Shanaya Kapoor Interview; ಗಾಂಧಾರಿಯಾದ ಶನಾಯಾ - ಬಾಲಿವುಡ್​ಗೆ ಎಂಟ್ರಿ ಕೊಟ್ಟ ಕಪೂರ್​ ಕುಟುಂಬದ ಮೂರನೇ ತಲೆಮಾರಿನ ಕುಡಿ

| ಹರ್ಷವರ್ಧನ್​ ಬ್ಯಾಡನೂರು

ಬಾಲಿವುಡ್​ನ ಹೆಸರಾಂತ ಕಪೂರ್​ ಮನೆತನಕ್ಕೆ ಸೇರಿದ ಹುಡುಗಿ ಶನಾಯಾ ಕಪೂರ್​. ಅಪ್ಪ ಸಂಜಯ್​ ಕಪೂರ್​ ಮತ್ತು ದೊಡ್ಡಪ್ಪ ಅನಿಲ್​ ಕಪೂರ್​ ಹಿಂದಿ ಚಿತ್ರರಂಗದಲ್ಲಿ ಸ್ಟಾರ್​ಗಳಾಗಿದ್ದರೆ, ಮತ್ತೊಬ್ಬ ದೊಡ್ಡಪ್ಪ ಬೋನಿ ಕಪೂರ್​ ನಿರ್ಮಾಣದಲ್ಲಿ ದೊಡ್ಡ ಹೆಸರು. ಇದೀಗ ಶನಾಯಾ "ಆಂಖೋನ್​ ಕಿ ಗುಸ್ತಾಖಿಯಾ' ಮೂಲಕ ನಾಯಕಿಯಾಗಿ ಚಿತ್ರರಂಗಕ್ಕೆ ಪದಾರ್ಪಣೆ ಮಾಡುತ್ತಿದ್ದಾರೆ. ಸಂತೋಷ್​ ಸಿಂಗ್​ ನಿರ್ದೇಶನದ ಈ ರೊಮ್ಯಾಂಟಿಕ್​ ಡ್ರಾಮಾದಲ್ಲಿ ಶನಾಯಾ "12 ಫೇಲ್​', "ಮಿಜಾಪುರ್​' ಖ್ಯಾತಿಯ ವಿಕ್ರಾಂತ್​ ಮಸ್ಸೆಗೆ ಜೋಡಿಯಾಗಿದ್ದು, ಸಿನಿಮಾ ಇದೇ ಜು. 11ರಂದು ತೆರೆಗೆ ಬರಲಿದೆ. ಇದೇ ಖುಷಿಯಲ್ಲಿ ಇತ್ತೀಚೆಗಷ್ಟೆ ವಿಜಯವಾಣಿ ಜತೆ ಮಾತಿಗೆ ಸಿಕ್ಕಿದ್ದ ಶನಾಯಾ ಮುಕ್ತವಾಗಿ ಹಲವು ವಿಷಯಗಳ ಬಗ್ಗೆ ಮಾತನಾಡಿದರು.

* ಆಂಖೋನ್​ ಕಿ ಗುಸ್ತಾಖಿಯಾ ತಂಡ ಸೇರಿದ್ದು ಹೇಗೆ?

- ನಾನು ಬೇರೆ ಪ್ರಾಜೆಕ್ಟ್​ ಆಡಿಷನ್​ಗೆ ಹೋಗಿದ್ದೆ. ಆಡಿಷನ್​ ಚೆನ್ನಾಗಿ ಆಯಿತು. ಆದರೆ ಆ ಪ್ರಾಜೆಕ್ಟ್​ ಪ್ರಾರಂಭವಾಗಲಿಲ್ಲ. ಆದರೆ, ಆ ಆಡಿಷನ್​ ವಿಡಿಯೋ ನೋಡಿದ ಈ ಚಿತ್ರದ ನಿರ್ದೇಶಕ ಸಂತೋಷ್​, ನನ್ನನ್ನು ಭೇಟಿ ಮಾಡಿದರು. ಕಥೆ ಹೇಳಿದರು. ಇಷ್ಟವಾಯಿತು. ತಂಡ ಸೇರಿಕೊಂಡೆ. ಇದು ಹೊಸ ರೀತಿಯ, ಶುದ್ಧ, ಪ್ರಾಮಾಣಿಕ ಕಥೆ. ಪ್ರತಿ ಸೀನ್​ನಲ್ಲೂ ಪ್ಯೂರಿಟಿ ಇದೆ. ಮನರಂಜನೆಯ ಜತೆಗೆ ಪ್ರೀತಿಯ ಬಗ್ಗೆ ತುಂಬ ಕಲಿಯುವ ವಿಷಯಗಳಿವೆ.

* ನಿಮ್ಮ ಪಾತ್ರ ಮಹಾಭಾರತದ ಗಾಂಧಾರಿಯನ್ನು ನೆನಪಿಸುವಂತಿದೆ. ಸಿದ್ಧತೆ ಹೇಗಿತ್ತು?

- ಹೌದು, ಚಿತ್ರದ ಹಾಡುಗಳು ಮತ್ತು ಟೀಸರ್​ ನೋಡಿದ ಹಲವರು ಈ ಹೋಲಿಕೆ ಮಾಡಿದ್ದಾರೆ. ಖುಷಿ ಮತ್ತು ಹೆಮ್ಮೆಯಾಗುತ್ತಿದೆ. ಆದರೆ, ಕಥೆ ಬಿಟ್ಟುಕೊಡುವಂತಿಲ್ಲ. ಹೀಗಾಗಿ ಈಗಲೇ ನಾನೇನೂ ಹೇಳಲಾರೆ. ನಾನಿಲ್ಲಿ ರಂಗಭೂಮಿಕೆ ಕಲಾವಿದೆ ಪಾತ್ರದಲ್ಲಿ ನಟಿಸಿದ್ದೇನೆ. ಕಥೆ ಕೇಳುವಾಗಲೇ ಕಣ್ಣಿಲ್ಲದಂತೆ ನಟಿಸುವುದು ಹೇಗೆ ಅಂತ ಸ್ವಲ್ಪ ನರ್ವಸ್​ ಆಗಿದ್ದೆ. ಕಲಾವಿದರಿಗೆ ಕಣ್ಣೇ ಮುಖ್ಯ. ಕಣ್ಣಿಲ್ಲದೇ ಭಾವನೆಗಳನ್ನು ತೋರಿಸುವುದು, ಜನರಿಗೆ ಅರ್ಥ ಮಾಡಿಸುವುದು ಸವಾಲಿನ ಕೆಲಸ. ಹೀಗಾಗಿಯೇ 10 ದಿನಗಳ ವರ್ಕ್​ಶಾಪ್​ ಮಾಡಿದೆ. ಕಣ್ಣಿಗೆ ಪಟ್ಟಿ ಧರಿಸಿ ಬೀಚ್​ನಲ್ಲಿ ಓಡಾಡುತ್ತಿದ್ದೆ, ಹಲ್ಲು ಉಜ್ಜುವುದು ಸೇರಿ ಹಲವು ಟಾಸ್ಕ್​ಗಳನ್ನು ಮಾಡಿದೆ. ಬಾಡಿ ಲಾಂಗ್ವೇಜ್​, ಕಂಠದ ಏರಿಳಿತ ಎಲ್ಲದರ ಬಗ್ಗೆಯೂ ಗಮನಹರಿಸಿದೆ. ಈ ಪಾತ್ರಕ್ಕೆ ಸಿದ್ಧತೆಯೇ ಸವಾಲಿನ ಹಾಗೂ ಸುಂದರ ಜರ್ನಿ.

* ವಿಕ್ರಾಂತ್​ ಮಸ್ಸೆ ಜತೆ ನಟಿಸಿದ ಅನುಭವ ಹೇಗಿತ್ತು?

- ಅದ್ಭುತವಾಗಿತ್ತು. ಅವರ ಜತೆ ನಟಿಸಲು ಅವಕಾಶ ಸಿಕ್ಕಿದ್ದೇ ದೊಡ್ಡ ವಿಷಯ. ನಿರ್ದೇಶಕರು ವರ್ಕ್​ಶಾಪ್​ ಕೊನೆಯ ದಿನ ನನಗೆ ಇಷ್ಟು ದಿನ ಕಲಿತಿದ್ದನ್ನು ಮರೆತುಬಿಡು, ಸೆಟ್​ನಲ್ಲಿ ವಿಕ್ರಾಂತ್​ ಏನು ಮಾಡುತ್ತಾರೆ? ಏನು ಹೇಳುತ್ತಾರೆ? ನೋಡಿ, ಕೇಳಿ ಕಲಿ ಎಂದರು. ನಾನು ಅದನ್ನೇ ಫಾಲೋ ಮಾಡಿದೆ. ವಿಕ್ರಾಂತ್​ರಿಂದ ಮತ್ತಷ್ಟು ಉತ್ತಮ ಕಲಾವಿದೆಯಾದೆ.

* ನಿಮ್ಮ ಕುಟುಂಬದಲ್ಲೇ ಹಲವು ಸ್ಟಾರ್​ಗಳಿದ್ದಾರೆ.

- ಹೌದು, ಸೆಟ್​ನಲ್ಲಿ ಹೀಗಾಯಿತು, ಹಾಗಾಯಿತು ಅಂತ ಹಾಗೇ ಬೇರೆ ಸಿನಿಮಾಗಳ ಕುರಿತು ಚರ್ಚಿಸುತ್ತಿರುತ್ತೇವೆ. ಜತೆಗೆ ನನ್ನ ಕೆಲಸದ ಬಗ್ಗೆ ಎಲ್ಲರ ಪ್ರತಿಕ್ರಿಯೆ ಪಡೆಯುತ್ತೇನೆ. ಹೊಸ ಕಥೆ ಬಂದಾಗ ಅಪ್ಪ, ಅಮ್ಮನ ಜತೆ ಡಿಸ್ಕಸ್​ ಮಾಡುತ್ತೇನೆ. ಅಪ್ಪ ಕಥೆ ಕೇಳಿ ಅವರ ಅಭಿಪ್ರಾಯ ತಿಳಿಸುತ್ತಾರೆ. ಬಳಿಕ ನಾನು ಮಾಡಬಲ್ಲೆನಾ? ಇದು ವಿಭಿನ್ನವಾಗಿದೆಯಾ? ಅಂತ ನಾನೇ ನಿರ್ಧರಿಸುತ್ತೇನೆ. ಸಿನಿಮಾ ಅಂತಲ್ಲ ನನ್ನ ಬದುಕಿನ ಎಲ್ಲ ವಿಷಯಗಳಲ್ಲೂ ಅಪ್ಪ, ಅಮ್ಮನ ಬಳಿ ಸಲಹೆ ಪಡೆಯುತ್ತೇನೆ.

* ಕನ್ನಡ ಸಿನಿಮಾ ನೋಡಿದ್ದೀರಾ?- ಕೆಲಸದ ನಿಮಿತ್ತ ಬೆಂಗಳೂರಿಗೆ ಹಲವು ಬಾರಿ ಬಂದಿದ್ದೇನೆ. ನನಗೆ ನಟಿ ರಾಗಿಣಿ ದ್ವಿವೇದಿ ಗೊತ್ತು. ಅವರಿಂದಲೂ ಆಗಾಗ ಸಿನಿಮಾಗಳ ಬಗ್ಗೆ ಸಲಹೆ ಪಡೆಯುತ್ತಿರುತ್ತೇನೆ. ಕನ್ನಡ ಸೇರಿ ಹಲವು ದಕ್ಷಿಣ ಭಾರತದ ಸಿನಿಮಾಗಳನ್ನು ನೋಡಿದ್ದೇನೆ.