ಬೆಂಗಳೂರು: ಕನ್ನಡದ ಕಿರುತೆರೆಯ ವಿವಿಧ ವಿಭಾಗಗಳಲ್ಲಿ ಕೆಲಸ ಮಾಡಿದ್ದ ಸಿಂಧನೂರು ತಾಲೂಕು ದಡೇಸೂಗೂರಿನ ಆಯುಷ್ ಮಲ್ಲಿ ‘ಫಸ್ಟ್ ಲವ್’ ಮೂಲಕ ಡೈರೆಕ್ಟರ್ ಕ್ಯಾಪ್ ಧರಿಸಿದವರು. ಇದೀಗ ಅವರ ನಿರ್ದೇಶನದ ಎರಡನೇ ಸಿನಿಮಾ ‘ಪಪ್ಪಿ’ ಬಿಡುಗಡೆಗೆ ಸಿದ್ಧವಾಗಿದೆ. ಇತ್ತೀಚೆಗಷ್ಟೇ ಟ್ರೇಲರ್ ಬಿಡುಗಡೆ ಮಾಡಲಾಗಿದ್ದು, ಎಲ್ಲೆಡೆ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗುತ್ತಿದೆ. ಉತ್ತರ ಕರ್ನಾಟಕದಿಂದ ಬೆಂಗಳೂರಿಗೆ ದುಡಿಯಲು ಬರುವ ವಲಸೆ ಕಾರ್ಮಿಕರ ಬದುಕು ಹಾಗೂ ಇಬ್ಬರ ಬಾಲಕರ ಮುಗ್ಧತೆಯ ಕುರಿತ ‘ಪಪ್ಪಿ’ ಚಿತ್ರವನ್ನು ಜವಾರಿ ಸೊಗಡಿನ ಸಂಭಾಷಣೆಯಲ್ಲೇ ಚಿತ್ರಿಸಲಾಗಿದೆ. ಸಿನಿಮಾ ಕುರಿತು ಆಯುಷ್, ‘ಉತ್ತರ ಕರ್ನಾಟಕ ಭಾಗದ ಜನರು ಹೊಟ್ಟೆಪಾಡಿಗಾಗಿ ಬೆಂಗಳೂರಿಗೆ ಬರುವ ದೃಶ್ಯಗಳನ್ನು ಹಲವಾರು ಬಾರಿ ನೋಡಿದ್ದೆ. ಇದನ್ನೇ ದೃಶ್ಯದ ಮೂಲಕ ತೋರಿಸಬೇಕು ಎಂದು ನಿರ್ಧರಿಸಿದೆ. ವಲಸೆ ಕಾರ್ಮಿಕರ ಭಾವನೆ ಹಾಗೂ ಮುಗ್ಧತೆ ತೋರಿಸುವುದರ ಜತೆಗೆ ಬೆಂಗಳೂರು-ಉತ್ತರ ಕರ್ನಾಟಕದ ಸಂಬಂಧದ ಬಗ್ಗೆ ‘ಪಪ್ಪಿ’ಯಲ್ಲಿ ಬೆಳಕು ಚೆಲ್ಲಲಾಗಿದೆ. ಹಾಸ್ಯ, ಎಮೋಷನ್ಸ್ ಜತೆಗೆ ಗಂಭೀರ ವಿಚಾರಗಳನ್ನೂ ಹೇಳಲು ಪ್ರಯತ್ನಿಸಿದ್ದೇವೆ. ಬೆಂಗಳೂರಿನ ಮಾನ್ಯತಾ ಟೆಕ್ ಪಾರ್ಕ್ ಬಳಿ, ಕೊಪ್ಪಳದ ಗುನ್ನಾಳದಲ್ಲಿ 15 ದಿನಗಳ ಕಾಲ ಶೂಟಿಂಗ್ ನಡೆಸಿದ್ದೇವೆ. ಬಾಲ ನಟರಾದ ಪರಶುರಾಮ (ಜಗದೀಶ್), ಆದಿ ಮುಖ್ಯಭೂಮಿಕೆಯಲ್ಲಿದ್ದಾರೆ’ ಎಂದು ಮಾಹಿತಿ ನೀಡುತ್ತಾರೆ.
