ಭಾಂಗ್ರಾ ಮತ್ತು ಭಾರತೀಯ ಪಾಪ್ ಸಂಗೀತವನ್ನು ವಿಶ್ವಾದ್ಯಂತ ಕೊಂಡೊಯ್ದ ಹೆಗ್ಗಳಿಕೆ ಗಾಯಕ ದೇಲರ್ ಮೆಹಂದಿಗೆ ಸಲ್ಲುತ್ತದೆ. "ಬೋಲೋ ತಾರಾರಾ', "ದರ್ದಿ ರಬ್ ರಬ್', "ಬಲ್ಲೆ ಬಲ್ಲೆ', "ನಾ ನಾ ನಾ ರೆ', "ತುನಕ್ ತುನಕ್ ತುನ್'... ಹೀಗೆ 90ರ ದಶಕದಲ್ಲಿಯೇ ಅವರ ಸಿನಿಮಾ ಮತ್ತು ಆಲ್ಬಂ ಹಾಡುಗಳು ವಿಶ್ವಾದ್ಯಂತ ಕೋಟ್ಯಂತರ ಜನರನ್ನು ತಲುಪಿದ್ದವು. ಭಾರತದಲ್ಲಿ ಮಾತ್ರವಲ್ಲದೇ 30ಕ್ಕೂ ಅಧಿಕ ದೇಶಗಳಲ್ಲಿ ಸಂಗೀತ ಕಾರ್ಯಕ್ರಮ ನೀಡಿರುವ ಹೆಗ್ಗಳಿಕೆ ದಲೇರ್ಗೆ ಸಲ್ಲುತ್ತದೆ. ಆದರೆ, 2024ರಿಂದ ಅನಾರೋಗ್ಯಕ್ಕೀಡಾಗಿದ್ದ ಅವರು, ಸಂಗೀತ ಕಾರ್ಯಕ್ರಮಗಳಿಂದ ದೂರ ಉಳಿದಿದ್ದರು. ಸದ್ಯ ಚೇತರಿಸಿಕೊಳ್ಳುತ್ತಿದ್ದು ಅದರ ನಡುವೆಯೇ ಕಳೆದ ಶುಕ್ರವಾರ (ಅ.18) ಉತ್ತರಾಖಂಡ್ನ ತೆಹ್ರಿ ಜಿಲ್ಲೆಯಲ್ಲಿ ಆಯೋಜಿಸಲಾಗಿದ್ದ ಕುಂಜಾಪುರಿ ಹಬ್ಬದಲ್ಲಿ ಪಾಲ್ಗೊಂಡಿದ್ದರು. ಸಂಗೀತ ಕಾರ್ಯಕ್ರಮ ನೀಡುತ್ತಿದ್ದ ವೇಳೆ ಉತ್ತರಾಖಂಡ ಆರೋಗ್ಯ ಮತ್ತು ವೈದ್ಯಕಿಯ ಶಿಕ್ಷಣ ಸಚಿವ ಸುಬೋಧ್ ಉನ್ಯಾಲ್ ದಲೇರ್ ಹಾಡುತ್ತಿಲ್ಲ, ಲಿಪ್ ಸಿಂಕ್ ಮಾಡುತ್ತಿದ್ದಾರಷ್ಟೆ. ಮಾತನಾಡುವುದಿರಲಿ, ಅವರಿಂದ ನಿಲ್ಲಲೂ ಆಗುತ್ತಿಲ್ಲ ಎಂದು ಕಾರ್ಯಕ್ರಮ ನಿಲ್ಲಿಸಿ, ಅಲ್ಲಿಂದ ತೆರಳಲು ಸೂಚಿಸಿದರು. ಸಚಿವ ಮತ್ತು ಸಿಂಗರ್ ನಡುವಿನ ಗಲಾಟೆ ಜಾಲತಾಣದಲ್ಲಿ ವೈರಲ್ ಆಗಿತ್ತು. ಅದರ ಬೆನ್ನಲ್ಲೇ ಕಪಿಲ್ ಶರ್ಮಾ, ಅನುಪಮ್ ಖೇರ್, ಬಾದ್ಶಾ, ಶಾನ್, ಹರ್ಷದೀಪ್ ಕೌರ್ ಸೇರಿ ಹಲವು ಬಾಲಿವುಡ್ ಸಿಂಗರ್ಗಳು ಮತ್ತು ನಟರು ಗಾಯಕನ ಪರ ಧ್ವನಿಯೆತ್ತಿದ್ದಾರೆ. ಉತ್ತರಾಖಂಡ ಸಚಿವ ವೇದಿಕೆಯಲ್ಲಿ ದಲೇರ್ ವಿರುದ್ಧ ಮಾತನಾಡಿದ್ದನ್ನು ವಿರೋಧಿಸಿದ್ದಾರೆ. ಹಾಗೇ ದಲೇರ್ ಸಹೋದರ ಗಾಯಕ ಮಿಕಾ ಸಿಂಗ್, "ನನ್ನ ಅಣ್ಣ ಮದ್ಯಪಾನ ಮಾಡುವುದಿಲ್ಲ. ಅವರು ಮದ್ಯ ಸೇವಿಸುವುದನ್ನು ಯಾರಾದರೂ ಪ್ರೂವ್ ಮಾಡಿದರೆ, ನಾನು ಗಾಯನದಿಂದ ನಿವೃತ್ತಿ ಪಡೆಯುತ್ತೇನೆ' ಎಂದು ಸವಾಲು ಹಾಕಿದ್ದಾರೆ. ಮತ್ತೊಂದೆಡೆ ತಮ್ಮನ್ನು ಸಮರ್ಥಿಸಿಕೊಂಡಿರುವ ಸಚಿವ ಸುಬೋಧ್, "ದಲೇರ್ ದೊಡ್ಡ ಗಾಯಕರು ಎಂಬುದನ್ನು ಒಪು$್ಪತ್ತೇನೆ. ಆದರೆ, ಅವರು ತಮ್ಮ ಕಲೆಗೆ ನ್ಯಾಯ ನೀಡಬೇಕಲ್ಲವೇ? ₹35 ಲಕ್ಷ ಸಂಭಾವನೆ ಕೊಟ್ಟಿದ್ದೇವೆ. ಅವರಿಗೆ ಆರೋಗ್ಯ ಸರಿಯಿಲ್ಲದಿದ್ದರೆ, ಕಾರ್ಯಕ್ರಮಕ್ಕೆ ಬರಬಾರದಿತ್ತು' ಎಂದಿದ್ದಾರೆ.
