ಬೆಂಗಳೂರು: ಶಿವರಾಜಕುಮಾರ್, ಉಪೇಂದ್ರ ಮತ್ತು ರಾಜ್ಬಿ. ಶೆಟ್ಟಿ ಮುಖ್ಯ ಭೂಮಿಕೆಯಲ್ಲಿ ನಟಿಸುತ್ತಿರುವ, ಸಂಗೀತ ನಿರ್ದೇಶಕ ಅರ್ಜುನ್ ಜನ್ಯ ಮೊದಲ ಬಾರಿಗೆ ಆ್ಯಕ್ಷನ್-ಕಟ್ ಹೇಳುತ್ತಿರುವ ಬಹುನಿರೀಕ್ಷಿತ ಪ್ಯಾನ್ ಇಂಡಿಯಾ ಸಿನಿಮಾ ‘45’. ಎಲ್ಲವೂ ಅಂದುಕೊಂಡಂತಾಗಿದ್ದರೆ ಸಿನಿಮಾ ಆ. 15ರಂದು ತೆರೆಗೆ ಬರಬೇಕಿತ್ತು. ಆದರೆ, ವಿಎಫ್ಎಕ್ಸ್ ಕೆಲಸಗಳು ಪೂರ್ಣಗೊಳ್ಳದ ಕಾರಣ ಬಿಡುಗಡೆ ತಡವಾಗಿದೆ. ಇದೀಗ ಹೊಸ ರಿಲೀಸ್ ಡೇಟ್ ಘೋಷಿಸಿರುವ ಚಿತ್ರತಂಡ, ಇದೇ ಕ್ರಿಸ್ಮಸ್ ಹಬ್ಬದ ದಿನ ಡಿ. 25ರಂದು ತೆರೆಗೆ ಬರಲಿದೆ. ‘45’ ಚಿತ್ರವು ಅತ್ಯಾಧುನಿಕ ತಂತ್ರಜ್ಞಾನದಿಂದ ಮೂಡಿಬರುತ್ತಿದ್ದು, ವಿಎಫ್ಎಕ್ಸ್ ಹಾಗೂ ಸಿಜೆ ಕೆಲಸಗಳನ್ನು ಕೆನಡಾದ ಪ್ರತಿಷ್ಠಿತ ‘ಮಾರ್ಜ್’ ಸಂಸ್ಥೆ ಮಾಡುತ್ತಿದೆ. ಅಂದುಕೊಂಡ ಸಮಯಕ್ಕೆ ವಿಎಫ್ಎಕ್ಸ್ ಕಾರ್ಯಗಳು ಪೂರ್ಣವಾಗಿಲ್ಲ. ಹೀಗಾಗಿ ಮೊದಲು ಘೋಷಿಸಿದ್ದ ದಿನ ಸಿನಿಮಾ ರಿಲೀಸ್ ಮಾಡಲಾಗಲಿಲ್ಲ. ಈ ಕಾರ್ಯಗಳು ಪೂರ್ಣಗೊಳ್ಳುವ ಸಮಯ ಹಾಗೂ ಪ್ರಚಾರದ ಅವಧಿಯನ್ನು ಗಮನದಲ್ಲಿಟ್ಟುಕೊಂಡು ಇದೀಗ ಡಿ.25ಕ್ಕೆ ಸಿನಿಮಾ ರಿಲೀಸ್ ಮಾಡಲು ಮುಂದಾಗಿದೆ. ವರ್ಷಾಂತ್ಯದ ಮೂಡ್, ಸಾಲು ರಜೆಗಳನ್ನು ಸದುಪಯೋಗಿಸಿಕೊಳ್ಳಲು ಚಿತ್ರತಂಡ ಮುಂದಾಗುತ್ತಿದೆ. ಈ ಮೂಲಕ ಕನ್ನಡ ಸಿನಿಮಾಗಳಿಗೆ ಡಿಸೆಂಬರ್ ತಿಂಗಳ ಫೇವರಿಟ್ ಎಂಬುದು ಮತ್ತೊಮ್ಮೆ ಸಾಬೀತಾದಂತಾಗಿದೆ. ಕಳೆದ ವರ್ಷ ಇದೇ ದಿನ ಸುದೀಪ್ ಅವರ ‘ಮ್ಯಾಕ್ಸ್’ ರಿಲೀಸ್ ಆಗಿ ಬಾಕ್ಸಾಫೀಸ್ನಲ್ಲಿ ಸದ್ದು ಮಾಡಿತ್ತು.
