು ಇದೇ ಡಿ. 12ರಂದು ಮರುಬಿಡುಗಡೆ ಮಾಡಲು ಸಿಪ್ಪಿ ಫಿಲಂಸ್​ ನಿರ್ಮಾಣ ಸಂಸ್ಥೆ ಘೋಷಿಸಿದೆ.

ಲಂಡನ್​ನ ತಾಂತ್ರಿಕ ತಂಡವೊಂದರ ಸಹಾಯದೊಂದಿಗೆ ಅತ್ಯಾಧುನಿಕ ತಂತ್ರಜ್ಞಾನ ಬಳಸಿ ಚಿತ್ರಕ್ಕೆ ಹೊಸ ರೂಪ ನೀಡಲಾಗಿದೆ. ತುರ್ತು ಪರಿಸ್ಥಿತಿ ಸಮಯದಲ್ಲಿ ಸಿನಿಮಾ ಬಿಡುಗಡೆಯಾಗಿದ್ದ ಕಾರಣ, ಸೆನ್ಸಾರ್​ ಬೋರ್ಡ್​ನವರು ತೀವ್ರ ಕಟ್ಟುನಿಟ್ಟು ವಹಿಸಿದ್ದರು. ಹೀಗಾಗಿ ಚಿತ್ರದ ಕ್ಲೆಮ್ಯಾಕ್ಸ್​ ಬದಲಿಸಿದ್ದ ನಿರ್ದೇಶಕ ರಮೇಶ್​ ಸಿಪ್ಪಿ, ಮರು ಚಿತ್ರೀಕರಣ ನಡೆಸಿದ್ದರು. ಬಳಿಕ "ಶೋಲೆ' ಟಿವಿ, ಒಟಿಟಿಯಲ್ಲೂ ಹೊಸ ಕ್ಲೆಮ್ಯಾಕ್ಸ್​ನಲ್ಲಿಯೇ ಪ್ರಸಾರವಾಗಿತ್ತು. ಆದರೆ, ಇದೀಗ 50 ವರ್ಷಗಳ ಬಳಿಕ ಚಿತ್ರತಂಡ ಸೆನ್ಸಾರ್​ ಬೋರ್ಡ್​ ಕತ್ತರಿ ಹಾಕಿಸಿದ್ದ ಕ್ಲೆಮ್ಯಾಕ್ಸ್​ಅನ್ನೇ ಚಿತ್ರಕ್ಕೆ ಸೇರಿಸಿದೆ. ಹೀಗಾಗಿ ಹಳೆ "ಶೋಲೆ' ಚಿತ್ರದ ಹೊಸ ವರ್ಷನ್​ ಬಗ್ಗೆ ಕುತೂಹಲವೂ ಹೆಚ್ಚಿದೆ.