ಈ ಚಿತ್ರದಲ್ಲಿ ವಿನಯ್ ಒನ್ ಮ್ಯಾನ್ ಆರ್ಮಿ. ನಿರ್ದೇಶನ, ನಟನೆ ಹಾಗೂ ನಿರ್ಮಾಣ ಜವಾಬ್ದಾರಿಗಳನ್ನು ನಿರ್ವಹಿಸಿದ್ದಾರೆ. ಇನ್ನು ಅವರು ಆಯ್ಕೆ ಮಾಡಿಕೊಂಡಿರುವ ಕಥೆ ವಿಭಿನ್ನ ಅನಿಸುತ್ತದೆ. ಇಡೀ ಕಥೆ ಮೌನದಲ್ಲಿಯೇ ಸಾಗುತ್ತದೆ. ಪ್ರೀತಿ-ದ್ವೇಷದ ಅಂಶಗಳು ಇರುವ ಕಾರಣ ಇನ್ನೊಂದಿಷ್ಟು ರೋಚಕತೆ ಸೃಷ್ಟಿಸುವ ಅವಕಾಶ ಇತ್ತು. ಸುಂದರ ಕಡಲು, ಕಣ್ಮನ ಸೆಳೆಯುವ ದೃಶ್ಯಗಳು, ಪಾತ್ರಗಳ ಭಾವುಕತೆಯೇ ಕಥೆಯ ಜೀವಾಳ. ಇಡೀ ಚಿತ್ರವನ್ನು ವಿನಯ್ ಹೊತ್ತು ಸಾಗಿದ್ದಾರೆ. ಕೆಲ ಭಾವುಕ ದೃಶ್ಯಗಳಲ್ಲಿ ಗಮನಸೆಳೆಯುತ್ತಾರೆ. ಬಲ ರಾಜವಾಡಿ ಗತ್ತು, ಜಗ್ಗಪ್ಪ, ವಿನಯ್ ಗೊಬ್ಬರಗಾಲ ಕಾಮಿಡಿ ಇಷ್ಟವಾಗುತ್ತದೆ. ನಟಿಯರಾದ ರಿಷಿ ಗೌಡ, ಪ್ರಕೃತಿ ಪ್ರಸಾದ್ ಪಾತ್ರಗಳನ್ನು ಅಚ್ಚುಕಟ್ಟಾಗಿ ನಿರ್ವಹಿಸಿದ್ದಾರೆ. ‘ಆಸ್ಟಿನ್’ ಮೌನದ ಪಯಣವನ್ನು ಛಾಯಾಗ್ರಾಹಕರಾದ ರಾಜ್ಕಾಂತ್, ಶ್ರೀನಿವಾಸ್ ಸುಂದರವಾಗಿ ಸೆರೆ ಹಿಡಿದಿದ್ದಾರೆ. ವಿಶ್ವಂಭರ ಸಂಗೀತ ಇಡೀ ಕಥೆಯನ್ನು ಆವರಿಸಿಕೊಳ್ಳುತ್ತದೆ. ಇಡೀ ಚಿತ್ರವು ಪಾತ್ರಗಳು ಪರಿಚಯವಾಗಿದ್ದು, ನೈಜ ಕಥೆ ಮುಂದಿನ ಭಾಗದಲ್ಲಿ ತೆರೆದುಕೊಳ್ಳಲಿದೆ.
