ಬೇರೆ ಭಾಷೆಗಳಲ್ಲಿ ನಟಿಸದಿರುವುದಷ್ಟೇ ಅಲ್ಲ, ಯಾವುದೇ ಕಾರ್ಯಕ್ರಮದಲ್ಲಿ ಭಾಗವಹಿಸಿದರೂ, ಅದರಲ್ಲಿ ಕನ್ನಡದಲ್ಲೇ ಮಾತನಾಡುತ್ತಿದ್ದುದು ರಾಜಕುಮಾರ್ ಅವರ ಇನ್ನೊಂದು ವೈಶಿಷ್ಟ್ಯ. ಅದೊಮ್ಮೆ, ಎಂ.ಜಿ.ಆರ್ ಅವರು ಭಾಗವಹಿಸಿದ್ದ ಸಮಾರಂಭವೊಂದರಲ್ಲಿ ರಾಜಕುಮಾರ್ ಅವರಿಗೂ ಆಹ್ವಾನಿಸಿ, ಅನೌನ್ಸ್ ಮಾಡಲಾಗಿತ್ತು. ಈ ಸಮಾರಂಭದಲ್ಲಿ ಭಾಗವಹಿಸಿದ ರಾಜಕುಮಾರ್, ಕನ್ನಡದಲ್ಲಿ ಮಾತನಾಡುವುದಕ್ಕೆ ಶುರು ಮಾಡುತ್ತಿದ್ದಂತೆ, ಜನರು ತಮಿಳಿನಲ್ಲಿ ಮಾತನಾಡುವುದಕ್ಕೆ ಒತ್ತಾಯ ಮಾಡಿದರಂತೆ. ಈ ಸಂದರ್ಭದಲ್ಲಿ ಮೈಕೆತ್ತಿಕೊಂಡ ಎಂಜಿಆರ್, ‘ಅವರು ಬೇರೆ ಭಾಷೆಯಲ್ಲೇನಾದರೂ ನಟಿಸಿದ್ದಿದ್ದರೆ ನಾವ್ಯಾರೂ ಇರುತ್ತಿರಲಿಲ್ಲ. ಅವರು ಕನ್ನಡವನ್ನೇ ಉಸಿರಾಗಿಸಿಕೊಂಡವರು. ಕನ್ನಡ ಬಿಟ್ಟು ಬೇರೆ ಯಾವ ಭಾಷೆಗೂ ಹೋಗದವರು. ಅವರು ಅವರ ಭಾಷೆಯಲ್ಲಿ ಮಾತನಾಡುತ್ತಾರೆ’ ಎಂದು ಎಲ್ಲರನ್ನು ಸುಮ್ಮನಿರಿಸಿದರಂತೆ. ಇದು ರಾಜಕುಮಾರ್ ಅವರು ಕನ್ನಡ ಭಾಷೆಯ ಮೇಲೆ ಇಟ್ಟಿದ್ದ ಪ್ರೀತಿ ಮತ್ತು ಗೌರವ. ಈ ಪ್ರೀತಿಗೆ ಬೆಲೆ ಕಟ್ಟಲು ಸಾಧ್ಯವೇ?
